1 Ke ini usen Pentikọs, usọrọ idọk, ama ekesim, kpukpru mme andinim ke akpanikọ ema eboho ebiet kiet. 2 Ke unana idorenyin, mmọ ema ekop uyom emi ekebietde uyom ata ọkpọsọñ oyobio nte ọkọsuhọrede oto enyọñ edi, ndien ediyọhọ ofuri ufọk emi mmọ ekebonode. 3 Mmọ ema ekut se ikebietde edeme ikañ nte asuanade ndien odoro mmọ kiet kiet ke idem. 4 Kpukpru mmọ ema eyọhọ ye Edisana Spirit, ndien etọñọ nditiñ ikọ ke mme nsionsio usem nte Edisana Spirit ọkọnọde mmọ ukeme.

5 Mme Ju emi ekebakde Abasi ema eduñọ ke Jerusalem, ndien mmọ eketo ke ofuri idut ererimbot. 6 Ke ini mmọ ekekopde uyom emi, akwa otu owo ema ekọ ediboho. Idem ama akpa mmọ eti eti, koro mmọ kiet kiet ekekopde mme andinim ke akpanikọ nte eketiñde ikọ ke usem mmọ kiet kiet.

7 Ke ñkpaidem ye ñkpeñenyeñ, mmọ ema efiori ete, "Nte mme mmọ emi esesem mme usem emi idighe mbon Kalili? 8 Didie ndien ke ñnyin kpukpru ikop mmọ, nte esemde usem obio emana ñnyin kiet kiet? 9 Ñnyin ito Batia, Medis ye Elam; ito Mesopotemia, Judia, ye Kapadosia, ito Bọntọs ye Esia, 10 Frikia ye Bamfilia, Iyip ye mme ñkanñkuk Libia emi ekperede Sairen; mme isenowo emi etode Rom, 11 mme Ju; ye mme mmọ emi midighe mme Ju emi ema ekekabade esit etiene ukpepñkpọ mme Ju; mbon Kret ye mme Arab; ñnyin imokop mmọ etiñde mme utibe ñkpọ Abasi ke idem usem ñnyin."

12 Ke ñkpaidem ye ñkpeñenyeñ mmọ ema ebup idem mmọ ete, "Emi ọwọrọ didie?"

13 Edi ndusuk owo ekeda mmọ etọ ndọk ete, "Mmọ ekpa mmin." 14 Do ke Pita akadahada ke enyọñ ye mme mbet duopekiet eken onyuñ emenerede uyo ke enyọñ ndien etiñ ikọ ọnọ otu owo ete, "Mme Ju nte ami ye kpukpru mbufo emi edude ke Jerusalem, yak ami nnam ñkpọ emi añwaña mbufo. Ekpañ utọñ akpan akpan ke se ami ñyomde nditiñ. 15 Mme mmọ emi ikpaha mmin nte mbufo ekerede. Idaha emi edi ñkanika usukkiet usenubọk kpọt!" 16 Ih Ih, emi edi se Asiak Uduak Abasi Joel eketiñde abaña;

17 Abasi ọdọhọ ete, " ‘Ke mme akpatre usen,

Ami ñyeñwaña Spirit Mi nduọk kpukpru owo ke idem.

Nditọ mbufo iren ye iban eyesiak Uduak Abasi,

mme ñkparawa iren mbufo eyekut mme ñkukut,

ndien ñkani owo mbufo eyedaba mme ndap.’

18 Kpa ye mme ifin Mi, iren ye iban,

Ami ñyeñwaña Spirit Mi ke mme usen oro,

ndien mmọ eyesiak Uduak Abasi.

19 Ndien ami ñyenam mme utibe ñkpọ ke ikpa enyọñ

ye mme ñkpọ ñkpaidem mi ke isọñ,

iyip, ikañ ye ọkpọsọñ nsuñikañ eyedu,

20 utin eyekabade edi ñkim ñkim,

ndien ọfiọñ eyeyibe nte iyip,

mbemiso akamba ye utibe usen Ọbọñ edisim.

21 Ndien ke ini oro, owo ekededi emi

edikotde Enyiñ Ọbọñ eyenyaña enye."

22 "Mbufo nditọ Isrel, ekpañ utọñ enọ ikọ emi: Jisọs eyen Nasaret ekedi Enyemi Abasi akayararede owut mbufo oto ke mme utibe ñkpọ, mme ñkpọ ñkpaidem ye mme idiọñọ emi Abasi ekebede ke Enye anam. Mbufo ke idem mbufo emefiọk emi, koro mme ñkpọ emi ekedade itie mi ke otu mbufo. 23 Ekeyak owo emi enọ mbufo kpa nte Abasi okobonde ke ubonñkpọ Esie, ndien mbufo ediana ye mme oburobut owo ewot Enye ke edikọñ Enye ke etoñkpa. 24 Edi Abasi ama emenede Enye osio ke ñkpa, ọkpọk Enye ayak ke ubiak ñkpa, koro ñkpa minyeneke ukeme ndimum Enye ñkama."

