1 Ke ufọk Abasi ke Antiok mme prọfet ye mme andikpep ema edu: Banabas, Simiọn emi ekekotde "Ubid", Lusiọs emi okotode Sairin. Manen emi ọkọkọride ke ubọk ada ibuot ukara Erọd, ye Sọl. 2 Kadaña emi mmọ ekekade iso ndituak ibuot nnọ Abasi ye utreudia, Edisana Spirit ama ọdọhọ mmọ ete, "Ebahade Banabas ye Sọl enim enọ mi man mmọ enam utom emi ñkokotde mmọ mbaña." 3 Ke mmọ ema eketre udia enyuñ ebọñ akam, mmọ ema edori Banabas ye Sọl ubọk ke ibuot ndien esio mmọ edọñ.

4 Banabas ye Sọl ke ema ekesio mmọ edọñ ke odudu Edisana Spirit, ema esuhọde eka Seliusia ndien esio do ekebehe ke obio ufọt mmọñ emi ekerede Saiprọs. 5 Ke ini mmọ ekesimde obio Salamis, mmọ ema ekwọrọ ikọ Abasi ke ufọk ukpepñkpọ mme Ju. Jọn Mak ama odu ye mmọ ndinọ uñwam ke utom emi.

6 Mmọ ema esaña ekanade ofuri obio ufọt mmọñ emi tutu mmọ ekesim obio emi ekotde Pafọs, ke ebiet emi mmọ ekesobode abia ibọk kiet emi ekekerede Ba-Jisọs, owo Ju emi ọkọdọhọde ete ke imọ idi prọfet. 7 Enye ekedi ufan ye andikara obio ufọt mmọñ emi, emi ekekerede Sejiọs Pọlọs, emi ekedide ata ọfiọk ñkpọ owo. Ada ibuot ukara emi ama okot Banabas ye Sọl edi ke iso esie koro enye okoyomde ndikop ikọ Abasi. 8 Edi abiaibọk emi, enyiñ esie ke usem mbon Krik edide Elimas, ama ọbiọñọ mmọ. Enye ama añwana ndisio ada ibuot ukara oro ke mbuọtidem mfep.

9 Ndien Sọl emi ekenyuñ ediọñọde enye nte Pọl ama ọyọhọ ye Edisana Spirit, enye ama owuk enyin ese abiaibọk oro, 10 ndien ọdọhọ ete, "Afo edi eyen Setan! Afo edi asua ye kpukpru se ifọnde, afo ọyọhọ ye kpukpru oburobut abiaña ndien afo añwana kpukpru ini ndiwọñọde akpanikọ Abasi nsin ke nsu! 11 Ndien ubọk Abasi ọmọñ ọsuhọrede odoro fi ke idem idaha emi; afo eyedi nnan, ndien afo udukwe uñwana usen ke esisit ini." Kpa ndo ndo oro Elimas ama okop nte obubit ntuhube ofukde enye enyin ndien enye ama asaña akanade oyom owo emi edimumde enye ke ubọk.

12 Ada ibuot ukara ama enim ke akpanikọ kadaña emi enye okokutde ñkpọ ntibe emi, idem ama, akpa enye eti eti abaña ukpepñkpọ emi otukde Ọbọñ.

13 Pọl ye mme nsaña esie ema esio ekpọñ Pafọs ndien ekebehe ke obio emi ekerede Peka, ke Pamfilia; edi Jọn Mak ama ọkpọñ mmọ do afiak edem aka Jerusalem. 14 Mmọ ema esuk eka iso eto ke Peka ekesim Antiọk emi okodude ke Pisidia; ndien ke usen ikọ Abasi mme Ju, mmọ ema eduk esit ufọk ukpepñkpọ mme Ju eketetie.

15 Ke ema ekekot mbet Moses ye ñwed mme prọfet ema, mme akama utom ke ufọk ukpepñkpọ mme Ju ema edọñ edọhọ mmọ ete, "Nditọ ete, ñnyin iyom mbufo enyene se etiñde enọ mme mmọ emi edieke mbufo enyenede etop idọñesit enọ mmọ."

16 Pọl ama adaha ada, anam idiọñọ ke ubọk esie, ndien ọtọñọ nditiñ ikọ ete, "Nditọ ete ubon Isrel ye kpukpru mme mmọ emi midighe Ju emi edude mi enyuñ etuakde ibuot enọ Abasi, ekpañ utọñ enọ mi!

