1 Owo kiet ama odu ke obio Siseria emi ekekerede Kọneliọs, etubom udim ekọñ mbon Rom emi ekekotde "Udim ekọñ Itali." 2 Enye ekedi owo emi okokponode Abasi, enye ye ofuri Ufọk esie ema etuak ibuot enọ Abasi. Enye ama anam ñkpọ eti eti ndiñwam mme Ju emi ekedide mbio ubuene, onyuñ esiyire ke edibọñ akam nnọ Abasi. 3 Ekedi ke ñkpọ nte ñkanika ita uwemeyo usen kiet ke enye okokut ñkukut, emi enye eketimde okut Enjel Abasi kiet emi okodukde edidọhọ enye ete, "Kọneliọs."

4 Enye ama owuk enyin ese enjel emi ke ndik onyuñ ọdọhọ ete, "Nso kedi Ete?" Enjel oro ama ọbọrọ ete, "Abasi omokop mme akam fo ye mme utom eti ido fo, ndien Enye eti fi.

5 Ke emi dọñ owo aka Jọpa okokot owo emi ekerede Saimọn Pita. 6 Enye oduñ ye ekim ikpa emi ekerede Saimọn emi oduñde ekpere inyañ."

7 Do ke enjel emi eketiñde ikọ ye enye ọkọnyọñ, ndien Kọneliọs ama okot mme nditọ ufọk esie iba ye añwana ekọñ kiet ke otu mmọ emi esikpemede enye, emi ñko ekenyenede ndik Abasi. 8 Enye ama etiñ ọnọ mmọ kpukpru se iketibede ndien ama ọdọñ mmọ eka Jọpa.

9 Ke udiana usen nte mmọ ekesañade ekpere Jọpa, Pita ama ọdọk ke ọkọm ufọk, ke ufọt uwemeyo ndibọñ akam. 10 Biọñ ama ọdọñ enye, enye ama onyuñ oyom ñkpọ ndidia ndien kadaña ini emi ekenamde udia ke ubọk enye ama okut ñkukut.

11 Enye ama okut nte ikpa enyọñ ọkubọrede ndien okut nte ñkpọ ọkọsuhọrede edi emi ekebietde akwa afia ọfọñ emi ekemumde ke ituñ esie mbinañ esuk esin ke isọñ, 12 Ke esit esie mme nsio nsio oruk unam, urukikọt ye mme ọyọñ inuen enyọñ, ekesine.

13 Uyo ama ọdọhọ enye ete, "Daha ke enyọñ Pita, wot ta."

14 Edi Pita ama ọbọrọ ete, "Baba Ọbọñ, akananam ami ntaha ñkpọ ekededi emi edehede mme ebatde ke mbiara."

15 Uyo oro ama ọtọñọ ntak etiñ ikọ ye enye ete, "Kubat ñkpọ ndomokiet ke ndek emi Abasi ama akanam asana."

16 Ñkpọ emi eketibe utim ikata, ndien ema efiak ekot afia ọfọñ emi edọk ke enyọñ. 17 Kadaña emi Pita okodude ke ekikere abaña utọ ñkukut emi enye okokutde, mme mmọ emi Kọneliọs ọkọdọñde ema eyarade ediọñọ ebiet emi ufọk Saimọn okodude ndien mmọ ema etuak eda ke inua otop.

18 Mmọ ema esin uyo ebup ete, "Nte esen owo odu mi emi ekerede Saimọn Pita?"

19 Pita ke akañwana ndidiọñọ se ñkukut emi ọwọrọde, do ke Spirit ọkọdọhọ enye ete, "Kpañ utọñ ke owo ita mi ke eyom fi. 20 Ke ntem, tim idem fo nyuñ suhọrede, ndien kunyuñ ubiat ini tiene mmọ koro edi ami ñkọdọñ mmọ."

21 Do ke Pita ọkọsuhọde okonyuñ ọdọhọ mme mmọ oro ete, "Ami ndi owo emi mbufo eyomde. Esaña didie?" 22 Mmọ ema ebọrọ ete, "Etubom udim ekọñ emi ekerede Kọneliọs ọkọdọñ ñnyin. Enye edi eti owo emi atuakde ibuot ọnọ Abasi, ndien enye edi owo emi kpukpru mme Ju ekponode. Enjel Abasi kiet ọkọdọhọ enye ete yak enye ọdọñ edikot fi, man enye okop se afo enyenede nditiñ nnọ enye."

23 Pita ama ebeñe mmọ eduk ufọk onyuñ anam mmọ edañ ye enye ke okoneyo oro. Ke ndañ nsiere enye ama etim idem onyuñ asaña ye mmọ; ndien ubak mme nditọ ete ke Jọpa ema etiene enye eka.

24 Ke udiana usen mmọ ema ekesim Siseria, ebiet emi Kọneliọs okodude ebet enye, ye mme iman esie, ye mme ufan esie emi enye okokotde. 25 Nte Pita okoyomde ndiduk ufọk, Kọneliọs ama edisobo enye, onyuñ ọduọ enye ke ukot, onyuñ okpono enye. 26 Edi Pita ama anam enye adaha ke enyọñ, onyuñ ọdọhọ enye ete, "Daha ke enyọñ, koro ami ke idem mi ndide owo."

