1 Benɛ Mumi Klɔuklɔu ɔ ba kple Yesu nɔ ɔ, e kpale e se kɛ je Yordan Pa a nya nɛ Mumi ɔ kpaka lɛ kɛ ho Yudea nga a nɔ ya; 2 nɛ Abosiami ya ka lɛ ngɛ lejɛ ɔ ligbi nyingmi eywiɛ sɔuu; nɛ akɛnɛ e yi nɔ ko nɔ ko jamɛ a be ɔ mi he je ɔ, hwɔ ngɛ lɛ yee.

3 Nɛ Abosiami ba de lɛ ke, "Ke Mawu Bi ji mo ɔ, mo de tɛ nɛ ɔ nɛ e plɛ pee abolo."

4 Se Yesu ha lɛ heto nɛ e de ke, "A ngma ke, ‘Tsa pi abolo nɛ haa nɔmlɔ yi naa wami, se Mawu munyu ɔ mohu.’ "

5 Nɛ Abosiami wo lɛ kɛ kuɔ kɛ ho hiɔmi ya; kɛkɛ nɛ si kake too ɔ, e je je nɛ ɔ mi matsɛ yemi slɔɔto ɔmɛ kulaa ngɔ tsɔɔ lɛ. 6 Nɛ e de lɛ ke, "I ma wo matsɛmɛ a mahi fini nɛ ɔmɛ kɛ a mi anunyami ɔmɛ kulaa ngɔ ha mo, ejakaa ye níhi ji mɛ nɛ i ngɛ he blɔ nɛ i kɛ haa nɔ tsuaa nɔ nɛ i suɔ. 7 Ke o ma kpla si ma ja mi ɔ, enɛ ɔmɛ tsuo kulaa maa pee o nɔ."

8 Yesu ha Abosiami heto nɛ e de ke, "A ngma ke Mawu pɛ wa ngɛ he blɔ nɛ wa jaa, nɛ lɛ kɛkɛ wa sɔmɔ."

9 Enɛ ɔ se ɔ, Abosiami wo lɛ kɛ ho Yerusalem ya ngɛ Sɔlemi We ɔ yi kpɛti ploplooplo nɛ e de lɛ ke, "Ke Mawu Bi ji mo ɔ, tuu kɛ je hiɛmɛ nɛ ɔ ke ya ma si. 10 Ejakaa a ngma ke Mawu ma fa e bɔfo ɔmɛ nɛ a bu o he, 11 nɛ a maa hɛɛ mo ngɛ a dɛ mi bɔ nɛ pee nɛ o ko wo o he ya si tɛ ko."

12 Yesu ha lɛ heto nɛ e de ke, "Ngmami ɔ de hu ke, ‘Koo ka Nutsɔ o Mawu ɔ.’ " 13 Nɛ benɛ Abosiami ka lɛ ta a, e si lɛ lolo nɛ e je.

14 Enɛ ɔ se ɔ, Yesu kpale kɛ ba Galilea nɛ Mumi Klɔuklɔu ɔ he wami hyi lɛ tɔ. E kɛ we nɛ e biɛ jiji ngɛ lejɛ ɔ zugba a mi tsuo. 15 Nɛ nihi kulaa nɛ nu sɔlemi ɔmɛ nɛ e pee ngɛ kpe he ɔmɛ ɔ je e yi saminya.

16 Benɛ e ba su Nazaret he nɛ e hi ngɛ e jokuɛ mi ɔ, e ya Sɔlemi We ɔ ngɛ Hejɔɔmi Ligbi ɔ nɔ, kaa bɔ nɛ e pɔɔ peemi ɔ, nɛ e te da si nɛ e maa kane Ngmami ɔ.

