Levítico 18

6 "Ntu riyoothe o Israeli hintongose mmuchi awe wiira anrupane. Mii phi Apwiiya Nlhuku.

7 "Nhaawonye athumwaninyu wo waarupana anumwaninyu oyanreni. Nhoolhihache muru yayo phi anumwaninyu.

8 "Nhaawonye athumwaninyu wo urupa ni mmoka o mavasha aya. Yayo manyaanumwaninyu chiicho.

9 "Nhaarupane arokorinyu, akhalhe arokorinyu o irukulhu imoka ama arokorinyu ayariye ni anumwaninyu akina.

10 "Mena nhinrupane mwanchulhu inyu, mwaana a mwaamwaninyu mwanlhopwana ama mwanthiyana, ukhalhawaya nnowiichoolhiha muru mwaanene.

11 "Chiicho, nhinrupane mena mwalhi yariye ni nivasha nikina na athumwaninyu, yoyo mwanrokorinyu.

12 "Nhaarupane amaati inyu, ukhalhawaya yayo arokoraya athumwaninyu.

13 "Nhaarupane anumwaninyu olhupalhe ama aakani, ukhalhawaya yayo amuchi a anumwaninyu.

14 "Nhaarupane mahano aya athumwaninyu olhupalhe ama aakani, yayo anumwaninyu chiicho.

15 "Nhaarupane mahano o mwaamwaninyu, yayo ahokohi inyu, mahano a mwaamwaninyu. Nhaarupane mena.

16 "Nhaarupane mahano a nhimainyu ama onninyu, vavawo nnowoolhiha muru ahima inyu ama onninyu.

17 "Mwarupaka ni nthiyana paahi, mena nhinrupane mwamwanawe ama ashichulhu awe, yayo alhoko amoka. Mwaathakanihaka, nnoowonya.

18 "Nhaathelhe mavasha mahano inyu ni onnaya ama ahima aya, mena waarupana, mahano inyu anari akumi.

19 "Nhinrupane mena nthiyana vanoona awe mahuku awe o mweeri.

20 "Nhaarupane mena mahano a amwaatamana inyu, mwapangaka chiicho, nnowiinanariha mwaanene. Khannorumelhelhiya wo iphiro cho waalhapelha Apwiiya Nlhuku.

21 "Nhinkumihe mwaamwaninyu riyoothe ukhalha isadaka wa nlhuku Moleki ukhalhawaya upanga chiicho nnooruwaniha nchina naka mii Nlhuku inyu. Mii phi Apwiiya Nlhuku.

22 "Nhiruparupane mena nlhopwana nkhunaninyu thoko wiira nthiyana. Wowo phi uwonya chinene.

23 "Mena nhinrupane mwannama nkamweenanariha, nlhopwana ama nthiyana riyoothe mena hipange chiicho, upanga chiicho phi uttteka.