27 Pita ama aka iso nditiñ ikọ ye Kọneliọs ke ini mmọ ekesañade eduk ufọk, ke ebiet emi enye ama okut mme ediwak owo nte ekebonode.

28 Enye ama ọdọhọ mmọ ete, "Mbufo ke idem mbufo emefiọk ọfọn ekem nte ke ido ukpono mme Ju iyakke owo Ju ekese mme enyenyene ebuana ye mme mbon mmọ emi midighe mme Ju. Edi Abasi omowut mi ete yak ami ñkuse owo ndomokiet nte ndedehe owo. 29 Ke ntre ke ini afo ọkọdọñde ebine mi, ami mma ntiene, ñkafañake. Ami mbup fi ndien nte, nsidi ntak emi afo ọkọdọñde ebine mi?"

30 Kọneliọs ama ọbọrọ ete, "Ekedi ke utọ ini emi ke usen ita emi ekebede ke ami ñkọbọñ akam ke ufọk mi ke ñkanika ita uwemeyo. Ndo ndo oro owo emi ekesinede ọfọñ emi esemdesem ama ọwọrọ ada mi ke iso, 31 ndien ama ọdọhọ mi ete, ‘Kọneliọs! Abasi ama okop akam fo, onyuñ eti kpukpru utom mfọnido fo. 32 Dọñ owo aka ke Jọpa okokot owo emi ọyọhọ enyiñ esie edide Saimọn Pita. Enye edi esen ke ufọk Saimọn ekim ikpa, emi odude ekpere inyañ.’ 33 Ke ntre ami ñkebiatke ini ndidọñ ebine fi, ndien afo amanam eti ido ke edidi fo. Ke emi kpukpru ñnyin mi ke iso Abasi, ibet ndikop se ededi emi Abasi edidọhọde fi ete etiñ ọnọ ñnyin."

34 Pita ama ọtọñọ nditiñ ikọ ete: "Ami mmetim mfiọk ndien ke emi nte ke edi akpanikọ nte ke Abasi ada kpukpru owo ukem ukem. 35 Owo ekededi emi abakde Enye onyuñ anamde se inende, Enye enyime enye, ikereke mme owo oro oto idut efe. 36 Emi edi etop emi Abasi ọkọdọñde esọk nditọ Isrel, emi etiñde abaña eti mbuk emem emi otode Jisọs Kraist, emi edide Ọbọñ kpukpru owo. 37 Afo ọmọfiọk se itibede ke ofuri Judia, ọtọñọde ke Kalili, ke Jọn ama ọkọkwọrọ edina babtisim ama. 38 Nte Abasi ekeyetde Jisọs eyen Nasaret aran ke Edisana Spirit ye odudu, ye nte Enye akasañade akanade anam nti ñkpọ onyuñ ọkọk kpukpru mme mmọ emi ekedude ke idak odudu ukara Setan, koro Abasi okodude ye Enye."

39 "Koro idi mme ntiense ibaña mme ñkpọ kiet kiet emi enye akanamde ke idut mme Ju ye ke Jerusalem. Mmọ ema ewot Enye ke edikọñ Enye ke eto, 40 edi Abasi ama anam Enye eset ke ñkpa ke ọyọhọ usen ita, onyuñ anam ekut Enye.

41 Ikedighe kpukpru owo ekekut Enye, edi ekedi ñnyin mme ntiense emi Abasi ama ekememek enim. Ñnyin ima idia inyuñ iñwọñ ñkpọ ye Enye ke enye ama ekeset ke ñkpa. 42 Ndien Enye ama osio ñnyin ọdọñ ete ikọkwọrọ Eti Mbuk emi ke kpukpru ebiet inyuñ inam mme owo efiọk ete ke edi Abasi ekemek Jisọs nte Ekpe ikpe mme odu uwem ye mme akpaña ñkpa. 43 Kpukpru mme prọfet eketie ntiense ebaña Enye ete, owo ekededi emi enimde enye ke akpanikọ eyefen mme idiọkñkpọ esie oto ke odudu enyiñ Esie."

44 Kadaña emi Pita okosuk etiñde ikọ, Edisana Spirit ama ọsuhọde odoro kpukpru mme mmọ emi ekekpañde utọñ enọ etop emi. 45 Idem ama akpa mme Ju emi ekenimde ke akpanikọ emi ekesañade ye Pita eto Jọpa koro Abasi ama añwaña enọ Edisana Spirit Esie ọnọ mme mmọ emi midighe mme Ju ñko. 46 Koro mmọ ekekopde mmọ ekesemde usem ke mme edeme efen enyuñ etoro Abasi ke odudu Esie. Pita ama etiñ ikọ, 47 "Mme mmọ emi ebọ Edisana Spirit, ukem ukem nte ñnyin ñko ikọbọde. Nte owo ndomokiet ekeme ndibiọñọ ndinim mmọ babtisim ke mmọñ?" 48 Do enye ama ọdọhọ enim mmọ babtisim ke Enyiñ Jisọs Kraist, ndien mmọ ema ebeñe enye ndidañ ye mmọ ke usen ifañ.