17 Abasi idut mme Isrel ekemek mme ete ete ñnyin, onyuñ anam mmọ edi ọkpọsọñ idut ke ini emi mmọ ekeduñọde ke isọñ Ijipt nte isenowo. Abasi ama osioño mmọ ke Ijipt ke ọkpọsọñ odudu Esie. 18 Ndien ke isua aba Abasi ama ọyọ mmọ ke isọñ utatan. 19 Enye ama osobo idut itiaba ke isọñ Kenan ndien Enye ama anam ikọt Esie edi mme andinyene isọñ oro." 20 Kpukpru ñkpọ emi eketibe ke ñkpọ nte isua ikie inañ ye aba ye duop. "Ke emi ama ekebe, Enye ama ọnọ mmọ mme ekpe ikpe tutu ekesim ini Prọfet Samuel.

21 Ndien ke ini emi mmọ ekeyomde ọbọñ, Abasi ama ọnọ mmọ Sọl, eyen Kish emi okotode ubon Benjamin, ndidi Ọbọñ mmọ ke isua aba. 22 Ke Abasi ama ekemen Sọl efep enye ama anam Defid edi ọbọñ mmọ. Ekop se Abasi eketiñde abaña enye, ‘Ami mayarade mfiọk nte ke Defid, Eyen Jesi, edi uduot owo emi ami mmade. Owo emi edinamde kpukpru se ndiyomde enye anam.’ " 23 "Ekedi Jisọs emi otode, ke ubon Defid, ke Abasi akanam edi Andinyaña idut Isrel nte enye ọkọñwọñọde.

24 Mbemiso Jisọs ọkọtọñọ utom Esie, Jọn ama ọkwọrọ ikọ ọnọ idut Isrel ete yak mmọ ewọñọde ekpọñ mme idiọkñkpọ mmọ enyuñ ena babtisim, 25 Ndien kadaña emi Jọn okoyomde ndikure utom esie, enye ama obup mme owo ete, ‘Mbufo ekere ete ami ndi anie?’ Ami ndighe enyemi mbufo ebetde edi. Edi se enye ke edi ke edem mi, ndien ami ndotke ndisio Enye ikpaukot Esie mfep ke ukot!"

26 "Nditọ ete mi, mme ubon Ebraham, ye kpukpru mme mmọ emi midighe Ju, emi edude mi enyuñ etuakde ibuot enọ Abasi: Ekedọñ etop edinyaña emi enọ ñnyin! 27 Koro mme mmọ emi edude ke Jerusalem, ye mme mbuot mmọ, ikọdiọñọke ete ke Jisọs edi andinyaña, mme ndidiọñọ se ikọ mme prọfet emi ekotde ke kpukpru usen ikọ Abasi mme Ju ọwọrọde. Kpa ye oro mmọ ema eñwam ndinam se mme prọfet eketiñde ewọrọ esu ke ediwot Jisọs. 28 Okposuk edi oro mmọ mikenyeneke isọñ ndibiere ikpe ñkpa nnọ Enye, edi mmọ ema edọhọ Pailet anam ewot Enye. 29 Ndien ke mmọ ema ekenam kpukpru se ñwed Abasi eketiñde abaña Enye, mmọ ema ekọñọde Enye ke etoñkpa ndien ebri enye ke udi.

30 Edi Abasi ama anam Enye afiak eset ke ñkpa odu uwem, 31 ndien ke ediwak usen Enye ama ọwọrọ owut mme mmọ emi ekesañade ye Enye eto Kalili eka Jerusalem idem. Mme mmọ emi edi mme ntiense Esie enọ idut Isrel.

32 Ñnyin itiñ Eti Mbuk emi inọ mbufo: se Abasi ọkọñwọñọde ọnọ mme ete ñnyin, 33 Enye amanam ọwọrọ osu ke iso ñnyin mme nditọ mmọ, ke edimenede Jisọs nsio ke ñkpa. Kpa nte ewetde ke ñwed Sam ọyọhọ iba: ‘Afo edi Eyen mi mfin emi ami makabade ndi Ete fo.’

