1 Festọs ama ekesim Siseria ke ñkpọ nte usen ita ema ekebe nditọñọ obufa utom esie, enye ama oto do aka Jerusalem. 2 Do ke mme ikpọ oku ye mme mbuot mme Ju eketiñ ikọ mmọ edian Pọl. 3 Mmọ ema ekpe Festọs ubọk ete yak enye owut mmimọ mfọnido ke enye ndinam eda Pọl ke usọp edi Jerusalem, koro mmọ ema ediomi ndiwot enye ke usuñ. 4 Festọs ama ọbọrọ mmọ ete, "Emum Pọl enim nte owo ñkpọkọbi ke Siseria, ndien ami ñko ñyefiak ñka do idibighike. 5 Yak mme mbuot mbufo esaña ye ami eka Siseria ekenyene se etiñde edian enye do, edieke enye akanamde ñkpọ ndomokiet edue."

6 Festọs ama abiat ñkpọ nte usen itiaita mme duop ye mmọ, ndien enye aka Siseria. Ke udiana usen enye ama etie ke esop ikpe, ndien ama ọnọ uyo eda Pọl eduk edi.

7 Ke Pọl ama ekesim, mme Ju emi eketode Jerusalem edi ema eda ekanade enye ekuk enyuñ etọñọ nditiñ mme nsio nsio oburobut ikọ ndian enye, emi mmọ mikemeke ndisọñọ. 8 Edi Pọl ama anyaña idem onyuñ enyene ifet ndikañ idem esie ke ndidọhọ nte, "Ami ñkanamke baba ñkpọ kiet ndue emi atuahade ye mbet mme Ju, mme eke itie ukpono Abasi, mme eke andikara ofuri Rom, Sisa."

9 Festọs okoyom ndinen iso ye mme Ju do enye ama obup Pọl ete. "Nte afo eyenyime ndika Jerusalem ñkada ke ikpe do ke iso mi ke se etiñde edian fi emi?"

10 Pọl ama ọbọrọ ete, "Ami nda ke iso esop Siseria; ebiet emi anade owo ekpe ikpe mi. Ami nnamke mme Ju baba idiọkñkpọ kiet nte afo ke idem fo etimde ọfiọk. 11 Edieke ami ñkabiatde mbet ñnyuñ nnamde ñkpọ emi ndotde ñkpa, ami mbeñeke ndibọhọ ufen emi. Edi edieke akpanikọ ndomokiet miduhọ ke se etiñde edian mi owo ndomokiet ikemeke ndiyak mi nnọ mmọ. Ami mmesin ebeñe nnọ andikara ofuri Rom."

12 Ke Festọs ama ọkọkọk ibuot ye mme ọnọ item esie ama, enye ama ọbọrọ enye ete, "Afo emebeñe ndinim ikpe fo ke iso akara ofuri Rom ke ntem ana aka iso esie."

13 Ke usen ifañ ama ekebe Edidem Akripa ye Benis ema edi Siseria ndikpono Festọs. 14 Ke mmọ ema ekedu do ke ñkpọ nte usen ifañ, Festọs ama etiñ ọnọ Edidem emi kpukpru se iketukde Pọl ete, "Owo kiet odu mi emi Feliks ọkọkpọñde nte owo ñkpọkọbi; 15 ndien ke ini emi ñkakade Jerusalem, mme ikpọ oku mme Ju ye mme mbuot mmọ ema etiñ mme ikọ edian enye enyuñ ebeñe mi mbiere ikpe ñkpa nnọ enye." 16 Edi ami mma ndọhọ mmọ nte ke idighe ido Rom nditip owo ndomokiet ikpe ñkpa tutu enye ada ke ikpe iso ye iso ye mme mmọ emi edoride enye ikọ onyuñ enyene ifet ndikañ idem esie kabaña se etiñde edian enye.

17 "Ke ini mmọ ekedide mi ye ami, ami ñkabiatke ini ndikop ikpe emi, edi mmanam esop ebono ke udiana usen ñnyuñ nnọ uyo nte Pọl oduk edi. 18 Ke ini mme andidori enye ikọ ekedahade eda nditiñ ikọ, mmọ ikedorike enye ikọ ibaña idiọkñkpọ ndomokiet emi ami ñkekerede. 19 Utu ke oro mmọ ekenyene eneni ye enye ebaña ido ukpono mmọ ye owo emi akakpade emi ekekerede Jisọs, emi Pọl ọkọkwọrọde ete ke enye odu ke uwem. 20 Ami ñkekemeke ndibiere mbaña nte ñkpekemede ndinyene akpanikọ mbaña mme ikọ emi, do ami mma mbup Pọl nte mme enye eyenyime ndikada ke ikpe ke Jerusalem kabaña se etiñde edian enye. 21 Edi Pọl ama afaña onyuñ ebeñe ete yak esin imọ ke idak ukpeme enyuñ eyak ikpe imọ enọ Andikara ofuri Rom ekpe. Ami mma ndọhọ nte yak eka iso ndikpeme enye tutu ami ñkeme ndinọ enye esọk Sisa."

22 Edidem Akripa ama ọdọhọ Festọs ete, "Ami ñkpama ndikop owo emi ke idem mi." Festọs ama ọbọrọ enye ete, "Afo eyekop enye ñkpọñ."

23 Ke udiana usen Akripa ye Benis ema edi ke ñkọñine ye edinam, ediduk efe ikpe ye mme ikpọ mbon ekọñ ye mme mbuot obio. Festọs ama ọnọ uyo ndien ema eda Pọl eduk edi.

24 Festọs ama ọdọhọ ete, "Edidem Akripa, ye kpukpru mme mmọ emi edude mi ye ñnyin: mbufo emekut owo emi, emi ofuri mme Ju mi ye ke Jerusalem ekedade ikpe esọk mi ebaña. Mmọ ema esio ñkpo ete inaha enye odu aba uwem. 25 Edi ami ñkekemeke ndikut nte ke enye amanam ñkpọ ndomokiet emi anamde enye odot isop ñkpa. Ndien sia enye ke idem esie ekebeñede esio ikpe esie enọ Andikara ofuri Rom ami mma mbiere ndinọ enye aka do. 26 Edi ami ñnyeneke akpan ñkpọ ndomokiet ndiwet nnọ Andikara ofuri Rom mbaña enye. Ndien ami mmada enye ndi mi ke iso mbufo, akpan akpan ke iso fo Edidem Akripa, man oto do ke afo ama ọkọduñọrede mme ikọ esie ama, ami ñyekeme ndinyene se ndiwetde. 27 Koro nte ami ñkerede iwutke eti ibuot ndinọ owo ñkpọkọbi aka ndien etre ndiwet añwaña kpukpru ndudue esie ke idak mbet."