1 Ligbi ko ɔ, benɛ nihi fuu bɔni a he nya buami ɔ, Yesu kɛ e kaseli ɔmɛ je kɛ ho yoku ko nɔ ya, nɛ benɛ a ya hi si ɔ, 2 e tsɔɔ mɛ ni ke,

3 "A gbaa nihi nɛ baa a he si, ejakaa a nɔ ji Hiɔwe Matsɛyemi ɔ. 4 A gbaa nihi nɛ ngɛ kɔmɔ yee, ejakaa a maa jɔɔ a bua. 5 A gbaa nihi nɛ a he jɔ, ejakaa a nɔ ji je ɔ tsuo.

6 A gbaa nihi nɛ dami sane yemi he hwɔ kɛ kuma yee mɛ, ejakaa a maa tɔ. 7 A gbaa nihi nɛ a mi jɔ nɛ a naa mɔbɔ, ejakaa a maa na mɛ mɔbɔ. 8 A gbaa nihi nɛ a tsui mi tsɔ, ejakaa a maa na Mawu. 9 A gbaa nihi nɛ kpataa pɛ, ejakaa a ma tsɛ mɛ Mawu bimɛ. 10 A gbaa nihi nɛ a ngɛ mɛ yi kpɛti wae ngɛ a kpakpa peemi he, ejakaa a nɔ ji Hiɔwe Matsɛyemi ɔ.

11 A gbaa nyɛ ke a jɛ nyɛ nɛ a wa nyɛ yi mi nɛ a ngɔ nya kɛ po nyɛ nya ngɛ ye he, ejakaa ye se nyɛɛli ji nyɛ ɔ. 12 Nyɛ nya nɛ nyɛ bua nɛ jɔ, ejakaa hiɔwo agbo ko fɔɔ si ha nyɛ ngɛ hiɔwe; nɛ nyɛ kai kaa ja a nɔuu nɛ a wa blema gbali ɔmɛ yi mi.

13 Nyɛ ji ngo ngɛ zugba a nɔ. Ke nyɛ nya nyu gbo ɔ, kɛ je ɔ maa pee kɛɛ? Ke e ba mi ja a, a ma sake nyɛ ngɔ pue he nɛ a maa naa nyɛ nɔ kaa nɔ́ ko nɛ se nami be he. 14 Nyɛ ji la nɛ ngɛ kpɛe ha je ɔ tsuo, nɛ nyɛ ngɛ kaa ma nɛ maa si ngɛ yoku nɔ. 15 Nyɛ ko wo nyɛ la a kɛ laa, se mohu nyɛ je lɛ kpo nɛ e tso ha nɔ tsuaa nɔ. 16 Nyɛ ha nɛ a na nyɛ ni kpakpa peemi ɔmɛ nɛ a je nyɛ tsɛ nɛ ngɛ hiɔwe ɔ yi.

17 Nyɛ ko susu kaa Mose mlaa amɛ kɛ gbali ɔmɛ a si womi ɔmɛ a gumi he nɛ i ba ngɛ. Dabi, i ba nɛ ma ba fi mlaa amɛ a se nɛ ma ha si womi ɔmɛ a ba mi. 18 Anɔkuale nɛ i ngɛ nyɛ dee ke, a ma tsu mlaa tsuaa mlaa he ni kaa bɔ nɛ e ngɛ mlaa womi ɔ mi ɔ kɛ ya si be nɛ a maa gbe nɔ́ tsuaa nɔ nya. 19 Enɛ ɔ he je ɔ, ke nyɛ ti nɔ ko tɔ mlaa amɛ a ti nyafii ko nɔ nɛ e tsɔɔ ni kpahi hu nɛ a pee ja a, Jamɛ a nɔmlɔ ɔ maa pee nyafii pe kulaa ngɛ Hiɔwe Matsɛyemi ɔ mi. Se nihi nɛ tsɔɔ Mawu mlaa amɛ nɛ a yeɔ a nɔ ɔ, a maa pee agbo ngɛ Hiɔwe Matsɛyemi ɔ mi.

20 Se i ngɛ nyɛ si woe kaa ja nyɛ dami kle pe Farisi bi ɔmɛ kɛ Yuda nikɔtɔma amɛ a nɔ́, ke pi ja a, nyɛ be Hiɔwe Matsɛyemi ɔ mi nyɛe maa sɛ."

21 "A de nyɛ ngɛ Mose mlaa a nya ke, ‘Ke nɔ ko gbe nɔ ko ɔ, e sa nɛ a gbe lɛ hu.’ 22 Se ami lɛɛ i ngɛ nyɛ dee ke, a maa kojo nɔ nɛ ma na e nyɛmi he abofu tete; ja a nɔuu nɛ a maa kojo nɔ nɛ ma jɛ e nyɛmi ke yaka nɔmlɔ ji lɛ ɔ. Nɛ a maa bu nɔ nɛ maa gbiɛ e nyɛmi ɔ la gbenɔ fɔ.

23 Enɛ ɔ he je ɔ, ke nyɛ ti nɔ ko yaa sã bɔ ha Mawu, nɛ e kai ngɛ bɔ sami la tɛ ɔ he kaa e kɛ e nyɛmi ko ngɛ pɛe ɔ, 24 e je bɔ sami ni ɔmɛ a he ngɛ lejɛ ɔ nɛ e ya nɛ e kɛ e pɛlɔ ɔ ya dla loko ji e kpale ba sã bɔ ɔ kɛ ha Mawu. 25 O kɛ o pɛlɔ ɔ nɛ dla mla; se ke pi ja a, e ma wo mo kɛ ho kojomi he ɔ ya nɛ a maa wo mo tsu mi. 26 Nɛ i ngɛ mo dee ke o maa hi tsu ɔ mi kɛ ya si be nɛ o maa wo hiɔ nɛ a bɔ mo ɔ tsuo."

