1 Ligbi ko ɔ, e ngɛ fiɛe ngɛ Genesaret taku ɔ nya nɛ nihi fuu ba bua wo e he ngɛ Mawu Munyu ɔ tue bue. 2 Nɛ e na kaa lɛ mi guhi enyɔ ngɛ taku ɔ nya, nɛ hɛli ɔmɛ ngɛ a ya amɛ a he fɔe. 3 E sɛ lɛ ɔ kake mi nɛ e de Simon nɛ ji lɛtsɛ ɔ ke e hlui lɛ ɔ kɛ ya pa a nɔ bɔɔ bɔ nɛ pee nɛ e hi si ngɛ lɛ ɔ mi kɛ fiɛ ha asafo ɔ.

4 Benɛ e fiɛ kɛ tsɔɔ ni ɔmɛ ni ta a, e de Simon ke, "Jehanɛ ɔ lɛɛ mo hlui lɛ ɔ kɛ ya he nɛ kuɔ bɔɔ nɛ o ya pue ya a ngɛ lejɛ ɔ nɛ o maa gbe lo."

5 Simon de lɛ ke, "Mawetsɛ, wa hɛ nyɔnyɔɔnyɔ nɛ ɔ tsuo nɛ wa nɛ nɔ́ ko; se nɛ mo nɛ o de nɛ ɔ, wa ma pa ka hyɛ ha."

6 Nɛ a fɔ ya a, a gbe lo fuu nɛ ya a maa ho gbami ya. 7 Lɔ ɔ he je ɔ, a fɔ nine tsɛ lɛ mi gu kaketsɛ ɔ mi bi ɔmɛ nɛ a hlui a lɛ ɔ kɛ ba na mɛ. Nɛ bɔɔ se ɔ, lɛ enyɔ ɔmɛ tsuo hyi kɛ lo nɛ a maa ho mumi ya.

8 Benɛ Simon Petro na nɔ nɛ ba a, e ba kpla si ngɛ Yesu hɛ mi nɛ e de lɛ ke, "Mawetsɛ, moo sa kɛ ya se bɔɔ, ejakaa yayami peelɔ nɛ he tsɔ we ji mi, nɛ e sɛ nɛ ma sa kɛ su o he." 9 Ejakaa lo ɔ nɛ a gbe ɔ hiɛmi ɔ pee e kɛ e lɛ mi bi ɔmɛ kulaa a hɛ mi yaa, 10 nɛ ja a nɔuu e he piɛli Yakobo kɛ Yohane nɛ ji Zebedeo bi ɔmɛ hu a nya kpɛ a he. Yesu ha Petro heto nɛ e de lɛ ke, "Koo ye gbeye, kɛ je be nɛ ɔ mi ke yaa nɛ ɔ, o maa hɛ nimli."

11 Benɛ a ba kple ɔ, a si a lɛ ɔmɛ kɛ a mi nɔ́ tsuaa nɔ nɛ a ba nyɛɛ Yesu se.

12 Ligbi ko ɔ, Yesu ya slaa kɔpe ko nɛ e na nyumu ko nɛ ngɛ hiɔ tsu nue wawɛɛ. Benɛ nyumu ɔ na Yesu ɔ, e kpla si ngɛ e hɛ mi nɛ e wo e hɛ mi ngɔ bu si nɛ e kpa lɛ pɛɛ nɛ e de ke, "Ke o suɔ ɔ, o ma nyɛ tsa ye hiɔ nɛ ɔ ha mi nɛ ye he ma tsɔ."

