1 E Izraelcurja teljardine te ćerenas okova so si bilačhe ande GOSPODEŠĆE jakha. Zato o GOSPOD pe efta brš dija len ande vas e Midjancenđe. 2 E Midjancurja mučinas e Izraelcen, a von zbog godova ćerenas pešće thana kaj te garadon: ande gore, ande pećine thaj ande thana pe save šaj phare te avelas pe. 3 Kana god e Izraelcurja sejinas, e Midjancurja, e Amalečanurja thaj e aver thema katar o istok napadninas len. 4 Utaborisajle paše lende thaj uništinas o plodo e phuvjako sa dži ke Gaza, gajda kaj či muklinesas e Izraelconenđe khanči katar soste trajisardinesas. Či mukline lenđe ni bakhro, ni guruv, ni magarco. 5 Avenas pire stokava thaj pire šatorenca sago e skakavcurja ande rojurja, sas gaći but manuša thaj kamile kaj naštik đinavenas pe. Denas ande phuv thaj ćerenas bari šteta. 6 Gajda e Midjancurja andine e Izraelcen dži ko baro čoripe, askal e Izraelcurja zavapisardine e GOSPODEŠĆE.

7 Kana e Izraelcurja zavapisardine e GOSPODEŠĆE zbog e Midjancurja, 8 o GOSPOD bičhaldas lenđe proroko, savo phendas lenđe: "Gajda phenel o GOSPOD, Del e Izraelosko: ‘Inkaldem tumen andar o Egipat, kaj senas roburja. 9 Oslobodisardem tumen andar e vas e Egipćanenđe thaj andar e vas savorenđe save mučinas tumen. Tradavas len angle tumende thaj dijem tumen lenđi phuv. 10 Phendem tumenđe: Me sem o GOSPOD, tumaro Del. Na služin e devlenđe savenđe služin e Amorejcurja ande savenđi phuv trajin. Ali tumen či čhutine kan mande.’ "

11 O anđeo e GOSPODESKO avilo thaj bešlo talo kaš e hrastosko ande Ofra, pe phuv e Joašesći savo sas andar e Aviezerešći familija. Okote o Gedeon, e Joašesko čhavo, šilavelas o điv katar e pleva ande presa pale mol, sar arakhlasas lat katar e Midjancurja.

12 O anđeo e GOSPODESKO sikadilo e Gedeonešće thaj phendas lešće: "O GOSPOD si tusa, hrabro ratnikona."

13 O Gedeon phendas lešće: "Jartosar, raja, ali ako si o GOSPOD amenca, sostar askal akava sa aresla men? Kaj si sa okola lešće čudurja pale save ćerenas amenđe svato amare pradada? Phenenas: ‘O GOSPOD inkalda men andar o Egipat.’ Ali o GOSPOD akana mukla men thaj dija men ande vas e Midjancenđe."

14 O GOSPOD bolda pe karing leste thaj phendas: "Dža godole silava savi si ande tute thaj izbavija e Izraelcen andar e vas e Midjancenđe. Me bičhalav tut."

15 O Gedeon phendas lešće: "Jartosar, raja, ali sar me šaj spasiva e Izraelcen? Mungri familija si majcikni ando Manasijesko pleme, a me sem majterno ando ćher mungre dadesko."

16 O GOSPOD phendas lešće: "Me avava tusa, pa pobedija e Midjancen sago kaj si samo jek manuš."

17 O Gedeon phendas: "Ako akana arakhlem milost angle ćire jakha, de man znako kaj godova tu o GOSPOD ćeres svato manca. 18 Moliv tu, na te džastar akatar dok či bolda man mungre žrtvene darosa thaj či čhav les angle tute."

A o GOSPOD phendas: "Ačhava akate dok či boldes tut."

19 Askal o Gedeon dija andre ando ćher, spremisardas buznjora thaj katar deš kile aro ćerda bikvascosko mangro. O mas čhuta ande korpa, a e zumi ande piri, pa inkalda o habe thaj poslužisardas les tale okova hrasto.

20 O anđeo e Devlesko phendas lešće: "Le o mas thaj e bikvascošće mangre thaj čho len pe okoja stena, a e zumi čhor pe lende."

Thaj o Gedeon ćerda gajda.

