ज़ैहसू 6

जेरिहो नगरीओ बनाश

1 इज़राईली डरै ती जेरिहो नगरीए प्रऊल़ी हूल़ी डाही दी, नां कुंण नगरी भितरी एछी सकदअ त अर नां बागै डेऊई सकदअ त। 2 तेखअ बोलअ बिधाता ज़ैहसू लै, "जेरिहो नगरी लाई मंऐं राज़ै अर तेऊए सैना संघी तेरै बशै करी। 3 तूह अर तेरी सैना करै छ़हा धैल़ी तैणीं धैल़ नगरी फेर धैल़ीए एक फेरी दैई। 4 सात प्रोहत हांढै करारे मणशू आजू-आजू गाभे शगैठे नर्शिंगै लई। तेखअ दैऐ सातुई धैल़ी नगरी फेर सात फेरी अर तिंयां प्रोहत रहै नर्शिंगै बाज़दै लागी। 5 ज़ांऊं प्रोहत खास्सी घल़ी तैणीं कोहरै शाहै नर्शिंगै बाज़े, तेता शूणीं करै सारी परज़ा ज़ोरै-ज़ोरै ज़ै-ज़ैकार अर तेभी ढुल़णीं नगरी फेर फिरदी दुआल गोधी का धरनीं। तेखअ सका तेरी सैना ज़िधी आसा तिधा ई का तिन्‍नां सम्हनै उझै उखल़ी नगरी भितरा लै ठुर्ही।"

6 नूने शोहरू ज़ैहसू शादै प्रोहत संघा किअ तिन्‍नां लै हुकम, "बिधाते करारो मणशू च़का अर तम्हां मांझ़ै हांढा सात ज़ण्हैं रिठे सात नर्शिंगै लई तेता आजू-आजू।" 7 तेखअ किअ ज़ैहसू लोगा लै हुकम कि करारे मणशू पिछ़ू एछा नगरी फेर फेरी दैई अर अस्त्र-शस्त्रा आल़ै शूरबीर हांढा बिधाते करारे मणशू आजू।