1 Nyɛmi nɛ e hemi kɛ yemi gbɔjɔ ɔ, nyɛ he lɛ atuu kɛ wo nyɛ kpɛti, nɛ nyɛ ko kojo lɛ ngɛ e ni peemi níhi a he. 2 Nɔ ko hemi kɛ yemi haa lɛ he blɔ nɛ e yeɔ nɔ́ tsuaa nɔ, se nɔ nɛ e hemi kɛ yemi gbɔjɔ ɔ, lɛɛ ba pɛ e yeɔ. 3 Enɛ ɔ he je ɔ, nɔ nɛ yeɔ nɔ́ tsuaa nɔ ɔ, e ko gbe nɔ nɛ yi ɔ he guɛ. Nɛ nɔ nɛ yeɔ ba hu ɔ, e ko kojo nɔ nɛ yeɔ nɔ́ tsuaa nɔ ɔ, ejakaa Mawu bimɛ ji mɛ tsuo. 4 Jamɛ a ni ɔmɛ ɔ, Mawu sɔmɔli ji mɛ, tsa pi mo o nihi ji mɛ; ja he je ɔ, o be he blɔ nɛ o kojoɔ mɛ. Moo lɛɛ moo ngmɛɛ nɔ nɛ yeɔ a nɔ ɔ he nɛ e tsɔɔ mɛ nɔ́ nɛ da kɛ nɔ́ nɛ dɛ; ejakaa Mawu ngɛ he wami nɛ e haa nɛ a peeɔ nɔ́ nɛ sa kaa a pee.

5 Ni komɛ susu kaa Yuda bi ɔmɛ a he jɔɔmi ligbi ɔmɛ ji be titli komɛ a nɔ nɛ e sa kaa a ja Mawu, nɛ ni komɛ hu deɔ ke e sɛ kaa a peeɔ ja, ejakaa Mawu ngɛ he wami ngɛ ligbi fɛɛ ligbi nɔ. Ma suɔ nɛ nyɛ ti nɔ tsuaa nɔ nɛ e pee lɛ nitsɛ e juɛmi ngɛ nɔ́ nɛ ɔmɛ a he. 6 Ke nyɛ ngɛ ligbi titli komɛ a nɔ nɛ nyɛ jaa Mawu ɔ, lɛɛ e hɛ mi nyami nɛ nyɛ ngɛ woe; nɛ e ji nɔ́ kpakpa nɛ nyɛ ngɛ pee. Ja a nɔuu kɛ nɛ nɔ ko nɛ yeɔ wɔ nya lo ɔ hu naa Nutsɔ ɔ si, nɛ e ji nɔ́ nɛ da. Nɛ nɔ nɛ yi wɔ nya lo ɔ hu woɔ Nutsɔ ɔ hɛ mi nyami nɛ e naa lɛ si. 7 Wa ti nɔ ko be lɛ nitsɛ e nɔ he wami nɛ e ma de ke e maa hi je mi aloo e ma gbo. 8 Wami mi jio, gbenɔ mi jio, Nutsɔ ɔ bimɛ ji wɔ. 9 Enɛ ɔ he je nɛ Kristo gbo nɛ e te si kɛ je gbeje ngɛ konɛ e pee wa Nutsɔ ngɛ wa wami kɛ gbenɔ mi.

10 Moo lɛɛ o be he blɔ nɛ o kojoɔ o nyɛmi aloo o gbee e he guɛ. Nyɛ kai kaa wa ti nɔ tsuaa nɔ maa da Mawu Kojomi Sɛ ɔ hɛ mi. 11 Ejakaa a ngma ke, Nutsɔ ɔ de ke, "Si abɔ nɛ ye hɛ ngɛ nɛ ɔ, nakutso fɛɛ nakutso ma kpla si ha mi nɛ lilɛ fɛɛ lilɛ maa jaje e he yayami kɛ tsɔɔ Mawu." 12 Wa ti nɔ tsuaa nɔ maa bu lɛ nitsɛ e he akɔtaa kɛ ha Mawu. 13 Ja a he je ɔ, nyɛ kpa nyɛ he kojomi. Se mohu nyɛɛ ba nyɛ je mi saminya bɔ nɛ pee nɛ nɔ́ ko nɛ nɔ ko susu kaa e hí ɔ, e ko na mo nɛ o ngɛ pee.

14 Ami lɛɛ i he ye ngɛ Nutsɔ Yesu he wami nya kaa ke nɔ ko ye lohwe nɛ a gbe kɛ ha wɔhi ɔ, jamɛ a nɔ ɔ pee we tɔmi. Se ke nɔ ko he ye kaa e peeɔ tɔmi ɔ, lɛɛ e ko ye, ejakaa e maa pee tɔmi ha lɛ. 15 Nɛ ke o niye ni haoɔ o nyɛmi se o kpa we yemi ɔ, lɛɛ o bɛ o je mi ngɛ suɔmi mi. Mo ko ha nɛ o nya ngma nɛ o yeɔ ɔ nɛ e tɔtɔ nɔ ko nɛ Kristo gbo ha lɛ ɔ nane. 16 Ke kpakpa nɛ nyɛ ngɛ pee po ɔ, nyɛɛ pee bɔ nɛ a be nyɛ he munyu tue. 17 Ejakaa tsa pi ni yemi kɛ ni numi nɛ peeɔ wɔ Kristo se nyɛɛli, se mohu kpakpa peemi, he jɔmi kɛ bua jɔmi nɛ wa naa kɛ jee Mumi Klɔuklɔu ɔ mi ɔ. 18 Ke nyɛ ha he blɔ nɛ Kristo ye nyɛ nɔ matsɛ ngɛ nɔ́ nɛ ɔmɛ a mi ɔ, Mawu bua maa jɔ nyɛ he, nɛ nihi hu maa suɔ nyɛ. 19 Ja a he je ɔ, nyɛ ha nɛ waa di kake peemi se, nɛ waa ye kɛ bua wa nyɛmimɛ nɛ a nane nɛ pi si ngɛ asafo ɔ mi.

20 Nyɛ ko puɛ Mawu ni tsumi ɔ ngɛ lo kpɔ kake loo nya ngma he. Nyɛ kai kaa tɔmi ko be jamɛ a lo ɔ loo niye ni ɔ he, se e ji tɔmi kɛ ha nɔ nɛ yeɔ nɛ e kɛ tɔtɔɔ nɔ ko nane ɔ. 21 E hi kaa o ko ye lo aloo o ko nu wai aloo o ko pee nɔ́ ko nɛ e hí kɛ ha o nyɛmi, aloo e maa tɔtɔ e nane.

22 Ke o le kaa nɔ́ nɛ o ngɛ pee ɔ pi nɔ́ yaya ngɛ Mawu hɛ mi tete ɔ, mo ko je kpo kɛ tsɔɔ nihi nɛ e maa hao mɛ ɔ. A jɔɔ nɔ nɛ e kpakpa peemi ya pee we yayami kɛ ha we nɔ kpa. 23 Nɛ nɔ tsuaa nɔ nɛ heɔ yeɔ kaa nɔ́ nɛ e ngɛ hlae nɛ e pee ɔ e dɛ ɔ, e ko pee. E peeɔ yayami kɛ ha lɛ ke ji e pee, ejakaa e susu kaa e dɛ. Enɛ ɔ he je ɔ, nɔ́ fɛɛ nɔ nɛ e maa pee nɛ pi nɔ́ nɛ e susu kaa e da a, e ji yayami.