21 Askal o anđeo e GOSPODESKO inzardas o vas thaj e vrhosa pire rovljasa dotaknisarda o mas thaj o mangro thaj andar e stena planisarda e jag thaj phabarda o habe, a o anđeo e GOSPODESKO nestanisarda.

22 Kana o Gedeon dikhla kaj sas godova o anđeo e GOSPODESKO, čhuta muj: "Jao, GOSPODE, Devla, dikhlem ćire anđele jakhenca ande jakha!"

23 A o GOSPOD phendas lešće: "Smiri tut. Na dara, či mereja."

24 O Gedeon okote vazdas žrtveniko e GOSPODEŠĆE thaj dija les alav: "O GOSPOD si miro." O žrtveniko vi ađes ačhel ande Ofra pe Aviezerošći phuv.

25 Godoja isto rjat o GOSPOD phendas e Gedeonešće: "Andar ćire dadesko stado le thule guruve katar efta brš thaj harav o žrtveniko savo ćiro dad vazda e Vaalešće thaj čhin e Ašeriako kipo savo si paše leste. 26 Askal po vrho godole bregosko vazde žrtveniko e GOSPODEŠĆE, ćire Devlešće, pa le okole thule guruve thaj prinesi les sago žrtva paljenica pe kaš katar o kipo e Ašeriako savo čhindan."

27 O Gedeon akhardas deš pire slugen thaj ćerda sar o GOSPOD phendas lešće. Ali, pošto daralas katar piri familija thaj katar e manuša andar o gav, či ćerda godova e đesesa, već e raćasa. 28 Kana e manuša andar o gav uštiline thejara o đes detharinako, dikhline harado e Vaalesko žrtveniko thaj paše leste čhindo e Ašeriako kipo. Dikhline vi e guruve prinesime po nevo žrtveniko.

29 "Ko li ćerda godova?" phučenas jek avres.

Nakon so phučenas pe thaj rodenas ko ćerda godova, vareko phendas lenđe: "Godova ćerda e Joašesko čhavo o Gedeon."

30 Askal e manuša andar o gav phendine e Joašešće: "Inkal ćire čhaves avri kaj moraš te merel. Harada e Vaalesko žrtveniko thaj čhinda e Ašeriako kipo."

31 A o Joaš phendas savorenđe save uštile protiv leste: "Zar tumen branina e Vaale? Zar tumen kamen te spasin les? Ko god branila les, dži detharinako merela. Ako si o Vaal čače del, askal šaj korkoro te odbranil pe kana vareko haravel lesko žrtveniko."

32 Gajda godova đes e Gedeone akhardine Jeruv-Vaal, kaj si phendo: "Neka o Vaal korkoro branil pe kana vareko haravel lesko žrtveniko."

33 Sa e Midjancurja, e Amalečanurja thaj e aver thema katar o istok ćidine pe, nakhline prekal e reka Jordan thaj utaborisajle ande dolina Jizreel. 34 Askal o Duho e GOSPODESKO fuljisto po Gedeon a vo phurdas ande šng thaj akhardas e manušen andar e Aviezeresko rodo te teljaren pale leste. 35 Vo bičhaldas e manušen saste Manasiješće plemenošće, te akharen e manušen te sledin les. A bičhaldas e manušen vi e Asirešće, Zavulonešće thaj e Neftalimešće plemenenđe, pa von teljardine te malaven pe lenca.

36 O Gedeon phendas e Devlešće: "Obećisardan kaj prekal mande spasija e Izraelcen. 37 Ake, me po gumno čhava e bakhrešći vuna. Ako avel e rosa samo pe vuna, a sasti phuv ačhel šući, askal džanava kaj prekal mande spasija e Izraelcen, sago kaj obećisardan."

38 Thaj gajda vi sas. O Gedeon uštilo thejara o đes detharinako rano, ćićidas e vuna thaj andar late iscedisarda e rosa kaj pherdo o čaro paj.

39 Askal o Gedeon phendas e Devlešće: "Na te holjavos pe mande ako još vareso zamoliv tut. De man još jekhvar te proveriv. Moliv tut, neka akava drom e vuna ačhel šući, a e rosa neka perel sa okolo pe phuv."

40 O Del vi godoja rjat ćerda so o Gedeon manglas. E vuna ačhili šući, a e rosa peli sa okolo pe phuv.