25 Defid ama etiñ abaña Enye ete,

"Ami ñkokut Ọbọñ kpukpru ini ke iso mi,

koro Enye odude mi ke ubọk nnasia,

ñkpọ ndomokiet idifinake mi.

26 ‘Ke ntre esit enem mi ndien edeme mi onyuñ adara;

ikpọkidem mi ñko eyedu uwem ke idorenyin,

27 Koro afo mudusinke mi unọ udi,

mme ndiyak Edisana owo Fo okut mbiara.

28 Afo amanam mi ndiọñọ mme afañ uwem;

ndien Afo eyeyọhọ mi ye idara ke iso Fo.’ "

29 "Mme nditọ ete, ana ami ntiñ nnọ mbufo añwa añwa mbaña ete ete ñnyin Defid. Enye ama akpa ndien ema ebuk enye, ndien udi esie ñko mmọ mi ye ñnyin tutu esim mfin emi. 30 Enye ekedi Asiak Uduak Abasi, ndien enye ama ọdiọñọ mme eñwọñọ emi Abasi ọkọñwọñọde ọnọ enye: Abasi ama anam eñwọñọ nte ke Imọ iyenam kiet ke otu mme ubon Defid emi ọbọñ kpa nte Defid ekedide. 31 Defid ama okut se Abasi edinamde ke ini iso, ke ntre enye ama etiñ abaña ediset ke ñkpa Enye emi ekesiode edọñ, Kraist, ke ini enye ọkọdọhọde ete, ‘Ikọkpọñke Enye ke obio ekpo, ikpọkidem Esie ikobuhu. 32 Abasi ama emenede kpasuk Jisọs emi osio ke ñkpa, ndien ñnyin kpukpru idi mme ntiense ibaña akpanikọ emi.’

33 Ema emenede Enye enim ke ubọk nnasia Abasi ndien Enye ama ọbọ Ete Edisana Spirit emi Ete ọkọñwọñọde, ndien se mbufo ekutde enyuñ ekopde emi edi enọ Esie emi enye añwañade ọnọ ñnyin."

34 Koro Defid ikọdọkke enyọñ edi enye ama etiñ ete.

" ‘Ọbọñ ama ọdọhọ Ọbọñ mi ete:

tie mi ke ubọk nnasia Mi,

35 tutu Ami nnam mme asua Fo

ekabade edi ñkpọ udori ukot Fo.’ "

36 "Ke ntre, yak ofuri Isrel etim efiọk emi: ke Abasi amanam Jisọs emi mbufo ekekọñde ke eto ewot, edi Ọbọñ ye Kraist."

37 Ke ini mme owo oro ekekopde emi, esit ama etimede mmọ eti eti, ndien mmọ ema ebup Pita ye mme Ọbọsuru eken ete, "Nditọ ete, ñnyin inyene ndinam didie?"

38 Pita ama ọdọhọ mmọ ete, "Ewọñọde ekpọñ mme idiọkñkpọ mbufo owo kiet kiet, ndien ena babtisim ke Enyiñ Jisọs Kraist, man oto do ekpefen mme idiọkñkpọ mbufo, ndien mbufo eyebọ enọ Abasi emi edide Edisana Spirit. 39 Koro Abasi akanam eñwọñọ emi ọnọ mbufo ye mme nditọ mbufo, ye kpukpru mme mmọ emi edude ke anyan ebiet, ye kpukpru mme mmọ emi Ọbọñ Abasi ñnyin edikotde inọ Idem esie." 40 Pita ama ada mme ediwak ikọ efen ekpe ye mmọ onyuñ ọdọhọ ete, "Enyaña idem mbufo esio ke ufen emi edide ke iso etiene mme oburobut emana emi." 41 Ediwak mmọ ema enim se enye eketiñde ke akpanikọ ndien ema enim mmọ babtisim; enyuñ edian ñkpọ nte ibat owo tọsin ita ke eboho oro. 42 Mmọ ema eneghere esin idem ke ndibọ ukpepñkpọ nto mme Ọbọsuru, enyuñ ebuana ke mbono ikọt Abasi enyuñ enyene ebuana ke udia ye ke akam. 43 Abasi amanam ediwak mme ñkpọ ñkpaidem ye mme utibe ñkpọ ke ubọk mme Ọbọsuru, ndien emi ama anam kpukpru owo eyọhọ ye uteñe.

44 Kpukpru mme mmọ emi ekenimde ke akpanikọ ema ekaiso ke ọkpọsọñ ebuana enyuñ ebuana inyene mmọ kiet ye eken. 45 Mmọ esinyam mme ñkpọ ye mme inyene mmọ ndien edeme okuk oro ke otu mmọ etiene nte unana owo kiet kiet ekedide. 46 Kpukpru mmọ ema ekaiso ndisobo ebiet kiet ke okure Edisana Ebiet. Mmọ ema ebuñ uyo ke mme ufọk mmọ, enyuñ edia ñkpọ ọtọkiet ke idara ye ke esit akpanikọ, 47 ke etoro Abasi enyuñ ekut unen ke iso kpukpru owo. Ndien Abasi ama akaiso ndidian ke ibat mmọ kpukpru usen mme mmọ emi enyañade.