1 Kadaña emi Pita ye Jọn ekesuk etiñde ikọ enọ mme otu owo oro, mme oku ye etubom mme ekpeme Edisana Ebiet, ye mme Sadusi ema esaña ebine mmọ. 2 Esit ama ayat mmọ eti eti koro mme Ọbọsuru iba oro ekekpepde mme owo ete ke Jisọs ama eset ke ñkpa, emi ọsọñọde ete ke mme akpaña ñkpa eyefiak eset enyuñ enyene uwem. 3 Do mmọ ema emum mmọ enyuñ esin mmọ ke ufọk ñkpọkọbi tutu udiana usen, koro ini ama ababiara. 4 Edi ediwak mme mmọ emi ekekopde etop emi ema enim ke akpanikọ; ndien ibat mmọ ama esim ñkpọ nte tọsin ition.

5 Ke udiana usen, mme mbuot mme Ju ye mme ikpọ owo ye mme ekpep ibet ema esobo ke Jerusalem. 6 Mmọ ekesobo ye Akwa Oku Anas; ye Kaifas, ye Jọn, ye Aleksanda, ye mme mmọ eken etode ufọk Akwa Oku. 7 Mmọ ema esioño mme Ọbọsuru ewuk ke iso mmọ enyuñ ebup mmọ ete, "Mbufo ekenam didie ñkpọ emi? Nso utọ odudu ke mbufo enyene, mme enyiñ anie ke mbufo ekeda enam ñkpọ emi?"

8 Pita emi ọkọyọhọde ye Edisana Spirit ama ọbọrọ mmọ ete, "Mme Andida usuñ ye mme mbuot, 9 edieke ebupde ñnyin mbume mfin emi ebaña eti ñkpọ emi inamde ye owo mbuñọ, ye nte ekenamde enye okop nsọñidem, 10 ndien ana kpukpru mbufo efiọk, ndien kpukpru mbon Isrel enyene ndifiọk, nte ke owo emi adade mi ke iso mbufo ye ọyọhọ nsọñidem oto ke odudu Enyiñ Jisọs Kraist eyen Nasaret, emi mbufo ekekọñde ke eto ewot, ndien Abasi ama emenede Enye osio ke ñkpa, afiak esin ke uwem. 11 Jisọs edi Enye emi ikọ Abasi etiñde abaña ntem, ete, ‘ltiat emi mbufo mme ọbọp ufọk ekefumide, akabade edi itiat inuk ufọk.’ 12 Edinyaña oto Enye ikpọñ ikpọñ; koro owo efen iduhọ ke ofuri ererimbot, emi Abasi ọnọde enyiñ esie, ndida ñnyaña owo."

13 Idem ama akpa kpukpru mbon esop mme Ju ke usuñ ye edu emi Pita ye Jọn ekedade etiñ ikọ uko uko, ye ke emi ñko mmọ eketimde efiọk ete ke mmọ ekedi mme ikpuikpu owo emi mikenyeneke baba ifiọk ñwed ndomokiet. Mmọ ema eti ini oro nte ke mme mmọ emi ekedi mme nsaña Jisọs. 14 Edi mmọ ikenyeneke ndomo ikọ ndomokiet nditiñ koro mmọ ema ekut owo emi ekenamde okop nsọñọ idem nte adade do ye Pita ye Jọn. 15 Do mmọ ema edọhọ Pita ye Jọn ye owo mbuñọ oro ewọñọ añwa kaña ekpọñ ubet esop, ndien mmọ ema etọñọ ndidiomi ke idem mmọ.

16 Mmọ ema ebup idem mmọ ete, "nso ke ñnyin idinam ye mme mmọ emi, ke ini kpukpru owo kiet kiet emi eduñde ke Jerusalem ediọñọ ete ke mmọ enam mme utibe ñkpọ emi akananam mitibeke? Ndien ñnyin ikemeke ndikañ ñkpọ emi. 17 Edi man ikpan ñkpọ emi nditara ñkan emi ke otu mme owo, eyak ñnyin iduri mmọ utọñ ekutọñọ ntak etiñ ikọ ye owo ndomokiet ke enyiñ Jisọs." 18 Do mmọ ema etọñọ ntak ekot mmọ eduk edi ufọk esop enyuñ edọhọ mmọ ete ke ntak ndomokiet mmọ inyeneke nditiñ ikọ mme ndikpep ñkpọ ke enyiñ Jisọs.