17 Nɛ a wo Gbalɔ Yesaia womi ɔ ngɔ ha lɛ. Nɛ e bli womi ɔ he nɛ a ngma ngɛ ke,

18 "Nutsɔ ɔ Mumi ɔ ngɛ ye nɔ nɛ e pɔ mi nu nɛ ma fiɛ Manye Munyu ɔ ngɔ tsɔɔ ohiafohi, e tsɔ mi nɛ ma ba tsa nihi nɛ hao ɔ, nɛ ma fiɛ kɛ ha nyɔguɛ ɔmɛ kaa a maa ye a he; nɛ hɛ ngmɛ yuyuitsɛmɛ a hɛ ma bli, nihi nɛ a ngɛ mɛ nisɛ ni a ni pee ɔ, a ma kpɔ mɛ ke je a nɔ yeli ɔmɛ a dɛ mi; nɛ Mawu pee klaalo nɛ e maa gbaa nɔ tsuaa nɔ nɛ maa ba e ngɔ ɔ. 19 Nɛ ma fiɛ kaa Nutsɔ ɔ dloomi be ɔ su."

20 Kɛkɛ nɛ e nga womi ɔ nya nɛ e wo ngɔ ha sɔmɔlɔ ɔ nɛ e ho hi si. Nihi nɛ ngɛ kpe he ɔ tsuo bɔni lɛ hyɛmi gaa. 21 Nɛ e ya nɔ nɛ e de mɛ ke, "Ngmami nɛ ɔmɛ ba mi mwɔnɛ nɛ ɔ kaa bɔ nɛ nyɛ nu nɛ a kane ɔ."

22 Nihi nɛ ngɛ tsu ɔ mi ɔ tsuo ye he odase, nɛ a nya kpɛ a he ngɛ dloomi munyuhi nɛ je e nya a he. Nɛ a bi ke, "Tsa pi Yosef bi ɔ ji nɛ ɔ lo?"

23 Nɛ e de mɛ ke, "I le kaa nyɛ maa bu mi abɛ nɛ ɔ, nɛ nyɛ ma de mi ke, ‘Tsopatsɛ, mo tsa mo nitsɛ o he!’ Nɛ e sisi tsɔɔ kaa, ‘Mɛni he je nɛ i tsu we nyakpɛ nɔ ko ngɛ ami nitsɛ ye ma nɛ ɔ mi kaa bɔ nɛ i tsu ngɛ Kapernaum ɔ lo?’ 24 Se i ngɛ nyɛ dee anɔkuale mi ke bumi be gbalɔ ko he ngɛ lɛ nitsɛ e ma mi. 25 Munyu nɛ ma ngɔ tsɔɔ nya ji, nyɛ ma kai kaa ngɛ Gbalɔ Elia yi nɔ benɛ sapu yobu ɔ ba ye jeha etɛ kɛ fa sɔuu nɛ e ha hwɔ ba a, yihi nɛ a hunohi gbo ngɛ Israel jamɛ a be ɔ mi ɔ a he hiɛ; 26 se Mawu tsɔɛ Elia a ti nɔ ko ngɔ ke e ya ye kɛ bua lɛ. Se mohu Zarefat nɛ gbo ɔ e yo nɛ pi Israel no se e je Zidon ɔ, lɛ e ngɔ nɛ Mawu tsɔ Elia nɛ e ya tsu nyakpɛ ni kɛ ye kɛ bua lɛ. 27 Nyɛ ma kai hu kaa ngɛ Gbalɔ Elisha yi nɔ ɔ, hiɔ tsutsɛmɛ fuu ngɛ Israel, se a tsa we a ti nɔ ko pe Naeman nɛ ji Siria no ɔ."

28 Yesu munyu ɔ hua tsui ha ni ɔmɛ nɛ ngɛ kpe he ɔ, nɛ e pee mɛ tai hulɔ. 29 Nɛ a te si nɛ a nyɛɛ e se kɛ ho yoku ɔ he nɛ a to ma a sisi ngɛ ɔ ya konɛ a tsiɛ lɛ kɛ wo kɔ ɔ mi. 30 Se e gu a kpɛti zaa nɛ e je a he.

