1 Nɛ i na nɛ Tobi ɔ tsɔ womi ɔ nya sɔumi níhi kpaago ɔmɛ a kekle nɔ́ ɔ, nɛ i nu nɛ hɛ kali eywiɛ ɔmɛ a ti nɔ kake ke kaa Hiɔwe simi ke, "Ba!"

2 Jehanɛ ɔ i na okpɔngɔ hiɔ ko. Nɔ nɛ hii si ngɛ nɔ ɔ hɛɛ kɛɛ, nɛ a bu lɛ jlasi. E je kpo kaa kunimi yelɔ nɛ yaa nɛ e ya ye kunimi.

3 Benɛ Tobi ɔ tsɔ nya sɔumi nɔ́ nɛ ji enyɔ ɔ nya a, i nu nɛ hɛ kalɔ enyɔne ɔ de ke, "Ba!"

4 Jehanɛ ɔ okpɔngɔ tsutsu ko je kpo, nɛ a ha e nɔ hilɔ ɔ he wami kɛ klaate agbo ko nɛ e kɛ je he jɔmi kɛ je zugba a nɔ, nɛ basabasa nɛ ba, nɛ nimli a gbe a he.

5 Benɛ Tobi ɔ tsɔ nya sɔumi nɔ́ nɛ ji etɛ ɔ nya a, i nu nɛ hɛ kalɔ nɛ ji etɛ ɔ de ke, "Ba!" Kɛkɛ nɛ i na okpɔngɔ yumu ko. Nɔ nɛ hii si ngɛ nɔ ɔ hɛɛ nɔ́ ngmɛmi nɔ́ ngɛ e dɛ mi. 6 Nɛ i nu gbi ko ngɛ hɛ kali eywiɛ ɔmɛ a kpɛti ke, "Ligbi kake hiɔwo nɛ e pee blɛfo tsesi kake, nɛ akoko tsesi etɛ hu nɛ e pee ligbi kake hiɔwo; se nu kɛ wai lɛɛ a ko ta he!"

7 Benɛ Tobi ɔ tsɔ nya sɔumi nɔ́ eywiɛne ɔ nya a, i nu hɛ kalɔ nɛ ji eywiɛ ɔ gbi ke, "Ba!" 8 I na okpɔngɔ ko nɛ hɛɛ la zu su nɛ he mi kpa. Nɔ nɛ hii si ngɛ e nɔ ɔ biɛ ji Gbenɔ. Nɛ okpɔngɔ kpa ko hu nɛ Gbeje hii si ngɛ e nɔ ɔ nyɛɛ e se. Nɛ a ngɔ zugba a mi dlami eywiɛ mi kake kɛ ha mɛ kaa a kpata e hɛ mi kɛ klaate kɛ hwɔ kɛ gbenɔ hiɔ kɛ lohwe awi yeli.

9 Kɛkɛ nɛ e tsɔ nya sɔumi nɔ́ enuɔne ɔ nya. Nɛ i na nihi nɛ a gbe ngɛ Mawu munyu ɔ fiɛmi kɛ anɔkuale odase nɛ a ye ɔ he ɔ, a klaahi ngɛ bɔ sami la tɛ ɔ sisi. 10 Nɛ a kpa ngmlaa wawɛɛ ke, "Oo Nutsɔ, mo Matsɛ Klɔuklɔu kɛ Anɔkualetsɛ, mɛni be nɛ o maa kojo nɛ o maa gbla zugba a nɔ bimɛ nɛ gbe wɔ ɔmɛ a tue?" 11 Kɛkɛ nɛ a ha a ti nɔ tsuaa nɔ tade hiɔ. Nɛ a de mɛ ke a jɔɔ a he be bɔɔ kɛ ya si be nɛ a maa gbe a nyɛmi ɔmɛ nɛ ji Yesu sɔmɔli ɔmɛ ta, kaa bɔ nɛ mɛ hu a gbe mɛ ɔ.

12 Benɛ Tobi ɔ tsɔ nya sɔumi nɔ́ nɛ ji ekpa a nya a, i na nɛ zugba hoso wawɛɛ, pu wo diblii kpii, nɛ hlami tsuɔ kaa muɔ. 13 Nɛ dodoehi tsɔ ba nɔ si kaa bɔ nɛ tso yiblii ngmlikiti wɔleɔ kɛ pueɔ si ke kɔɔhiɔ ngua ko fia a. 14 Nɛ hiɔwe ho se ya kaa womi kpo nɛ a hluɛ; nɛ yoku kɛ wo kpɔ tsuo hia kɛ je a blɔ he.

15 Kɛkɛ nɛ zugba a nɔ matsɛ ɔmɛ kɛ nimli ngua amɛ, tatsɛ ngua amɛ, niatsɛ ɔmɛ kɛ he wali ɔmɛ, nyɔguɛ ɔmɛ, odehe ɔmɛ kɛ nɔ fɛɛ nɔ ya laa a he ngɛ tɛ muɔhi a mi kɛ tɛhi a sisi ngɛ yokuhi a nɔ. 16 Nɛ a de yoku ɔmɛ kɛ tɛ sa amɛ ke, "Nyɛ ba ha wa nɔ nɛ waa laa wa he kɛ je nɔ nɛ hii si ngɛ matsɛ sɛ ɔ nɔ kɛ Tobi ɔ abofu ɔ nya. 17 Ejakaa a mi mi fumi ligbi ngua a su, nɛ mɛnɔ ma nyɛ nya maa da?"