1,2 Jamɛ a ligbi ɔ nɔ nɔuu ɔ, Yesu je we ɔ mi kɛ ho ya hi si ngɛ wo ɔ nya, nɛ e kɛ we nɛ nimli babauu ba bua ngɛ lejɛ ɔ. E te si ya sɛ lɛ ko mi nɛ e hi si bɔni asafo ɔ ni tsɔɔmi ngɛ wo ɔ nya. 3 E bu mɛ abɛhi fuu kaa enɛ ɔ kɛ tu mɛ munyu ke,

"Ni dulɔ ko ya du ni ngɛ e ngmɔ mi. 4 Benɛ e ngɛ ni ɔ fiae ɔ, ekomɛ ya pue blɔ tue, nɛ lohwe pɛlitsɛmɛ ba ba kukuɔ mɛ. 5 Ekomɛ hu ya pue tɛ zugba nɔ nɛ a puɛ mla mohu, 6 se akɛnɛ a nɛ zu nɛ mi kuɔ he je ɔ, benɛ pu ɔ te si ɔ, a ngla ejakaa a be sipoku. 7 Ni ɔ ekomɛ ya pue mio tsohi a mi, nɛ mio ɔmɛ gbɔɔ mɛ nɛ a gbe mɛ. 8 Se ni ɔ ekomɛ hu ya pue zugba kpakpa nɔ nɛ a wo yiblii fuu, ekomɛ nyingmi etɛ, ekomɛ nyingmi ekpa kɛ ekomɛ lafa. 9 Nɔ nɛ ngɛ tue ɔ, e nu!"

10 E kaseli ɔmɛ ba e ngɔ ba bi lɛ ke, "Mɛni he je nɛ o pɔɔ abɛ bumi kɛ munyu tumi ɔ?"

11 E he nɔ nɛ e de mɛ ke, "Nyɛɛ lɛɛ nyɛ ngɛ he blɔ nɛ nyɛ nuɔ Hiɔwe Matsɛyemi ɔ mi laami munyu ɔmɛ a sisi, sɛ ni kpa amɛ lɛɛ a be kikɛmɛ a he blɔ nɛ ɔ.

12 Ejakaa nɔ nɛ ngɛ nɔ ko ɔ, a maa ngɔ eko kɛ piɛ he ha lɛ nɛ e maa hiɛ fuu, se nɔ nɛ be eko ɔ, bɔbɔyoo ɔ nɛ e ngɛ tete ɔ a ma kpɔ ngɛ e dɛ. 13 Enɛ ɔ he je nɛ i tuɔ munyu ngɛ abɛ mi ngɛ, bɔ nɛ pee nɛ a nu, nɛ a na, se a ko nu sisi.

14 Enɛ ɔ ha Gbalɔ Yesaia gbami ɔ ba mi kaa bɔ nɛ e de ke, ‘A nu lɛɛ se a nui sisi, nɛ a na lɛɛ se a kɔ we se. 15 Ejakaa a tsui ti, nɛ a tue gbo, nɛ a ma a hɛ ngmɛ konɛ a ko hyɛ nɔ nɛ a ko nu nɔ, nɛ a nu sisi nɛ a kpale kɛ ba Mawu ngɔ nɛ e tsa mɛ.’ 16 Se nyɛɛ lɛɛ a gbaa nyɛ hɛ ngmɛ ɔmɛ, ejakaa a ngɛ nɔ́ hyɛe, kɛ nyɛ tue ɔmɛ, ejakaa a ngɛ nɔ́ nue. 17 Ejakaa anɔkuale i ngɛ nyɛ dee ke, gbali kɛ dali babauu hla kaa a ko na níhi nɛ nyɛ ngɛ nae nɛ ɔ, se a nɛ, kɛ níhi nɛ nyɛ ngɛ nue nɛ ɔ, se a nui.

18 Jehanɛ ɔ nyɛɛ bu tue nɛ ma tsɔɔ nyɛ ni dulɔ abɛ ɔ sisi. 19 Blɔ tue gbigbli he nɛ ni ɔ ekomɛ ya nɔ ɔ ji nɔ nɛ nuɔ Mawu Matsɛyemi he Manye Munyu ɔ se e nui sisi, kɛkɛ ɔ Abosiami baa ba saa nɔ nɛ a du ngɛ e tsui mi ɔ.

20 Nɛ tɛ zugba a he nɛ ni ɔ ekomɛ ya nɔ ɔ ji nɔ nɛ nuɔ Manye Munyu ɔ kɛ bua jɔmi, 21 se akɛnɛ e be sipoku ngɛ e mi ɔ, e hii si kɛkɛ; nɛ ke haomi loo yi mi wami ba ngɛ Munyu ɔ he ɔ, e ngmɛɛ Munyu ɔ he amlɔ ɔ nɔuu. 22 Nɛ mio tso zugba a he nɛ ni ɔ ekomɛ ya nɔ ɔ ji nɔ nɛ nuɔ Munyu ɔ, se je nɛ ɔ mi nyagbahi kɛ ni nami se dimi gbee Munyu ɔ nɛ e wui yiblii.

