1 Hamuriaha huya lubaragiñe alubahani luma Wabureme,

Bungiu le adügübalin labirihaniga,

lóunahabei huya ligía hun lau liibe,

líchuguba sagadi houn súngubei hacharirugu.

2 Iyeeni hererun guáriuagu,

iyeeni giñe le harihubei egesihatiña.

Uénedü málati uágubei hadimureha,

málati giñe hererun le lánina dǘgüdaguaü.

Ligía éibugañahadügü habéi gürigia kei mudún,

súfuri hagía ladüga móuniri hamá.

3 Ligía lariñagunbei Wabureme:

«Durungua nigañi hawagun hóuniri mudún,

nabeichagubaña ha adundehabaliña numutuniña».

Wabureme Suntigabafu le óunigirubaliña lilügüniña mudún,

ha ladügawagun Hudá,

ladügübaña ligabayunme ha lánina wuribu.

4 Hádangiñeba láfurida dübü le wéirigutimabei,

tuágaburi dibasein luma ligimarana wuribu.

Hádangiñeba háfurida sun ábutigu.

5 Ítara haba kei súdara ha adügüragubalin gubegubeti ǘmada;

hageindaguba lugundun anihein Wabureme hama,

hígirubaña ha agalufehabaña lidan busiganu.

6 Lariñahare Wabureme:

«Níchuguba erei houn ladügawagun Hudá,

nesefurubaña ladügawagun Hosé.

Nalidihayabaña hageiroun,

ladüga nugudemehabu houn.

Hayabinyaba lun ítara hamá kamá hamuga mígirunñaha nágiña,

ladüga au Habungiutebei le etenirubei lun hafurieidun.

7 Ítara luba lani Éfürain türibu kei aban súdara,

tagundaaruba lanigi kei lagundaarun le átubei diwéin,

hagundaaruba giñe lirahüñü lau harihini.

Tagundaaruba lanigi luagu Wabureme!

8 «Nagúaruba houn ábame nóundaruniña,

ladüga sefu naaña.

Hagibedaguayaba kei habéi meha.

9 Chagagua numutiña haganaguóun néchanigu,

gama lumoun íbini díseñu hamá, haritaguba nuagun,

ani lachülürüba weyu lun hagiribudun

hau harahüñü wínwanñu lidoun hamúan.

10 Nagiribudagüdübaña Ehiptugiñe,

nanügübaña Asiriagiñe,

nanügübaña uburugun Galaadü luma luagun Líwanu,

wéiribei hibe darime lemegeirun ubaraü houn.

11 Hánhiñuragubei lubaranan Ehiptu,

Namabeidagüdübei Nilu,

Nagünrinchagubei lupantan Asiria,

Nagumuchuba lau lubafu Ehiptu.

12 Níchuguba erei houn,

ábame hawanserun lidan niri.

Au le Aburemei ariñagubalin».