1 आयूबै बोलअ बिल्दादा लै इहअ,

2 तंऐं भाल़ मुंह ज़िहै दुबल़ै मणछे केही राम्बल़ी

मज़त किई ज़हा तराण ई निं आथी रहै दै!

3 तंऐं दैनी बै ज़ाथी राम्बल़ी सलाह अर

तंऐं भाल़ मुंह ज़िहै कबुधी मणछा का

किहै राम्बल़ै ज्ञैन खोज़ै!

4 तंऐं ईंयां ज्ञैन शिखल़ै किधा का?

एही सैणीं गल्‍ला करनी ताखा कुंणी खोज़ी?

5 परमेशर आसा इहअ महान कि तेऊए डरै छ़ुटा

खास्सी साला पैहलै जम्परी डेऊऐ दै मणछे शाह बी दर्छ़णअ

समुंदरे थाल्‍लै अर पाणीं जैंदरी बस्सै छ़ुटा काम्मणीं।

6 परमेशर हआ जम्परी बी भाल़अ लागअ द,

तेऊ सेटा आसा सोभै ज़ैगा घुआल़ी।

7 परमेशरै आसा उतरा बाखा सरग छ़ैई डाहअ द,

पृथूई आसा तेऊ सरगै बाझ़ी थुम्हणीं टकैल़ी डाही दी!

8 घणैं बादल़ा दी पाणीं सांज़णै आल़अ आसा सह ई अर

नां पाणींए बोझ़ा करै बादल़ा फुटणै दैंदअ।

9 सह छ़ैआ ज़ोथा आजू घणैं बादल़,

संघा डाहा ज़ोथ तेथ पिछ़ू ढोपी।

10 समुंदरै बान्हीं तेऊ गोल़ रेख दैई सिअं,

संघा डाहै न्हैरअ अर प्रैश्शअ ज़ुदै-ज़ुदै करी।

11 तेऊए झांशा करै च़ुक्‍का

भ्रमंडे आथरी बी ओर्ही-पोर्ही।

12 अह आसा तेऊओ ई ज़ोर कि समुंदर बी रहअ ठुंईंअ बेशी,

अर तेथ ज़ुंण बडै-बडै करबैऊंणैं दैंत्तर ज़ीब

किऐ तेऊ आपणीं अक्ल अर समझ़ा करै खतम।

13 तेऊए शाह*26:13 शाह आत्मां करै हआ सारअ सरग निम्बल़अ,

बडी-बडी फैंखा आल़ी दानुईं ज़ुंण डैअ दैआ,

तिन्‍नां लै बाहा सह आपणैं हाथा करै थच़ अर

तिंयां हआ तेभी धरनीं पल़ी च़ित्त।

14 मंऐं खोज़ी तेऊए बारै सिधी धख ज़ेही गल्‍ला,

ज़ै लागे तेऊए बारै सारी गल्‍ला खोज़णीं तै हणीं सारी अमर खतम पर

तज़ी बी निं तेऊए महान कामें बारै खोज़ी मुक्‍कणैं!

असली दी निं परमेशरे बारै कोही का थोघ आथी

कि सह किहअ महान आसा।"