1 Nɛ nyakpɛ nɔ agbo ko je kpo ngɛ hiɔwe nɛ tsɔɔ níhi nɛ maa ba. I na yo ko nɛ pu ha e he, nɛ nyɔhiɔ ngɛ e nane sisi, kɛ dodoehi nyɔngma kɛ enyɔ nɛ a kɛ pee jlasi kɛ fi e yi. 2 E mi mi wa nɛ e nu kɔɔmi kɛ ngmlaa.

3 Tlukaa a, Gbeye Lohwe tsutsu agbo ko ba je kpo, kɛ e yihi kpaago, kɛ kolihi nyɔngma; nɛ e bu matsɛ pɛɛhi kpaago ngɛ e yi ɔmɛ a nɔ. 4 E hlemi ɔ gbla hiɔwe dodoe ɔmɛ kulaa a mi gbami etɛ mi kake, nɛ e ngmɛɛ a he kɛ mane zugba. E ya da si ngɛ yo ɔ nɛ miɔ nɛ e ma fɔ ɔ hɛ mi. Nɛ e pee klaalo nɛ ke e fɔ pɛ nɛ e ye bi ɔ. 5 E fɔ binyumuyo, nɔ nɛ maa ye je ɔ tsuo nɔ kɛ nine si wami. Se a ngɔ jokuɛ ɔ kɛ ho Mawu kɛ e matsɛ sɛ ɔ he ya tɛɛ. 6 Kɛkɛ nɛ yo ɔ tu fo kɛ ho nga nɔ he ko ya, he nɛ Mawu dla kɛ to lɛ nɛ e maa hyɛ e nɔ ngɛ kɛ ya si ligbi akpe kɛ lafa enyɔ kɛ nyingmi ekpa.

7 Nɛ ta te si ngɛ hiɔwe; Bɔfo Mikael kɛ bɔfohi nɛ ngɛ e sisi ɔ hwu kɛ si Gbeye Lohwe ɔ kɛ bɔfohi nɛ gbee si nɛ a ngɛ lɛ hu e sisi ɔ. 8 A ye Gbeye Lohwe ɔ nɔ nɛ a fie lɛ kɛ je hiɔwe. 9 Gbeye Lohwe nɛ ɔ ji blema sinɔ ko nɛ a tsɛɛ lɛ ke Abosiami ɔ, nɛ lɛ ji nɔ nɛ ngɛ je ɔ tsuo sisie ɔ nɛ. A fie lɛ kɛ e ta bi ɔmɛ tsuo kɛ ba zugba a nɔ.

10 Kɛkɛ nɛ i nu ngmlaa wawɛɛ ko he ngɛ hiɔwe ke, "Yi wami hemi nɛ je Mawu ngɔ ɔ, kɛ he wami kɛ matsɛ yemi ɔ kɛ nɔ yemi he wami nɛ e Kristo ɔ hɛɛ ɔ ba su hiɛ ɔ jehanɛ ɔ. Ejakaa a fie wa nyɛmi ɔmɛ a Nyapolɔ ɔ kɛ je hiɔwe kɛ ho zugba a nɔ ya. E ngɛ a nya poe daa nyɔ kɛ pia kɛ ngɛ wa Mawu ɔ hae. 11 A kɛ Tobi ɔ muɔ kɛ a odase yemi ɔ ye e nɔ kunimi. Ejakaa a di we mɛ nitsɛmɛ a wami se, nɛ a ngɔ kɛ ha ngɛ e he. 12 Oo hiɔwe ɔmɛ, kɛ nyɛ hiɔwe mi bimɛ, nyɛ nya! Nyɛ bua nɛ jɔ! Se nyɛ je ɔ mi bimɛ, kpoo ha nyɛ, Abosiami ɔ ba zugba a nɔ ngɛ nyɛ ngɔ kɛ mi mi fumi agbo, ejakaa e le kaa e be pi."

13 Benɛ Gbeye Lohwe ɔ na kaa a sake lɛ kɛ fɔ zugba a nɔ ɔ, e hao yo ɔ nɛ fɔ ɔ. 14 Se a ha yo ɔ pɛlihi konɛ e te kɛ ho nga nɔ ya, he nɛ a dla kɛ to lɛ nɛ a maa hyɛ e nɔ ngɛ, nɛ a maa bu e he kɛ je Gbeye Lohwe ɔ dɛ mi jeha etɛ kɛ fa a.

15 Nɛ nyu babauu je Gbeye Lohwe ɔ nya mi kaa pa, nɛ e fo dɔ kɛ yaa na yo ɔ bɔ nɛ pee nɛ e ngɔ lɛ kɛ ho. 16 Se zugba a ye kɛ bua lɛ, ejakaa e bli e nya mi nɛ e mii nyu ɔ! 17 Jehanɛ ɔ, Gbeye Lohwe ɔ nɛ e mi mi fu ɔ pue blɔ konɛ e ya tua yo ɔ bimɛ nɛ piɛ ɔ, nɛ ji nihi kulaa nɛ yeɔ Mawu mlaa amɛ a nɔ nɛ a deɔ ke Yesu nihi ji mɛ ɔ. 18 E daa si ngɛ mlɛe ngɛ wo kewu nɔ.