23 Zugba kpakpa mi he nɛ ni ɔ ekomɛ ya nɔ ɔ ji, nɔ nɛ nuɔ Munyu ɔ nɛ e kɔɔ se, nɛ e woɔ yiblii, ekomɛ nyingmi etɛ, ekomɛ nyingmi ekpa, kɛ ekomɛ hu lafa ngɛ Matsɛyemi ɔ mi."

24 Yesu bu mɛ abɛ kpa ko hu ke, "Hiɔwe Matsɛyemi ɔ ngɛ kaa ni dulɔ ko nɛ ya du ni kpakpa ngɛ e ngmɔ ɔ mi, 25 se benɛ nɔ tsuaa nɔ hwɔ si ɔ, e he nyɛlɔ ko ho ya du mio wuhi kɛ futu ngma nɛ e du ɔ mi nɛ e je. 26 Benɛ ngma a puɛ nɛ e bɔni wami ɔ, mio tso ɔmɛ hu bɔni wami ngɛ a kpɛti.

27 Nɛ apaa yeli ɔmɛ ba ba de ngmɔtsɛ ɔ ke, ‘Mawetsɛ, anɛ pi dumi ni kpakpa nɛ o du ngɛ o ngmɔ ɔ mi ɔ? Jije nɛ mio nɛ ɔmɛ je mɔ?’

28 E he nɔ nɛ e de mɛ ke, ‘He nyɛlɔ ko nɛ ya tsu kikɛmɛ a nɔ́ nɛ ɔ nɛ.’ Apaa yeli ɔmɛ bi lɛ ke, ‘Anɛ o suɔ kaa wa ya hiaa mio ɔmɛ ngɛ ni ɔmɛ a kpɛti lo?’

29 E ha mɛ heto ke, ‘Dabi, eko ɔ ke nyɛ ngɛ mɛ hiae ɔ, nyɛ maa hiaa ngma kpakpa a kɛ futu mi. 30 Lɔ ɔ he je ɔ, nyɛɛ ngmɛɛ mɛ tsuo a he nɛ a wa kɛ ya si ni kpami be ɔ nɛ a bua mio ɔmɛ a nya nɛ a tsɔ mɛ la, konɛ a bua ngma a hu nya nɛ a to mɛ ngɛ gba mi.’ " 31 Yesu bu mɛ abɛ kpa ke, "Hiɔwe Matsɛyemi ɔ ngɛ kaa sinapi wu nyafii nɛ a du ngɛ ngmɔ mi. 32 Sinapi wu ji dumi wu ko nɛ klee we kulaa se ke e puɛ ɔ, e waa nɛ e plɛɔ tso agbo pe kulaa nɛ lohwe pɛlitsɛmɛ baa ba maa tsuhi ngɛ e nɔ."

33 E bu mɛ abɛ kpa ko hu ke, "Hiɔwe Matsɛyemi ɔ ngɛ kaa blodo sami tsopa nɛ yo ko ngɔ kɛ futu blodo ma mi nɛ e mlɛ kɛ ya su be nɛ e ha ma a tsuo fu."

34 Yesu pɔɔ abɛ nɛ ɔmɛ bumi kɛ tuɔ munyu kɛ tsɔɔ asafo ɔmɛ. 35 Bɔ nɛ pee nɛ nɔ nɛ gbalɔ ɔ de nɛ ɔ nɛ ba mi ke, "I kɛ mɛ maa tu munyu ngɛ abɛhi a mi; ma de mɛ níhi nɛ a ngɔ laa kɛ je je ɔ sisije ɔ." 36 Kɛkɛ nɛ Yesu si asafo ɔ kɛ ba we ɔ mi. Nɛ e kaseli ɔmɛ ba e ngɔ ba de lɛ ke, "Moo tsɔɔ wɔ mio kɛ ngma abɛ ɔ sisi."

37 Nɛ e he nɔ ke, "Nɔmlɔ Bi ɔ ji nɔ nɛ du dumi ni kpakpa a nɛ. 38 Nɛ ngmɔ ɔ ji je ɔ nɛ, nɛ dumi ni kpakpa amɛ ji Matsɛyemi ɔ mi bimɛ ɔmɛ; nɛ mio ɔmɛ ji Abosiami bimɛ ɔmɛ. 39 Nɛ he nyɛlɔ nɛ ya du mio ɔ ji Abosiami; ngma kpami be ɔ ji je ɔ nyagbe ɔ, nɛ ni kpali ɔmɛ ji Mawu bɔfo ɔmɛ.

