1 Jehanɛ ɔ, a ha mi nɔ́ susumi tso, nɛ a de mi ke, "Yaa nɛ o ya susu Mawu Sɔlemi We ɔ, kɛ he nɛ afɔle sami la tɛ ɔ ngɛ ɔ, nɛ o kane sɔmɔli ɔmɛ a yi bɔ. 2 Se o ko susu kpo ɔ nɛ ngɛ Sɔlemi We ɔ mi ɔ, ejakaa a ngɔ kɛ ha ma amɛ, nɛ maa naa Ma Klɔuklɔu ɔ hlami nyingmi eywiɛ kɛ enyɔ. 3 Nɛ i ma ngɔ he wami kɛ ha ye he odase yeli enyɔ ɔmɛ. A ma bu kpekpe nɛ a maa gba ligbi akpe kake kɛ lafa enyɔ kɛ nyingmi ekpa."

4 Kikɛmɛ a gbali enyɔ nɛ ɔmɛ ji nu tsohi enyɔ kɛ kane tsohi enyɔ ɔmɛ nɛ maa si ngɛ zugba a tsuo a Mawu ɔ hɛ mi ɔ. 5 Nɛ nɔ tsuaa nɔ nɛ maa ka kaa e maa ye mɛ awi ɔ, la maa tso kɛ je a nya mi nɛ e maa gbe lɛ. 6 A ngɛ he wami nɛ a ma nga hiɔwe nya nɛ hiɔmi be nɛe ngɛ jamɛ a jeha etɛ kɛ fa a mi benɛ a ngɛ gbae ɔ. Nɛ a ma nyɛ ha nɛ pa amɛ kɛ wo ɔmɛ ma plɛ muɔ, nɛ a ma ha nɛ a ja eko fɛɛ eko maa ba zugba a nɔ be tsuaa be nɛ a suɔ.

7 Ke a ye odase ɔ jeha etɛ kɛ fa a gbe nya a, lohwe ɔ nɛ maa je kpo kɛ je muɔ voo nɛ a nɛ e sisi ɔ mi ɔ, e ma je ta kɛ wo mɛ. E maa ye a nɔ nɛ e ma kpata a hɛ mi. 8 A gbogboehi ma pue si ngɛ Yerusalem gbɛjegbɛ ɔmɛ a nɔ, ma ngua nɛ a tsɛɛ ngɛ mumi mi ke Sodom loo Mizraim ɔ, he nɛ a sɛu a Nutsɔ ɔ ngɛ ɔ. 9 A ma si mɛ kɛ fɔ si ligbi etɛ kɛ fa, nɛ a be hae nɛ nɔ ko maa pu mɛ. Nɛ nihi maa je mahi a nɔ kɛ ba hyɛ mɛ. 10 Jamɛ a be ɔ maa pee nyami ligbi kɛ ha je ɔ tsuo. A bua maa jɔ a he nɛ a maa ke a he ni, nɛ a ma tsɛ ni yemi kɛ ni numi kpehi nɛ a kɛ nya ngɛ gbali enyɔ nɛ ɔmɛ nɛ hao mɛ saminya a a gbenɔ ɔ he.

11 Se ligbi etɛ kɛ fa a se ɔ, wami mumi nɛ je Mawu ngɔ maa ba a mi nɛ a maa te si. Gbeye maa nu nɔ tsuaa nɔ wawɛɛ. 12 Kɛkɛ ɔ, gbi ngua ko maa pɛ kɛ je hiɔwe ke, "Nyɛɛ ba hiɛ ɔ!" A maa te si ngɛ a he nyɛli ɔmɛ a hɛ mi kɛ ho hiɔwe ya ngɛ bɔ kuu mi.

13 Jamɛ a ngmlɛfia a nɔ nɔuu ɔ, zugba ma mimiɛ wawɛɛ nɛ ma a mi gbami nyɔngma mi kake hɛ mi ma kpata; nɛ nimli akpe kpaago ma gbo. Nihi nɛ piɛ ɔmɛ maa ye gbeye nɛ a maa ngɔ anunyami kɛ ha Hiɔwe Mawu ɔ.

14 Aywilɛho enyɔne ɔ ba be, nɛ nɔ́ nɛ ji etɛ ɔ nyɛɛ se nɔuu.

15 Kɛkɛ nɛ bɔfo nɛ ji kpaago ɔ kpa e bliigo ɔ, nɛ gbihi nɛ nya wa pɛ ngɛ hiɔwe ke: "Jehanɛ ɔ je nɛ ɔ mi matsɛ yemi ɔ peeɔ wa Nutsɔ ɔ kɛ e Kristo ɔ nɔ́; nɛ e maa ye matsɛ kɛ ya neneene."

16 Nɛ Nikɔtɔmahi nyingmi enyɔ kɛ eywiɛ nɛ hii si ngɛ a matsɛ sɛ ɔmɛ a nɔ ngɛ Mawu hɛ mi ɔ kpla si nɛ a ja lɛ ke, 17 "Wa ngɛ mo si nae, wa Nutsɔ Mawu Ope, mo nɔ nɛ o ngɛ, nɛ o hi si hyɛ. Ejakaa amlɔ nɛ ɔ, o ngɔ o he wami nɛ kle ɔ nɛ o bɔni matsɛ yemi. 18 Majemaje li ɔmɛ a mi mi fu mo, se amlɔ nɛ ɔ mo hu o mi mi ma fu mɛ. Be ɔ su, nɛ o maa kojo ni gbogboe ɔmɛ, nɛ o maa wo o sɔmɔli nɛ ji o gbali kɛ ni klɔuklɔu ɔmɛ, kɛ nɔ tsuaa nɔ nɛ yee mo gbeye ɔ hiɔ, nimli nguahi kɛ nimli nyafii ɔmɛ tsuo. Nɛ o ma kpata nihi nɛ puɛ zugba a a hɛ mi."

19 Kɛkɛ nɛ a bli Mawu sɔlemi tsu ɔ nya ngɛ hiɔwe, nɛ o maa na e somi daka a ngɛ mi. Hiɔwe pa la, nɛ e si; nɛ hiɔmi tɛ nɛ wawɛɛ. Zugba mimiɛ nɛ je ɔ hoso.