1 Pee se ɔ, Yesu je e he kpo ekohu kɛ tsɔɔ e kaseli ɔmɛ ngɛ Galilea Wo ɔ nya. Nɛ bɔ nɛ e ba mi ji nɛ ɔ nɛ:

2 Kaseli nɛ ngɛ lejɛ ɔ ji, Simon Petro kɛ Toma nɛ a tsɛɛ lɛ "Hawi" ɔ kɛ Natanael nɛ je Kana ngɛ Galilea kɛ Zebedeo bi ɔmɛ kɛ e kaseli kpahi enyɔ.

3 Kɛkɛ nɛ Simon Petro de mɛ ke, "I yaa wo." Nɛ ni nɛmɛ nɛ piɛ ɔ hu ke, "Waa kɛ mo maa ya." Kɛkɛ nɛ a je wo. Se jamɛ a nyɔ ɔ mi kulaa a, a gbi nɔ́ ko. 4 Nɛ benɛ je bɔni nami ɔ, a na nɔ ko nɛ ba da si ngɛ wo ɔ nya, se a li e mi tso.

5 Kɛkɛ nɛ e tsɛ mɛ nɛ e bi mɛ ke, "Bimɛ, nyɛ gbe lo ko lo?" Nɛ a ha heto ke, "Dabi."

6 Jehanɛ ɔ e de mɛ ke, "Nyɛɛ fɔ ya a ngɛ lɛ ɔ hiɔ nɔ ma je nɛ nyɛ maa gbe lo." A ye e gbi ɔ nɔ nɛ a fɔ ya a nɛ a gbe lo babauu bɔ nɛ a nyɛ we ya a nɛ a sa.

7 Kɛkɛ nɛ kaselɔ ɔ nɛ Yesu suɔ ɔ de Petro ke, "Nutsɔ ɔ i." Amlɔ ɔ nɔuu ɔ, Simon Petro wo e tade ɔ, ejakaa e hɛɛ e he gu, nɛ e tu kɛ nɔ wo ɔ mi. 8 Se kaseli nɛ piɛ ɔmɛ tlɔ lɛ ɔ mi kɛ ba kple nɛ a ba sa ya a kɛ e mi lo ɔ kɛ ba kpo, ejakaa he nɛ a fɔ ya a ngɛ ɔ kɛ wo ɔ nya maa pee nane kami lafa etɛ.

9 Benɛ a ba kple ɔ, a na kaa a slɛ la nɛ a ngɛ lo sae nɛ abolo hu ngɛ lejɛ ɔ.

10 Nɛ Yesu de mɛ ke, "Nyɛ wo lo nɛ nyɛ gbe piɔ ɔ eko kɛ ba." 11 Simon Petro ya sa yaa kɛ ba wo ɔ nya. Nɛ lo agbohi maa pee lafa kɛ nyingmi enuɔ kɛ etɛ sɔuu ngɛ mi, se ya a gba we.

12 Jehanɛ ɔ, Yesu de mɛ ke, "Nyɛ ba ye ni." Nɛ kaseli ɔmɛ a ti nɔ ko nyɛ we nɛ e bi lɛ ke lɛ ji Nutsɔ ɔ lo; ejakaa a na paa kaa lɛ i. 13 Kɛkɛ nɛ Yesu wo abolo ɔ kɛ lo ɔ eko nɛ e dla kɛ ha mɛ.

14 Enɛ ɔ ji si etɛ nɛ e je e he kpo kɛ tsɔɔ e kaseli ɔmɛ ngɛ e si temi ɔ se.

15 Benɛ a ye ni ɔ ta a, Yesu bi Simon Petro ke, "Simon, Yohane bi, anɛ o suɔ mi pe ni nɛ ɔmɛ lo?"

Nɛ Petro he nɔ nɛ e de lɛ ke, "Ee, Nutsɔ, i suɔ mo."

Nɛ Yesu de lɛ ke, "Moo hyɛ ye to bi ɔmɛ a nɔ."

16 Yesu bi lɛ nɔ́ nɛ ji si enyɔ ke, "Simon, Yohane bi, o suɔ mi anɔkuale lo?"

Petro ha lɛ heto ke, "Ee, Nutsɔ, o le kaa i suɔ mo."

Nɛ Yesu de lɛ ke, "Moo hyɛ ye to ɔmɛ a nɔ."

17 Yesu bi Petro nɔ́ nɛ ji si etɛ ke, "Simon, Yohane bi, o suɔ mi niinɛ lo?"

E he wa ha Petro kaa Yesu bi lɛ munyu nɛ ɔ si etɛ sɔuu. Lɔ ɔ he je ɔ e de lɛ ke, "Nutsɔ, o le nɔ́ tsuaa nɔ, nɛ o le kaa i suɔ mo."

Yesu de lɛ ekohu ke, "Lɛɛ moo lɛ ye to ɔmɛ. 18 Ma de mo anɔkuale mi ke, benɛ o ngɛ nihe mi ɔ, o peeɔ nɔ́ tsuaa nɔ nɛ o suɔ, nɛ o yaa he fɛɛ he nɛ o suɔ, se ke o bwɔ ɔ, o maa bɔle o nine mi, nɛ nɔ kpa maa tsɔɔ mo blɔ, nɛ e ma kpaka mo kɛ ya he nɛ o sume." 19 Yesu de lɛ enɛ ɔ kɛ tsɔɔ gbenɔ mimi nɛ e ma gbo kɛ wo Mawu hɛ mi nyami. Kɛkɛ nɛ Yesu de ke, "Moo nyɛɛ ye se."

20 Se benɛ Petro plɛ e he ɔ, e na kaa kaselɔ ɔ nɛ Yesu suɔ ɔ nyɛɛ a se. Kaselɔ nɛ ɔ ji nɔ nɛ wo e yi ngɔ kpasa Yesu gugue mi benɛ a ngɛ ni yee ɔ, nɛ e bi lɛ ke, "Mawetsɛ, wa ti mɛnɔ maa tsɔɔ o se blɔ ɔ." 21 Nɛ Petro bi Yesu ke, "Nutsɔ, nɛ nyumu nɛ ɔ lɛɛ nɛɛ?"

22 Nɛ Yesu ha lɛ heto ke, "Ke i suɔ kaa e hi si kɛ ya si be nɛ i ma kpale kɛ ba ekohu ɔ nɛɛ, mɛni enɛ ɔ kɔɔ ngɛ o he? Moo lɛɛ moo nyɛɛ ye se."

23 Kɛkɛ nɛ munyu nɛ ɔ gbɛ fia nyɛmi ɔmɛ a kpɛti ke jamɛ a kaselɔ ɔ be gboe. Se tsa pi ja a nɛ Yesu ngɛ tsɔɔe kulaa. Nɔ́ nɛ e de ɔ ji, "Ke i suɔ kaa e hi je mi kɛ ya si be nɛ i ma ba ekohu ɔ nɛɛ, jije lɔ ɔ kɔɔ ha mo lo?"

24 Jamɛ a kaselɔ ɔ ji nɔ nɛ ye ni nɛ ɔmɛ a he odase, nɛ lɛ nɔuu ji nɔ nɛ ngma kɛ fɔ si. Nɛ wa le kaa nɔ́ nɛ e de ɔ, e ji anɔkuale.

25 Yesu pee ni kpahi fuu, nɛ e peeɔ mi kaa, ke a ke a ngma kulaa a, womi ɔmɛ maa hiɛ pe bɔ nɛ je ɔ ma nyɛ ma kɛ to.