1 Ande godoja vrjama ando Izrael nas caro. A jek Levito, savo trajilas sago došljako ando duralo krajo pe Efremešće gore, lijas pešće romnja-ropkinja andar o Vitlejem ande Juda. 2 Voj jekhvar holjajli pe leste, pa zato mukhla les thaj bolda pe ando ćher ke piro dad ando Vitlejem ande Juda. Posle štar čhon, 3 lako rom avilo te nagovoril lat te boldel pe lešće. Pesa anda jećhe slugo thaj duj magarconen.

Voj anda pire romes ando ćher pire dadesko, a kana lako dad dikhla les, radosno primisarda les. 4 Lesko sokro nagovorilas les te ačhel leste thaj vo ačhilo trin đes. Okote hanas, pijenas thaj raćarenas. 5 Štarto đes uštiline rano detharin thaj o Levito spremolas pe te teljarel po drom.

Askal lesko sokro phendas lešće: "Ha prvo vareso thaj posle dža."

6 Gajda von duj džene bešline te zajedno han thaj te pijen.

Lesko sokro phendas lešće: "Moliv tut, ačh vi arjat thaj veseli tut."

7 O Levito već spremolas pe te teljarel po drom, ali lesko sokro nagovorisarda les te ačhel thaj vo ačhilo vi godoja rjat.

8 Kana pandžto đes uštilo te teljarel po drom, lesko sokro phendas lešće: "Ha vareso thaj ačh dži ko posle mismeri."

Gajda von duj džene palem hanas zajedno.

9 Detharinako o Levito spremolas pe te teljarel po drom, pire romnjasa ropkinjasa thaj pire slugos. Lesko sokro, lešće romnjako ropkinjako dad, phendas: "Ake, uskoro perela e rjat. Ačh još jek rjat. O đes samo so či nakhlo, raćaren akate thaj veseli tut, a thejara ušten rano, pa teljaren po drom ćhere."

10 Ali o Levito či kamla te ačhel još jek rjat, nego spremisajlo thaj teljarda duje osedlime magarconenca thaj pire romnjasa ropkinjasa. Aresline dži ko gav Jevus, godova si o Jerusalim. 11 Kana sas paše ko Jevus, o đes već sas dži ko krajo, pa o sluga phendas pire gospodarešće: "Ajde te džas ande akava Jevusejengo gav thaj raćaras ande leste."

12 Lesko gospodari phendas lešće: "Či das ando gav ke tuđincurja, kaj či trajin e Izraelcurja. Džas majdur dži ko gav Giva." 13 Thaj još phendas e slugašće: "Ajde te džas pe varesavo aver than. Raćarasa ando gav Giva ili ande Rama."

14 Gajda džanas majdur. O kham već pelo kana von sas paše ko gav Giva ande Venijaminešći phuv, 15 pa đele okote te raćaren. Avile po gavesko trgo thaj bešline, ali khonik či primisarda len ande piro ćher te raćaren.

16 Askal avilo varesavo phuro manuš savo boldelas pe katar e bući andar e njiva. Vo sas katar e Efremešće gore, ali sago došljako trajilas ande Giva, kaj trajilas o Venijaminesko pleme.

17 O phuro manuš dikhla e putnikones pe gavesko trgo thaj phučla les: "Kaj džas thaj katar aves?"

18 A o Levito phendas lešće: "Avas andar o Vitlejem savo si ande Judako krajo. Akana džas ando duralo krajo pe Efremešće gore, kaj me sem okotar. Avav andar o Vitlejem andar e Judako krajo thaj džav ando Šator e GOSPODESKO, ali naj khonik te primil man ande piro ćher. 19 Amen, ćire slugen, si vi sulum thaj hamasko pale amare magarcurja, mangro thaj mol pale mande, pale mungri romnji ropkinja thaj palo sluga savo si amenca. Khanči či trubul amen."

20 O phuro manuš phendas lešće: "Lačhe avilan ande mungro ćher, me dava tumen sa so trubul tumen, samo na te raćares pe gavesko trgo."

21 Gajda inđarda les ande piro ćher thaj dija hamasko lešće magarconenđe. E manuša thodine pire pungre, pa haline thaj piline.

22 Dok von veselinas pe, varesave bilačhe manuša andar o gav opkolisardine o ćher, pa marenas po vudar, čhonas muj e phure manušešće, kasko sas o ćher: "Inkal amenđe e manušes savo avilo tute, te sovas lesa!"

23 O phuro manuš inkljisto angla lende thaj phendas lenđe: "Na, phralalen! Na ćeren kasavo bilačhipe! Godova manuš si gosto ande mungro ćher. Na ćeren kasavo ladžavo! 24 Ake, akate si mungri čhori savi si još čhej thaj okole manušešći romnji ropkinja. Inkalava len tumenđe, pa ćeren lenca so god kamen. Samo na ćeren akale manušešće kasavo ladžavo!"

25 Ali godola manuša či kamline te čhon kan leste, pa o Levito lijas pire romnja ropkinja thaj spida lat avri lende. Von silujinas thaj zlostavinas lat sasti rjat dži ke detharin, a kana ačhilo te đesavol mukline lat.

26 Ande detharin, e manušnji bolda pe dži ko ćher okole manušesko ande savo sas lako rom, peli anglo vudar thaj ačhili te pašljol okote dok či đesajlo. 27 Kana lako rom detharinako uštilo, putardas o vudar e ćheresko thaj inkljisto te nastavil piro drom. Okote dikhla pešće romnja ropkinja sar pašljol anglo vudar e vastenca po prago.

28 Vo phendas laće: "Ušti thaj te džastar!"

Ali voj či phenelas lešće khanči. O Levito čhuta lat po magarco, thaj teljardas ćhere. 29 Kana areslo ćhere, lijas e čhuri thaj čhinda pire romnja ropkinja, udo po udo, pe dešuduj kotora, save bičhaldas ande sa e krajurja pe sasti Izraelošći phuv.

30 Savora save godova dikhline, mothonas: "Gajda vareso nas dikhlino ni ćerdo sar e Izraelcurja inkljistine andar o Egipat dži ađes. Amen moraš te gndis pale akava, te posavetuis men thaj te ćeras svato."