19 Edi Pita ye Jọn ema ebọrọ mmọ ete, "Mbufo ke idem mbufo emen ese: efe enen ke iso Abasi? Ndisuk ibuot nnọ mbufo mme ndisuk ibuot nnọ Abasi? 20 Koro ñnyin ikpekemeke nditre nditiñ ikọ mbaña se ñnyin ke idem ñnyin ikokutde inyuñ ikopde."

21 Esop ema ekọkọrọ eduri mmọ utọñ, ke ọkpọsọñ usuñ, ndien esana mmọ eyak. Mmọ ikekwe ntak emi ekpemiade mmọ ufen, koro kpukpru owo ke ekenọnọ Abasi ekọm ebaña se iketibede. 22 Owo emi ọkọbọde utibe edikọk emi ama ebe isua aba ke emana.

23 Ekesasana mmọ eyak, Pita ye Jọn efiak ebine otu mmọ enyuñ etiñ enọ mmọ se Ikpọ Oku ye mme ikpọ owo mme Ju eketiñde ye mmọ,

24 Kadaña emi mmọ ekekopde ñkpọ emi, mmọ kpukpru ema edian uyo ke akam ebiet kiet enọ Abasi ete, "Ete ñnyin ye andinam enyọñ, isọñ, ye inyañ ye kpukpru mme ñkpọ emi edude ke esit mmọ."

25 Afo ama etiñ ikọ ke odudu Edisana Spirit oto ke inua isuñutom Fo ete ñnyin Defid:

"Ntaha mme idut eyatde esit,

enyuñ eduakde ikpuikpu uduak?"

26 Mbọñ ererimbot ebeñe idem mmọ,

mme akara ukara enyuñ esop idem ọtọkiet

ebaña Ọbọñ

ye Andinyaña emi Abasi eyetde aran osio onim.

27 "Koro ke akpanikọ Erọd ye Pọntiọs Pailet esop idem ọtọkiet ke akwa obio emi ye mme mmọ emi mibakke Abasi ye mme ubon Isrel ebaña Jisọs, Edisana isuñutom Fo, emi akanamde edi Andinyaña. 28 Mmọ ekenam se odudu ye uduak Fo ama ekebemiso ebiere nte ana etibe. 29 Ndien ke emi Ọbọñ, kere baña mme ndighe mmọ nyuñ nọ ñnyin mme asañautom Fo ukeme nditiñ ikọ Fo ye ọyọhọ uko. 30 Nyanarede ubọk Fo ke edikọk udọñọ ye ke edinam mme utibe idiọñọ ye mme ñkpọ ñkpaidem ke enyiñ Edisana isuñ Fo Jisọs."

31 Ke mmọ ema ekebọñ akam ema, ebiet emi mmọ ekebonode ama enyek. Ndien kpukpru mmọ ema eyọhọ ye Edisana Spirit ndien etọñọ ndikwọrọ ikọ Abasi uko uko.

32 Kpukpru mme mmọ emi ekenimde ke akpanikọ ekenyene esit kiet ye unyime kiet. Owo ndomokiet ikọdọhọke ete se ñnyenede edi okim ikpọñ, edi kpukpru mmọ ekebuana ye kiet eken kpukpru se mmọ ekenyenede.

33 Mme Ọbọsuru ema etie ntiense ebaña ediset ke ñkpa Ọbọñ Jisọs ye ọkpọsọñ odudu, ndien Abasi ama añwaña uwak edidiọñ ọnọ mmọ kpukpru. 34 Owo ndomokiet ke ñka oro ikọduhọ emi okodude ke unana. Mme mmọ emi ekenyenede mme isọñ mme ufọk ema enyam mmọ eda okuk oro ebọde ke mme unyam oro, 35 ediyak enọ mme Ọbọsuru ndien ebahade okuk oro enọ owo kiet kiet etiene nte unana esie edide.

36 Ntre ke ekedi ye Josef, owo Lefai emi akamanade ke Saiprọs, emi mme Ọbọsuru ekekotde Banabas (emi ọwọrọde, "Enye emi ọdọñde owo esit"), 37 enye ama anyam isọñ emi enye ekenyenede, onyuñ emen okuk oro ọkọnọ mme Ọbọsuru.