13 Yesu bɔle e nine nɛ e ta hiɔtsɛ ɔ he nɛ e de lɛ ke, "I suɔ, mo na he wami." Amlɔ ɔ nɔuu ɔ, nɔmlɔ ɔ na he wami. 14 Nɛ e de lɛ ke, e ko sɛɛ nɔ́ nɛ ba nɛ ɔ ha nɔ ko, se mohu e ya amlɔ ɔ nɔuu nɛ e wo e he kɛ ya tsɔɔ osɔfo ɔ nɛ e ya sã bɔ nɛ a to ngɛ Mose mlaa a nya a, nɛ e kɛ tsɔɔ kaa e na he wami. 15 Jehanɛ ɔ Yesu biɛ pɛ ngɛ nyakpɛ ni nɛ e ngɛ tsue ɔ he nɛ nihi fuu ba e ngɔ ba bu lɛ tue; nɛ e tsa hiɔtsɛmɛ fuu. 16 Se be tsuaa be ɔ, e jee zaa kɛ yaa nga a nɔ nɛ e ya sɔleɔ.

17 Ligbi ɔ ko benɛ e ngɛ ni tsɔɔe ɔ, Farisi bi ɔmɛ ekomɛ kɛ mlaa tsɔɔli ɔmɛ ekomɛ hii si ngɛ lejɛ ɔ. E peeɔ kaa a je Galilea kɛ Yudea kɔpekɔpe ɔmɛ kɛ Yerusalem hu kɛ ba pue si ligbi ɔ. Nɛ Nutsɔ ɔ tsami mumi ɔ he wami ba e nɔ wawɛɛ.

18 Kɛkɛ benɛ a maa hyɛ ɔ, a na ni komɛ nɛ a wo nɔ ko nɛ e ku nɛ e hwɔɔ si ngɛ sa nɔ kɛ ma. A bɔ mɔde kaa a ma wo hiɔtsɛ ɔ kɛ gu ni ɔmɛ a kpɛti kɛ ba fɔ Yesu hɛ mi lo, se a nɛ blɔ. 19 Enɛ ɔ he je ɔ, a wo hiɔtsɛ ɔ kɛ kuɔ tsu ɔ nɛ a hia tsu ɔ yi mi nɛ a kple lɛ si kɛ e sa a kɛ gu lejɛ ɔ kɛ ba fɔ si ngɛ Yesu hɛ mi ngɛ ni ɔmɛ a kpɛti. 20 Benɛ Yesu na nihi nɛ wo hiɔtsɛ ɔ kɛ ba a a hemi kɛ yemi ɔ, e de hiɔtsɛ ɔ ke, "Ye huɛ, a wo o he yayami ɔmɛ ngɔ ke mo!"

21 Munyu nɛ ɔ nɛ e tu kikɛ ɔ, kɛkɛ nɛ Farisi bi ɔmɛ kɛ mlaa tsɔɔli ɔmɛ bi a he ke, "Mɛnɔ nɛ Nɔmlɔ nɛ ɔ susu kaa e ji? Musu bɔmi munyu ji nɛ ɔ nɛ! Mawu se ɔ nɛɛ, mɛnɔ hu ma nyɛ wo yayami ngɔ ke?"

22 Se Yesu le nɔ́ nɛ a ngɛ susue ɔ nɛ e ha mɛ heto nɛ e bi mɛ ke, "Mɛni he je nɛ e hine musu bɔmi munyu? 23 Te nɔ́ nɛ wa pe e nyɛmi nɛɛ, kaa a ma de ke a wo e he yayami ngɔ ke lɛ, aloo kaa a ma tsa lɛ? 24 Se jehanɛ ɔ lɛɛ i ma wo hiɔ tsami kɛ tsɔɔ nyɛ paa kaa Nɔmlɔ Bi ɔ ngɛ he wami kɛ he blɔ ngɛ zugba a nɔ nɛ e woɔ yayami kɛ kee." Kɛkɛ nɛ e plɛ nɛ e de nɔmlɔ nɛ ku kɛ pue si ɔ ke, "Moo te nɛ o wo o sa a nɛ o ho we mi ya, ejakaa a tsa mo."