27 "Mose mlaa a de ke, ‘Koo bɔ ajuama.’ 28 Se i ngɛ nyɛ dee ke, nɔ nɛ maa hyɛ yo nɛ e hɛ maa kɔ e nɔ ɔ, e bɔ ajuama ngɛ e tsui mi momo. 29 Enɛ ɔ he je ɔ, ke o hɛ ngmɛ nɛ haa o hyɛɔ nɔ́ ɔ tete nɛ haa o peeɔ yayami ɔ, moo hia lɛ nɛ o sake lɛ kɛ fɔ he, ejakaa e fani kaa o nɔmlɔ tso ɔ he ko ma puɛ pe nɔ́ nɛ a ma sake o nɔmlɔ tso ɔ tsuo kɛ fɔ Abosiami la mi. 30 Ja a nɔuu ke o hiɔ nine tete po haa nɛ o peeɔ yayami ɔ, moo po lɛ nɛ o sake lɛ kɛ fɔ Abosiami la mi."

31 "Mose mlaa a de ke, ‘Ke nɔ ko ngɛ hlae nɛ e ngmɛɛ e yo he ɔ, e ha lɛ fiemi womi.’ 32 Se i ngɛ nyɛ dee ke, ke nɔ ko fie e yo nɛ tsa pi ajuama bɔmi he i ɔ, ke yo ɔ ya gba ekohu ɔ, lɛ nɛ e ha nɛ yo ɔ bɔ ajuama; nɛ nɔ nɛ maa ngɔ jamɛ a yo ɔ nɛ e huno fie lɛ ɔ, lɛ hu e bɔ ajuama."

33 "Mose mlaa a de hu ke, ‘Mo ko tɔ si nɛ o wo Mawu ɔ nɔ, se mohu o ye kulaa nɔ pɛpɛɛpɛ.’ 34 Se ami lɛɛ i ngɛ nyɛ dee ke, nyɛ ko ka kita ko! Nyɛ ko ka hiɔwe tete, ejakaa Mawu Matsɛyemi sɛ ji hiɔwe ɔ nɛ. 35 Nɛ nyɛ ko de hu ke, ‘I na zugba’, ejakaa Mawu nane ma he ji zugba a nɛ. Ja a nɔuu nɛ e sɛ kaa nyɛ kaa Yerusalem, ejakaa Matsɛ agbo ma ngua i. 36 Nyɛ ko ka kita nɛ nyɛ de ke, ‘I na ye yi!’ Ejakaa nyɛ be nyɛe ma plɛ yi bwɔmi kake futaa loo yumuu. 37 Nyɛ ha sane heto nɛ nyɛ de kɛkɛ ke, ‘Ee’, loo ‘Dabi’. Nya mi munyu kɛkɛ hiɛ, Nɛ kaa o ma ka kita kɛ fɔ si womi nɔ ɔ, e tsɔɔ kaa nɔ́ ko dɛ."

38 "Mose mlaa amɛ eko deɔ ke, ‘Ke nɔ ko hia e nyɛmi e hɛ ngmɛ loo e lungu ɔ, lɛ hu e hia e nɔ kɛ to nane mi.’ 39 Se ami lɛɛ i ngɛ nyɛ dee ke, nyɛ ko ngɔ yayami kɛ to yayami nane mi. Ke nɔ ko gba o tue mi hiɛ ɔ, mo plɛ lejɛ ɔ hu ha lɛ nɛ e gba. 40 Nɛ ke a nu mo kɛ ho kojomi he ya nɛ a kpɔ o sisi tade ɔ, moo ngɔ o hiɔwe tade ɔ hu ngɔ piɛ he ha mɛ. 41 Nɛ ke sojahi nyɛ o nɔ ke o tloo a ta hwumi níhi ha mɛ kɛ ya si tomi he kake ɔ, moo tloo kɛ ya si tomi he enyɔ. 42 Ke nɔ ko bi nyɛ nɔ́ ko ɔ nyɛ ha lɛ, nɛ nɔ́ palɔ hu nyɛ ko nyɛ lɛ nɔ́ he."

43 "Nyɛ nuɔ nɛ a deɔ ke, ‘Moo suɔ o huɛmɛ nɛ o nyɛ o he nyɛli.’ 44 Se i ngɛ nyɛ dee ke, Nyɛɛ suɔ nyɛ he nyɛli nɛ nyɛɛ sɔle ha nihi nɛ peeɔ nyɛ yayami ɔ. 45 Ke nyɛ pee ja a, e tsɔɔ kaa hiɔwe Tsɛ ɔ bimɛ ji nyɛ niinɛ. Ejakaa e haa nɛ pu tsoo kɛ haa nimli yayamihi kɛ nimli kpakpahi tsuo, nɛ e haa hiɔmi nɛɛ kɛ haa dali kɛ yayami peeli tsuo. 46 Mɛni hiɔwo nɛ nyɛ ma na ke nyɛ suɔ nihi nɛ suɔ nyɛ? Ejakaa yayami peeli hu peeɔ ja a nɔuu. 47 Ke nyɛ suɔli kɛkɛ a sane nyɛ suɔ kaa bɔ nɛ yayami peeli ɔmɛ peeɔ ɔ, lɛɛ mɛni mi gbami ngɛ nyɛɛ kɛ mɛ nyɛ kpɛti? 48 E sa nɛ nyɛɛ lɛɛ nyɛɛ hi kɛ pi si kaa bɔ nɛ nyɛ hiɔwe Tsɛ ɔ hi kɛ pi si ɔ."