40 Nɛ kaa bɔ nɛ a bua mio ɔmɛ a nya nɛ a tsɔ mɛ la a, ja a nɔuu e maa ba mi ngɛ je ɔ nyagbe mi. 41 Nɔmlɔ Bi ɔ maa tsɔ e bɔfo ɔmɛ kɛ ba nɛ a ma ba bua nane kpatami nɔ tsuaa nɔ kɛ yayami peeli tsuo a nya kɛ je Matsɛyemi ɔ mi, 42 nɛ a maa ngɔ mɛ kɛ wo la nɛ ngɛ tsoe glegleegle ɔ mi. Lejɛ ɔ ya fomi kɛ lungu nya kpemi maa hi. 43 Nɛ dali ɔmɛ ma kpɛ kaa pu ngɛ a Tsɛ Matsɛyemi ɔ mi. Nɔ nɛ ngɛ tue ɔ, e nu!

44 Hiɔwe Matsɛyemi ɔ ngɛ kaa june nɛ a ngɔ kɛ laa ngɛ ngmɔ ko mi nɛ nɔ ko ya hiɛ. Nɛ benɛ e na june ɔ, lɛ hu e ngɔ kɛ laa ekohu; nɛ e bua nɛ jɔ sɔuu ɔ, e ho ya jua níhi tsuo nɛ e ngɛ ɔ nɛ e na sika bɔ nɛ sa nɛ e kɛ ya he jamɛ a ngmɔ ɔ konɛ e nine nɛ su june ɔ nɔ.

45 Jehanɛ ɔ hu, Hiɔwe Matsɛyemi ɔ ngɛ kaa jua yelɔ ko nɛ ngɛ june kpakpa hlae. 46 Benɛ e ya na june kake nɛ he jua wa a, e ho nɛ e ya jua nɔ tsuaa nɔ nɛ e ngɛ ɔ nɛ e kɛ he.

47 Jehanɛ ɔ hu, Hiɔwe Matsɛyemi ɔ ngɛ kaa ya nɛ a fɔ ngɛ wo mi nɛ e gbe lo slɔɔtohi, nɔ nɛ hi kɛ nɔ nɛ hi tsuo eko. 48 Nɛ benɛ ya a hyi ɔ, a sa lɛ kɛ ba wo dɔ ɔ mi nɛ a hi si wo he nɛ a bua lo kpakpa amɛ a nya kɛ wo gogahi a mi kɛkɛ nɛ a sake lo nɛ hí ɔmɛ ngɔ pue he. 49 Kikɛ ɔ nɔuu e maa ba mi ngɛ je ɔ nyagbe mi, hiɔwe bɔfo ɔmɛ maa ba nɛ a ma ba hla nimli yayami ɔmɛ ngɛ dali ɔmɛ a kpɛti, 50 nɛ a ma sake yayami peeli ɔmɛ kɛ wo la glegleegle mi, nɛ lejɛ ɔ ya fomi kɛ lungu nya kpemi maa hi." 51 Yesu bi mɛ ke, "Anɛ nyɛ nu ni nɛ ɔmɛ tsuo a sisi lo?" Nɛ a he nɔ ke, "Ee, Mawetsɛ."

52 Nɛ e de mɛ ke, "Enɛ ɔ he ɔ, mlaa Tsɔɔlɔ fɛɛ mlaa Tsɔɔlɔ nɛ a pee lɛ ye kaselɔ ɔ, e ngɛ june enyɔ, Somi Momo ɔ mi nɔ kɛ Somi He ɔ mi nɔ ɔ."

53 Benɛ Yesu gbe abɛ ɔmɛ a bumi nya a, e je lejɛ ɔ 54 nɛ e kpale kɛ ba lɛ nitsɛ e ma mi Nazaret ngɛ Galilea nɛ e ba tsɔɔ mɛ ni ngɛ kpe he ɔ. E nile kɛ okadihi nɛ e pee ɔ ha a nya kpɛ a he nɛ a bi ke, "Jije Nɔmlɔ nɛ ɔ ya na nile kɛ nyakpɛ he wami ni nɛ ɔmɛ ke je?

55 Anɛ tsa pi kapitɛ ɔ bi ɔ ji nɛ ɔ lo? Anɛ tsa pi e nyɛ nɛ a tsɛɛ ke Maria a kɛ e nyɛmimɛ nyumuhi Yakobo kɛ Yosef kɛ Simon kɛ Yuda a? 56 Nɛ e nyɛmiyi ɔmɛ, anɛ pi waa kɛ mɛ tsuo nɛ ngɛ hiɛ ɔ? Jije nɛ e ya na nile nɛ ɔ kɛ je mɔ?" 57 Kɛkɛ nɛ a mi mi fu lɛ. Se Yesu de mɛ ke, "A woɔ gbalɔ hɛ mi nyami ngɛ he fɛɛ he, se pi ngɛ lɛ nitsɛ e ma mi kɛ e we bimɛ a kpɛti." 58 Akɛnɛ a he we yi he je ɔ, e pee we nyakpɛ ni fuu ko ngɛ lejɛ ɔ.