1 Ćidine pe sa e Izraelcurja. E manuša aviline katar sa e riga andar o Izrael, katar o Dan dži ke Beer-Ševa thaj andar e phuv Gilad. Ćidine pe anglo GOSPOD ande Micpa. 2 E vođe sa e themešće, sa e Izraelošće plemenenđe, line pire thana po skupo e Devlešće themengo, saven sas štar šela milje e naoružime e mačosa. 3 A e Venjamincurja ašundine kaj e Izraelcurja đeline pe opre ande Micpa.

E Izraelcurja phendine: "Phenen amenđe sar dogodisajlo godova bilačhipe."

4 Askal okova Levito, rom e manušnjako savi sas mudardi, phendas: "Avilem mungre romnjasa ropkinjasa ando gav Giva ande Venjaminešći phuv te okote raćaras. 5 Godoja rjat e manuša andar e Giva opkolisardine o ćher ande savo semas. Kamline te mudaren man. Siluisardine mungre romnja ropkinja thaj voj muli. 6 Askal, lijem lako telo thaj čhindem les pe kotora thaj e kotora katar lako telo bičhaldem pe sas e krajurja ande Izraelsko phuv, kaj akava baro ladžavo sas ćerdo ando Izrael. 7 Akana, savora tumen Izraelcurja, anen e odluka so trubul te ćeras."

8 Sa e manuša složno uštile thaj phendine: "Khonik amendar či džalatar ande piro šator. Khonik či boldela pe ande piro ćher. 9 Gajda ćerasa e manušenca andar e Giva. Čhudasa e kocka thaj odabirisa e manušen te napadnin len. 10 Izabirisa deš manušen katar šel andar svako izraelsko pleme, šel katar milja thaj milja katar deš milje, von avena zadužime te nabavin hamasko pale vojska. Kana e vojska dela pašo Giva ande Venjaminešći phuv, kaznila e manušen palo ladžavo savo ćerdine ando Izrael."

11 Gajda sa e Izraelcurja ćidine pe thaj složno ujedinisajle protiv godova gav.

12 E izraelošće plemenurja bičhaldine e glasnikonen kroz sasto Venjaminesko pleme te phučen: "Sosko godova bilačhipe dogodisajlo maškar tumende? 13 Predain amenđe okole bilačhe manušen andar e Giva, te mudaras len thaj te inkalas o bilačhipe andar o Izrael."

Ali e Venjamincurja či kamline te čhon kan ke aver Izraelcurja, 14 nego andar sa e gava aviline ande Giva spremne pale borba protiv e Izraelcurja. 15 Godova đes andar e Venijaminešće gava ćidine pe biš thaj šov milja naoružime manuša, zajedno e efta šela milje majlačhe ratnikonca andar e Giva. 16 Maškar sasti vojska sas efta šela majlačhe ratnikurja save sas levakurja, katar save svako e baresa andar e praćka gađil e bal katar o šoro thaj te či promašil. 17 A sa e izraelske plemenurja, osim e Venijamincurja, sas štar šela milje majlačhe naoružime ratnikurja.

18 E Izraelcurja spremisajle thaj đele ando Betel te phučen e Devle: "Ko amendar džala prvo te boril pe protiv e Venijamincurja?"

A o GOSPOD phendas: "Neka prvo džal e Judasko pleme."

19 E Izraelcurja uštiline detharinako rano thaj utaborisajle angle Giva. 20 Teljardine ande bitka protiv e Venijamincurja thaj raspodelisajle anglo gav. 21 E Venijamincurja inkljistine andar o gav thaj godova đes po bojno polje mudardine biš thaj duj milje Izraelcen.

22 E Izraelcurja ipak ohrabrisajle thaj palem raspodelisajle pale bitka, pe isto than sago vi prvo đes.

23 E Izraelcurja rovenas anglo GOSPOD dži talerjat, pa phučline les: "Dali palem te teljaras ande bitka protiv amare phral e Venijamincurja?"

A o GOSPOD phendas: "Teljaren pe lende."

24 Gajda aver đes e Izraelcurja teljardine pe Venijamincurja. 25 Ali e Venijamincurja inkljistine andar e Giva, spremne pale bitka thaj godova đes mudardine još ohtovardeš milje Izraelcen, savora sas naoružime e mačosa.