31 Nɛ e ba Kapernaum ngɛ Galilea, nɛ daa Hejɔɔmi Ligbi ɔ, e ya fiɛɔ nɛ e tsɔɔ ni ngɛ kpe he ɔ. 32 Nɛ hiɛmɛ nɛ ɔ hu e munyu ɔmɛ pee ni ɔmɛ nyakpɛ. Ejakaa e tuɔ munyu kɛ he wami kaa nɔ nɛ le anɔkuale ɔ, se tsa pi nɔ nɛ ngɛ nɔ́ ko nɛ nɔ ko de momo dee.

33 Ligbi ɔ ko benɛ e ngɛ ni tsɔɔe ngɛ kpe he ɔ, nyumu ko nɛ mumi yayami ngɛ nɔ́ dee ha lɛ ɔ te si nɛ e bɔni ngmlaa kpami kɛ ngɛ Yesu woe ke, 34 "Moo je hiɛmɛ nɛ ɔ nɛ o ho; wa hla we nɛ waa kɛ mo nɛ pee nɔ́ ko, mo Yesu nɛ je Nazaret ɔ. O ba nɛ o ba kpata wa hɛ mi. Wa le o mi tso kaa mo ji Mawu Bi Klɔuklɔu ɔ."

35 Se Yesu kpɔ munyu ɔ wo e nya. Nɛ e nga mumi yayami ɔ yi ke, "O nya nɛ pee dii! Moo je kpo kɛ je e mi!" Nɛ ngɛ nimli asafo ɔ hɛ mi nɔuu ɔ, mumi yayami ɔ po nɔ ɔ ngɔ fɔ si, kɛkɛ nɛ e je e mi nɛ e yi lɛ awi ko.

36 Ni ɔmɛ a nya kpɛ a he nɛ a bi ke, "Mɛni ngɛ Nɔmlɔ nɛ ɔ nya mi munyu mi nɛ haa nɛ mumi yayamihi po buɔ e munyu tue ɔ?" 37 Munyu nɛ ɔ gbɛ fia lejɛ ɔ zugba a mi tsuo. 38 Benɛ e je kpe he ɔ jamɛ a ligbi ɔ, e ho Simon we ɔ mi ya nɛ e ya na Simon nganyɛ nɛ asla yaya fia lɛ ngɔ fɔ si. Nɛ nɔ tsuaa nɔ kpa lɛ pɛɛ ke e tsa lɛ.

39 Yesu ya da si ngɛ hiɔtsɛ ɔ sa a he nɛ e nga hiɔ ɔ yi, nɛ nane ɔ nya nɔuu ɔ, yo ɔ he mi la a nya ba si nɛ e te si nɛ e sɔmɔ mɛ.

40 Jamɛ a ligbi ɔ benɛ pu nɔ si ɔ, ma a mi bi ɔmɛ tsuo wo a we mi hiɔtsɛ ɔmɛ kulaa kɛ ba Yesu ngɔ, nɛ a ti nɔ fɛɛ nɔ nɛ e ta e he ɔ, e na he wami. 41 Ni ɔmɛ a ti ni komɛ lɛɛ mumi yayami nɛ ngɛ nɔ dee ha mɛ. Yesu nga mumi yayami ɔmɛ a yi nɛ a hia kɛ je hiɔtsɛ ɔmɛ a mi kɛ ngmlaa ke, "Mo ji Mawu Bi ɔ nɛ." Nɛ akɛnɛ a le kaa lɛ ji Kristo ɔ he je ɔ, e fia a nya ma ke a pee dii.

42 E nɔ jena mɔtu mla a, e ho nga a nɔ ya. Nɛ ni ɔmɛ hla lɛ hluu kɛ ya si a ya na lɛ nɛ a kpa lɛ pɛɛ ke e ko je a he se e hi a ngɔ ngɛ Kapernaum. 43 Se Yesu ha mɛ heto nɛ e de ke, "E sa kaa ma fiɛ Matsɛyemi ɔ he Manye Munyu ɔ ngɛ he kpahi hulɔ, ejakaa jamɛ a ni tsumi ɔ he nɛ a tsɔ mi kɛ ba ngɛ."

44 Lɔ ɔ he je ɔ, e tsa e si kpami kɛ fiɛmi ɔ nɔ ngɛ kpe he ɔmɛ ngɛ Yudea he fɛɛ he.