34 Ndien emi edi se Abasi eketiñde abaña edimenede Enye nsio ke otu mme akpaña ñkpa, man Enye edifiak okoduk mbiara. ‘Ami ñyenọ fi mme edidiọñ emi asañade onyuñ enyenede iwuk emi ami ñkọñwọñọde nnọ Defid.’ 35 Kpa nte enyuñ etiñde ke itie ñwed efen, ‘Afo uduyakke Edisana owo fo okut mbiara.’ 36 Koro Defid ama anam ñkpọ ọnọ Abasi nte uduak Abasi ekedide ke ini esie, ndien enye ama akpa enyuñ ebuk enye ediana mme ete ete esie, ndien enye ama abiara. 37 Edi enye emi Abasi ekemenerede osio ke otu mme akpaña ñkpa ikabiarake.

38 Nditọ ete mi, ñyom mbufo efiọk ete ke edi ke Jisọs ke ekwọrọ edifen mme idiọkñkpọ mbufo enọ mbufo. Ke Enye kpukpru mmọ emi enimde ke akpanikọ enyene utebe ikpe ke kpukpru mme idiọkñkpọ emi mbet Moses mikekemeke ndinọ ñnyin utebe ikpe. 39 Emeyak enọ owo kiet ekededi emi enimde ke akpanikọ. 40 Ekpeme ndien man se mme prọfet etiñde editibe ọnọ mbufo:

41 Ese, mbufo mbon nsahi,

edu ke ñkpaidem enyuñ etak!

Koro ami ke nnam ñkpọ ke eyo mbufo

emi mbufo mikpenimke ke akpanikọ

edieke ekpetiñdetiñ enọ mbufo ebaña."

42 Ke ini emi Pọl ye Banabas ekewọñọde ke ufọk ukpepñkpọ mme Ju, mme mmọ oro ema ebeñe mmọ ndifiak ndi ke usen ikọ Abasi mme Ju efen, man ekpetiñ enọ mmọ ebaña mme ñkpọ emi. 43 Ke ini mbono ama akasuana, ediwak mme Ju ye mme andikpono Abasi ke edu mme Ju, ema etiene Pọl ye Banabas. Mme Ọbọsuru ema etiñ ikọ nsọñidem enọ mmọ enyuñ ekpe ye mmọ ndika iso ndidu uwem ke idak mfọn Abasi. 44 Ke utọñọntak usen ikọ Abasi mme Ju, ama ekpere ndidi kpukpru owo ke obio ekewọñọ edi ndikop ikọ Abasi.

45 Kadaña emi mme Ju ekekutde otu owo emi, esit mmọ ama ọyọhọ ye ufup; mmọ ema etiñ ikọ etuaha ye se Pọl eketiñde enyuñ esuñi enye.

46 Edi Pọl ye Banabas ema eka iso ndisuk ntetiñ ikọ ye uko ete, "Akana nte ñnyin ibem iso itiñ ikọ Abasi inọ mbufo. Edi sia mbufo ema esin ikọ Abasi, inyuñ ikereke idem mbufo nte ke mmimọ imodot ndinyene nsinsi uwem, ñnyin iyekpọñ mbufo ibine mme mmọ emi midighe Ju. 47 Koro emi edi ewuhọ emi Abasi owukde ñnyin, ‘Ami mmosio mbufo ñwuk nte edi uñwana enọ mme mmọ emi midighe Ju, nte edi usuñ edinyaña enọ ofuri ererimbot.’ "

48 Ke ini mme mmọ emi midighe mme Ju ekekopde ikọ emi mmọ ema edara eti eti enyuñ enọ Abasi ubọñ ke ikọ Esie; ndien mme mmọ emi ekemekde enim enọ nsinsi uwem ema enim ke akpanikọ. 49 Ikọ Abasi ama asuana ọyọhọ ofuri ñkanñkuk oro.

50 Edi mme Ju ema esin nsọk ke otu mme ọwọrọ iso irenowo ke obio oro, ye mme iban emi midighe mme Ju emi ekedade ñkoñkoñ idaha enyuñ ekponode Abasi. Mmọ ema etọñọ ndisin Pọl ye Banabas enyin tutu ebin mmọ esioño ke ñkanñkuk mmọ. 51 Ke ntre mme Ọbọsuru ema ekeñ ntan ikpat mmọ ebon nte ubiomikpe enọ mmọ ndien mmọ ekpọñ eka ke Aikoniọm. 52 Ndien mme mbet Kraist ke Antiọk ema eyọhọ ye inemesit ye Edisana Spirit.