26 Askal sa e Izraelcurja, sasti vojska, ćidine pe ando Betel, pa okote bešenas thaj rovenas anglo GOSPOD. Godova đes postinas dži ke rjat thaj prinosinas e GOSPODEŠĆE žrtve paljenice thaj žrtve palo zajedništvo.

27 Askal e Izraelcurja palem phučline e GOSPODE. (Ande godoja vrjama o Kovčeg pale Devlesko savez sas ando Betel, 28 a angle leste služilas o Pinhas, e Eleazaresko čhavo, e Aronesko unuko.)

Von phučline: "Dali palem te teljaras ande bitka protiv amare phral e Venijamincurja, ili na?"

A o GOSPOD phendas: "Teljaren, kaj thejara predaiva len ande tumare vas."

29 Askal e Izraelcurja čhutine zamka oko e Giva. 30 Trito đes e Izraelcurja teljardine pe Venijamincurja thaj sago vi majsigo raspodelisajle anglo gav. 31 E Venijamincurja inkljistine te napadnin e Izraelcen. Gajda kaj e Izraelcurja crdenas pe palpale, maminas e Venijamincen majdur katar o gav. Thaj sago vi majsigo, e Venijamincurja line te mudaren Izraelcen thaj mudardine oko trijanda manušen po putardo polje, pe droma palo Betel thaj e Giva.

32 Dok e Venijamincurja phenenas: "Pobedin sago vi majsigo", e Izraelcurja phenenas: "Hajde te crdas men katar o gav thaj te namamis len majdur pe droma."

33 Sa e Izraelcurja mukline pire položaja thaj rasporedisajle pašo than savo akhardol Baal-Tamar. Askal e Izraelcurja save ćerdine zamka inkljistine andar piro zaklon zapadno katar e Giva, 34 thaj deš milje majlačhe izraelske ratnikurja napadnisardine o gav. E bitka sas phari. E Venijamincurja či slutisardine kaj ažućarel len o propast.

35 O GOSPOD dija pobeda e Izraelconenđe protiv e Venijamincurja. E Izraelcurja godova đes mudardine biš thaj pandž milje thaj šel naoružime ratnikurja andar e Venijaminesko pleme. 36 Askal e Venijamincurja svatisardine kaj si porazime.

A okola Izraelcurja save našline katar pire položaja angle Venijamincurja, pouzdisajle ande zamka savi čhutine paše Giva. 37 E vojnikurja andar e zaseda teljardine ando napad pe Giva, buljardine pe po gav thaj e mačosa mudardine sa e manušen andar o gav. 38 E Izraelcurja dogovorisajle e manušenca save sas ande zaseda, te vazden baro thuv andar o gav sago znako. 39 Pe godova znako e Izraelcurja trubujine te teljaren ande bitka.

E Venijamincurja teljardine ando napad thaj mudardine oko trijanda Izraelcen, pa phenenas: "Podedisaras len sago vi ande prvo bitka."

40 Ali kana andar o gav teljarda te vazdel pe baro thuv, e Venijamincurja dikhline karingal o gav dikhline kaj si sasto gav ando thuv. 41 Pale godova e Izraelcurja teljardine ando napad, a e Venijamincen lija e dar, kaj dikhline kaj aresla len o propast. 42 Našenas angle Izraelcurja karingal e pustinja. Ali arakhline pe maškare ande bitka maškar e vojska andar e izraelske gava save mudardine len. 43 Kana opkolisardine e Venijamincen, teljardine te progonin len, gajda kaj či denas len te phurden dok či mudardine len istočno katar e Giva. 44 Gajda mudardine dešuohto milje Venijamincen, sa hrabre ratnikonen. 45 E Venijamincurja askal boldine pe thaj našline karingal e pustinja, dži ko than savo akhardol Rimonsko stena. No e Izraelcurja lungo e dromenca mudardine pandž milje Venijamincen. Thaj vi majdur progoninas len, sa dži ko gav savo akhardolas Gidom. Okote e Izraelcurja mudardine još duj milje manuša. 46 Godova đes sas mudardo ukupno biš thaj pandž milje Venijamincurja, sa hrabre ratnikurja. 47 Ali šov šela manuša boldine pe thaj našline ande pustinja. Sklonisajle ke Rimonsko stena thaj ačhiline okote štar čhon.

48 E Izraelcurja pale godova boldine pe ande Venijaminešći phuv thaj pe sa e gava e mačosa mudardine sa so arakhline, e manušen thaj e životinjen. Thaj dine jag svako gav ande savo dine.