1 O Samson fuljisto tele ando gav Timna thaj okote dikhas jek manušnja savi sas Filistejka.

2 Kana bolda pe ćhere, phendas pire dadešće thaj pire dejaće: "Ande Timna dikhlem jek Filistejka. Anen lat manđe pale romnji."

3 Ali lesko dad thaj lešći dej phendine lešće: "Naj li čheja maškar amaro pleme thaj ande sasto amaro them? Pa moraš te les tuće romnja maškar e biobrezime Filistejcurja?"

Ali o Samson phendas pire dadešće: "Lat anen manđe, kaj voj si okoja pravo pale mande."

4 E Samsonesko dad thaj lešći dej či džangline kaj si godova katar o GOSPOD, savo rodas prilika te džal pe Filistejcurja save ande godoja vrjama vladinas pe Izraelcurja.

5 Gajda o Samson đelo pire dejava thaj pire dadesa tele ande Timna. Kana aresline dži ke vinogradurja paše Timna, katar jekhvar angle leste inkljisto jek terno lavo savo ričilas thaj huklo pe leste. 6 Askal o Duho e GOSPODESKO mukla pe po Samson thaj vo nanđe vastenca rastrgnisardas e lave sago kaj si buznjori. Ali ni pire dadešće ni e dejaće či phendas so ćerda. 7 Pale godova đelo ke okoja manušnji thaj ćerda svato lasa, voj sas palo Samson okoja pravo.

8 Kana nakhla varekozom đesa bolda pe pale late te lel lat romnjaće, banđardas katar o drom te dićhel okole mule lave, a okova ando mulo lavo rojo biromnja thaj medo. 9 E vastenca lija o medo thaj halas e dromesa. Kana areslo dži ke lesko dad thaj lešći dej, dija vi len pa vi von haline. Ali vo či phendas lenđe kaj si o medo andar o mulo lavo.

10 Lesko dad đelo te dićhel okole manušnja, a o Samson okote pripremisardas e gozba, sago kaj sas o običaj. 11 Kana e Filistejcurja dikhline les, dine les trijanda manuša te aven uz leste.

12 Askal o Samson phendas godole manušenđe: "Si man jek zagonetka pale tumende. Ako rešin les pale efta đes dok si e gozba, dava tumen trijanda lanene gada thaj trijanda svečane haljine. 13 Ali ako naštik rešin lat, tumen manđe dena trijanda lanene gada thaj trijanda svečane haljine."

Von phendine lešće: "Phen amenđe e zagonetka te ašunas."

14 Thaj vo phendas lenđe:

"Andar okova savo hal inkljisto o habe,

andar okova savo si zuralo inkljisto o guglo."

Nakhlo trin đes, a von naštik rešisardine e zagonetka.

15 O štarto đes phendine lešće romnjaće: "Crde katar ćiro rom o rešenje pale zagonetka pa phen amenđe. Ako či ćeres godova, dasa jag vi tut thaj vi sasto ćher ćire dadesko. Dali akhardine amen te čoren amendar?"

16 E Samsonešći romnji avili angle leste thaj rovelas thaj phenelas lešće: "Tu mrzis man thaj uopšte či volis man. E manušenđe andar mungro gav dijan zagonetka, a manđe či phendan o rešenje."

O Samson phendas laće: "O rešenje či phendem ni mungre dadešće thaj mungre dejaće, sostar phendemas tuće?"

17 Voj gajda rujas angle leste dži ke eftato đes e gozbako. Zurale navalilas te phenel laće, gajda o eftato đes phendas laće o rešenje pale zagonetka, a voj o rešenje phendas pire manušenđe.

18 O eftato đes, majsigo nego so inkljisto o kham, e manuša andar okova gav phendine e Samsonešće:

"So si majguglo katar o medo?

So si majzuralo katar o lavo?"

A vo phendas lenđe:

"Te či orisardine mungre terne gurumnjasa,

mungri zagonetka či rešisardinesas."

19 Askal o Duho e GOSPODESKO mukla pe po Samson, pa vo đelo ando gav Aškelon thaj mudardas trijanda manušen. Lija e drze lendar thaj dija len okolenđe save pogodisardine e zagonetka. Pale godova pherdo holji bolda pe ande pire dadesko ćher. 20 A e Samsonešće romnja dine jećhešće katar okola manuša savo sas pe lešće svaturja ćirvo.