Deuteronômio 17

बल़ीदान ज़ेथ खोट होए

1 मोसा बोलअ इज़राईली लै इहअ, "ज़ै कहा बाछ़ू या कोई मिम्मूं दी किज़ै खोट होए, तिहै पशू निं आपणैं परमेशर बिधाता लै बल़ीदान करी। थारअ इहअ करनअ हणअ च़िल़्हखरअ काम।

मुहुर्ती पूज़णै आल़ै मणछा लै सज़ा

2,3 "बिधाता दैणीं तम्हां बस्सणा लै नगरी। पर बादा का सका केभै इहअ हई कि थारी नगरी दी कुंण मर्ध या बेटल़ी होरी देअआ-देबीए पूज़ा करदै लागे, या सुरज़, ज़ोथ या तारे पूज़ा करदै लागे! मंऐं डाहै तम्हैं पैहलै ई नैरी हेरे तम्हैं निं होरी देअआ पूज़दै लागी। किल्हैकि ज़ुंण इहअ करा, सह चोल़ा बिधाते हुकम अर तैहा करारा बी करा खतम ज़ुंण तेऊ तम्हां संघै आसा किई दी।✝17:2-3 लुआ. 22:20 4 ज़ै तम्हैं कधू इहअ शुणें कि थारी नगरी किअ कुंणी इहअ च़िल़्हखरअ पाप, तम्हैं करै तेते राम्बल़ै करै पुछ़-ज़ाच़ कि इज़राईली मांझ़ै इहअ पाप सच्च़ी हुअ। 5-7 पर तेता लै लोल़ी तम्हां किछ़ नां किछ़ दूई या चअन शाजत ज़रूर भेटै, कहा एकी मणछे शाजती करै निं तम्हैं बोली सकदै कि सह मणछ आसा दोशी।✝17:5-7 गण. 35:30; बधा. 19:15; मोत्त. 18:16; 2 करि. 13:1; 1 तिम. 5:19; इब्रा. 10:28

"ज़ै एही गल्‍ल शुची निखल़े, तै काढै तेऊ इहै पाप करनै आल़ै मणछा नगरीए प्रऊल़ी बागै, संघा पाऐ तेऊ सोभै ज़ण्हैं पात्थरो ढो दैई मारी। पर ज़ुंण तैहा गल्‍ले शाजत आसा, सोभी का आजी बाहै तिंयां मणछ तेऊ पापी मणछा लै पात्थरै।

कठण पांच़ी

8-12 "इज़राईलीओ, थारी नगरी सका पांच़ी करना लै इहै झ़गल़ै हई, ज़ेतो फैंसलअ करनअ तम्हां लै बेघै कठण होए कि शुची गल्‍ल किज़ै आसा अर किज़ै झ़ुठी। हई सका कि तम्हां लै ऐहा गल्‍लो थोघ करनअ खास्सअ कठण होए कि कुंण धोखै दी मूंअ कि तेऊए हत्या हुई। अबी सका कठण हई कि कहा ज़ैदातो नकसान या कहा मणछा लै खाढ-खोत्तै धोखै दी पाऐ कि इहअ कुंणी ज़ाणीं भुझ़ी किअ? ज़ै इहअ फैंसलअ करनअ तम्हां लै बेघै कठण होए, इहै मकदमैं निंयैं बडी दालता लै लेबी गोत्रे प्रोहता सेटा तैहा पबित्र ज़ैगा ज़ुंण थारै परमेशर बिधाता आप्पू लै आसा छ़ांटी दी।✝17:8-12 1 करि. 5:13

"ऐहा दालता दी हणअ एक बडअ पांच़ अर कई प्रोहत ज़ुंण बिधाते बेदी दी च़ाकरी करा। तिन्‍नां खोज़णअ तम्हां का तेते बारै बधान, संघा खोज़णअ तेऊ मकदमें बारै आपणअ फैंसलअ बी। तेखअ ज़िहअ बडअ पांच़ बोले, सह दोशी मणछ करै तेखअ ठीक तिहअ ई। ज़ै सह मणछ तिहअ नांईं करे, तै पाऐ तेऊ मणछा मारी। 13 ताकि ज़ांऊं होर इज़राईली बी इना गल्‍ले बारै शुणें, तिन्‍नां बी रहणीं तेखअ डअर, ताकि तिंयां बी बडी दालतो हुकम मने।

राज़ै लै बधान

14 "इज़राईली मणछो, ज़ुंण ज़ैगा तम्हां लै बिधाता आसा लाई दी दैई, ज़ेभै तम्हैं तिधी पुजी तैहा ज़ैगे मालक बणी तिधी बस्से, तेखअ सका तम्हां इहअ बच़ार एछी, ‘ज़िहै हाम्हां फेर होरी देशै राज़ै आसा, तिहअ ई बणाणअं हाम्हां बी आपणअ एक राज़अ।’✝17:14 1 शमू. 8:5

15 "तम्हैं लागै इहअ बी करदै अर आप्पू लै छ़ांटै एक राज़अ, पर ऐहा गल्‍लो डाहै खैल कि सह राज़अ लोल़ी इज़राईली ई मांझ़ा का हुअ अर सह लोल़ी बिधाता आप्पै हुअ छ़ांटअ द।

16 "सह राज़अ निं आपणीं सैना लै खास्सै घोल़ै डाही, खासकर मिसर देशा लै निं आपणैं आदमी घोल़ै लंदै छ़ाडी*17:16 घोल़ै लंदै छ़ाडी तेऊ ज़मानैं दैआ तै ढब्बे बदल़ै मणछ! संघा आणा तै तेते बदल़ै घोल़ै लई तैही आसा बोलअ द कि मिसर देशा लै निं घोल़ै लंदै डेऊई आथी।, किल्हैकि बिधाता आसा तम्हां लै इहअ बोलअ द, ‘मिसर देशा लै निं तम्हैं कधि फिरी डेऊई।’✝17:16 1 राज़. 10:28; 2 इति. 1:16; 9:28 17 नां सह राज़अ आप्पू लै खास्सी बेटल़ी डाही, किल्हैकि तिंयां सका तेऊ बिधाता का दूर करी कबाता पाई। नां सह राज़अ आप्पू लै खास्सअ सुन्‍नअ-च़ंदी झाल़ी आथी।✝17:17 1 राज़. 11:1-8; 1 राज़. 10:14-22,27; 2 इति. 1:15; 9:27

18 "बिधाते सारै बधाने असली पोथी रहणीं प्रोहता का ज़ुंण लेबी गोत्रा का आसा। तेखअ ज़ुंण थारअ राज़अ बणी राज़गाद्दी दी बेठे, सह डेओऐ प्रोहता सेटा लै, संघा च़ुआल़ै तिन्‍नां नदरी आपणैं हाथै लिखी बधाने कताबे एक नकल आप्पू लै। 19 बधाने तैहा च़ुआल़ी दी पोथी डाहै सह सारी अमरा आप्पू का। संघा करै धैल़ तेता पहल़ी अर ज़िहै बिधाता हुकम आसा खोज़ै दै, तेता मनै तिहै ई, ताकि सह डरदी-काम्बदी बिधाते च़ाकरी करनी शिखल़े। 20 तै निं तेऊए मन्‍नैं इहअ घमंड एछणअ कि सह आसा तेऊए सोभी भाई-बंधा का खास।

"ज़ै सह राज़अ बिधाते बधाने पठी हुकम मने, तै करनअ तेऊ अर तेऊए आजू आद-लुआदा इज़राईला दी खास्सी साला राज़।"