25 Nɛ amlɔ ɔ nɔuu ngɛ ni ɔmɛ a hɛ mi ɔ, nɔmlɔ nɛ e ninehi kɛ e nanehi gbo ɔ te da si nɛ e wo e sa a nɛ lɛ nitsɛ e nyɛɛ kɛ ho we mi ya nɛ e ngɛ Mawu yi jee. 26 Nɔ nɛ ɔ pee nɔ tsuaa nɔ nɛ ngɛ lejɛ ɔ gbeye kɛ nyakpɛ nɛ a wo yi jemi kɛ ha Mawu nɛ a de ke, "Mwɔnɛ nɛ ɔ wa na nyakpɛ ni."

27 Nɛ pee se benɛ Yesu je ma a mi kɛ yaa a, e na jua tsulɔ ko nɛ a tsɛɛ lɛ Levi ɔ nɛ e hii si ngɛ jua tsumi he ɔ nɛ e de lɛ ke, "Moo nyɛɛ ye se." 28 Nane ɔ nɔ nɔuu nɛ Levi te si nɛ e je nɔ tsuaa nɔ he nɛ e nyɛɛ Yesu se.

29 Pee se ɔ, Levi tsɛ Yesu okplɔɔ ngɛ e we ɔ mi nɛ e tsɛ a bi jua tsuli ɔmɛ kɛ ni kpahi fuu ni yemi ɔ.

30 Se enɛ ɔ dɛ ha Farisi bi ɔmɛ kɛ mlaa tsɔɔli ɔmɛ kaa Yesu hii si nɛ e kɛ jua tsuli nɛ ji ojo fiali kɛ nimli yayami nɛ ɔmɛ ngɛ ni yee, nɛ a kã e kaseli ɔmɛ a hɛ mi saminya ngɛ enɛ ɔ he.

31 Se Yesu ha mɛ heto nɛ e de ke, "Tsopatsɛ he hia we nɔ nɛ ngɛ kpakpataa; hiɔtsɛ ɔmɛ nɛ tsopa peelɔ he hia. 32 I bɛ ngɛ dali a he, se mohu nɔ tɔli kɛ yayami peeli a he nɛ i ba ngɛ, bɔ nɛ pee nɛ a na tsui tsakemi."

33 Nɛ a pa bi lɛ ke, "Kɛ e peeɔ kɛɛ nɛ Yohane kaseli ɔmɛ kɛ Farisi bi ɔmɛ a kaseli ɔmɛ pɔɔ ngma himi kɛ sɔlemi kɛ pɛɛ kpami, se o kaseli ɔmɛ lɛɛ be tsuaa be nɛ ɔ a ngɛ ni yee nɛ a ngɛ ni nue ɔ?"

34 Yesu bi mɛ ke, "Anɛ nyɛ na nɔ ko nɛ e bua jɔ nɛ e hi ngma hyɛ lo? Nɛ mɛnɔ nɛ e hii ngma ngɛ yo kpeemi okplɔɔ he? 35 Se be ma nɛ a ma wo yotsɛ ɔ kɛ je a he nɛ jamɛ a be ɔ mi loko ji a maa hi ngma."

36 Yesu bu mɛ abɛ nɛ ɔ nɛ e de ke, "Mɛnɔ hu nɛ e woɔ bo he nya kɛ taa bo momo? Ke a pee ja a, tsa pi bo he ɔ kɛkɛ nɛ a ngɛ dae, se mohu bo ɔ he nɛ a ta a hu maa pee yayaa. 37 Nɛ nɔ ko wo we wai he kɛ wui tɔ momo mi, ejakaa ke a pee ja a, wai he ɔ ma pɛ tɔ momo ɔ nɛ wai ɔ ma pue si. 38 Wai he ɔ, tɔ he mi nɛ a kɛ woɔ. 39 Nɛ ke nɔ ko nu wai momo ɔ, e bi we wai he si hu. Nɔ nɛ a deɔ ji, ‘Wai momo hi pe wai he.’ "