1 Ligbi enyɔ se ɔ, a ngɛ yo kpee ngɛ Kana ngɛ Galilea, nɛ Yesu nyɛ piɛ nihi nɛ a tsɛ mɛ ɔ a he. 2 A tsɛ Yesu kɛ e kaseli ɔmɛ hu kɛ ya yo kpeemi he ɔ. 3 Nɛ benɛ yo kpeemi wai ɔ ta a, Yesu nyɛ ba de lɛ ke, "A wai ɔ ta."

4 Yesu de lɛ ke, "Maa, i be nɔ́ ko nyɛɛ ma pee ha mo amlɔ nɛ ɔ, ye okadi peemi be ɔ sui lolo."

5 Se e nyɛ ɔ de e sɔmɔli ɔmɛ ke, "Nyɛɛ pee nɔ́ tsuaa nɔ nɛ e ma de nyɛ ke nyɛɛ pee ɔ."

6 Dudɔhi ekpa maa si ngɛ lejɛ ɔ ngɛ Yuda bi ɔmɛ a he fɔmi he, nɛ paya buɛhi nyingmi enyɔ loo nyingmi etɛ yaa kake mi.

7 Yesu de sɔmɔli ɔmɛ ke, "Nyɛɛ yɛ nyu kɛ wo dudɔ ɔmɛ a mi nɛ a hyi." Benɛ a wo a mi nyu nɛ a hyi ɔ, e de mɛ ke, 8 "Nyɛɛ yɛ eko kɛ ya ha yo kpeemi nya dalɔ ɔ."

9 Benɛ yo kpeemi nya dalɔ ɔ tso nyu nɛ plɛ wai nɛ e li he nɛ a kɛ je, se sɔmɔli ɔmɛ le ɔ, e tsɛ ayɛflo huno ɔ, 10 nɛ e de lɛ ke, "Wai nɛ ɔ ngɛ kpa kulaa! Nɔ́ nɛ a pɔɔ peemi ji a kɛ wai nɛ ngɔɔ ɔ ba maa si kekle, nɛ ke ni ɔmɛ de se loko a kɛ nɔ́ nɛ ngɔɛ ɔ ba maa si haa mɛ. Se moo lɛɛ o ngɔ wai kpakpa a mohu kɛ ba nyagbe."

11 Enɛ ɔ ji kekle nyakpɛ nɔ́ nɛ Yesu pee ngɛ ma hɛ mi ngɛ Kana ngɛ Galilea kɛ tsɔɔ hiɔwe he wami nɛ e hɛɛ ɔ, nɛ e kaseli ɔmɛ he ye kaa lɛ ji Yiwamihelɔ ɔ niinɛ. 12 Enɛ ɔ se ɔ, Yesu kɛ e nyɛ kɛ e nyɛmi ɔmɛ kɛ e kaseli ɔmɛ tsuo pue nɔ kɛ ho Kapernaum ya, nɛ a ya ye ligbi bɔɔ pɛ ngɛ lejɛ ɔ.

13 Benɛ e su Yuda bi ɔmɛ a Hebemi yemi ɔ, Yesu kpale kɛ ba Yerusalem.

14 Nɛ e ba na jua yeli nɛ ngɛ nahi kɛ tohi kɛ obleku lahuɛhi juae kɛ nihi nɛ ngɛ sika tsakee ngɛ Sɔlemi We ɔ. 15 Kɛkɛ nɛ e ngɔ kpa kɛ fie jua yeli ɔmɛ tsuo kɛ to ɔmɛ kɛ na amɛ kɛ je Sɔlemi We ɔ, nɛ e gbɛ sika tsakeli ɔmɛ a sika a ngɔ fia, nɛ e tsitsɛɛ okplɔɔ ɔmɛ ngɔ fɔ si. 16 Nɛ e de obleku lahuɛ juali ɔmɛ ke, "Nyɛɛ ngɔ nɔ́ nɛ ɔmɛ kɛ je hiɛ ɔ, nyɛ ko ngɔ ye Tsɛ We ɔ kɛ pee jua nɔ."

17 Enɛ ɔ ha nɛ e kaseli ɔmɛ kai nɔ́ nɛ a ngma ngɛ Ngmami ɔmɛ a mi ke, "Mawu We ɔ he hɛ dɔ ma kpata ye hɛ mi."

18 Kɛkɛ nɛ Yuda nikɔtɔma amɛ bi Yesu ke, "Mɛni he blɔ nɛ o ngɛ nɛ o fieɔ jua yeli nɛ ɔmɛ kɛ jee Mawu We ɔ? Ke Mawu nɛ ha mo kikɛmɛ a he blɔ ɔ, lɛɛ moo pee nyakpɛ nɔ́ ko kɛ tsɔɔ wɔ nɛ waa hyɛ."

19 Kɛkɛ nɛ Yesu he nɔ nɛ e de mɛ ke, "Saminya, nyakpɛ nɔ́ nɛ ma pee ha nyɛ ji, nyɛɛ ku Sɔlemi Tsu nɛ ɔ, nɛ ma ma lɛ ekohu ngɛ ligbi etɛ mi."

20 Nɛ a de ke, "Mɛni o ngɛ tsɔɔe ɔ? Jeha nyingmi eywiɛ kɛ ekpa nɛ a kɛ ma Sɔlemi Tsu nɛ ɔ, nɛ moo lɛɛ o kɛ ligbi etɛ pɛ maa ma lɛ lo?" 21 Se e Nɔmlɔ tso ɔ ji Sɔlemi Tsu nɛ e ngɛ tsɔɔe ɔ nɛ. 22 Nɛ pee se benɛ e te si kɛ je gbeje ɔ, e kaseli ɔmɛ kai kikɛmɛ a munyu nɛ ɔ, nɛ a na kaa nɔ́ nɛ Ngmami ɔ de ngɛ e he ɔ ba mi.

23 Nɛ nihi fuu nɛ na nyakpɛ níhi nɛ e pee ngɛ Yerusalem benɛ a ngɛ Hebemi jeha a yee ɔ, he ye kaa lɛ ji Yiwamihelɔ ɔ.

24,25 Se Yesu lɛɛ e kɛ e he fɔɛ a nɔ, ejakaa e le Nɔmlɔ adesa su. Nɛ e hia we kaa nɔ ko nɛ de lɛ bɔ nɛ adesa subai tsakee ha.