Deuteronômio 22

बैहो बधान

13 "ज़ै कुंण मर्ध बैह करे, अर तैहा संघै पैहली बैल़ी रही बादा का तेऊ सह शोहरी नांईं गम्मे अर 14 तेसे बारै ज़ाणीं-भुझ़ी एही झ़ुठी गल्‍ला करी बदनाम करे, ‘मंऐं किअ ऐहा संघै बैह, पर ऐहा संघै सुत्ती करै लागअ मुखा थोघ कि अह निं कुंआरी आथी ती।’

15 "ज़ै केभै इहअ होए, तै डेओऐ तैहा शोहरीए ईज-बाब तैहा शोहरीए कुंआरी हणें सबूत संघा निंईं नगरीए प्रऊल़ी आजू सैणैं सेटा, 16 तेखअ बोलै तैहा शोहरीओ बाब तिन्‍नां सैणैं का, ‘मंऐं किअ आपणीं शोहरीओ बैह एऊ मणछा संघै पर ऐबै गई एऊ अह बूरी! 17 एऊ लाऐ इहअ बोली हाम्हैं बदनाम करी कि म्हारी शोहरी निं तेऊ कुंआरी भेटी। एऊए अह गल्‍ल आसा झ़ुठी किल्हैकि तैहा गल्‍लो सबूत आसा हाम्हैं संघा आणअ द कि सह थिई कुंआरी!’ तेखअ फुआरै शोहरीए ईज-बाब तैहा च़ादरा तिन्‍नां सैणैं सम्हनै ज़ेथ प्रैंदै सह शोहरी आपणैं मर्धा संघै पैहली बैल़ी सुत्ती ती।