1 Lidan ligadürün lirumudiri lagumadihan urúei Daríu, weyu gádürü lidan nefu hati (hati le gíribei Kisüléu) aba ladimurehan Wabureme nun, au profeta Sakaríasi. 2,3 Lidan dan ligía, óunahaaña buga lílana Beteli wügüriña ha Sareserü, luma Régemü-mélekü hau hawügüriñanigu amuriaha ídemuei lúmagiñe Wabureme, ñüdün hagía hamoun profetagu hama tufadirinigu litenpulun Wabureme Suntigabafu, hariñaga houn:

—Lunti san wasigirun amuisera luma ayunara lidan liseingün hati lidan kada irumu kei wadügüni chülǘ lumoun dan le?

4 Ábati ladimurehan Wabureme Suntigabafu nun, 5 aba lóunahanina ariñaga houn sun lílana fulasu luma houn fádirigu:

—Huguya ayunaratün amuisera huguya lidan liseingün luma lisedün hati lúmagiñe ǘrüwa-wein-diisi irumu guentó. Gama lumoun mama lun híchugun uéiriguni nun hadügei, 6 dan le heigin luma dan le hatun, hun guánarügü hadügei.

7 Ma funagia anihánmeme dimurei le meha lariñagubei Wabureme hádangiñe binadu profetagu dan meha le darangilañu lubéi Herusalén buin hau gürigia, darangilañu meha giñe burí uburugu le geyegubei lau, luma Négebü luma fulasu mawübüriti?

8 Aba ladimurehan Wabureme lun profeta Sakaríasi, lariñaga lun:

9 —Anihán le nariñagubei lun hadügüni: "Úaragua humá lidan haguseragüdün, buidu huguyame hama híbirigu, gudemehabu huguyame. 10 Mamudiragua humaña würiña hilaaña úmarigu, ni méteñuhaña ni gudemetiña. Masaminara humá hadügün wuribati húniwagua". 11 Gama lumoun máhatiña gürigia hadügüni le nubeibei. Aba hafamurun kamá hamuga maganbaditiña. 12 Aba hedereragüdünu hanigi kei dübü, lun maganbun hamani arufudahani luma gumadi le lasubudirágüdübei Wabureme lau lani sífiri hádangiñe binadu profetagu.

Ligía lagañidunbei Wabureme saragu, 13 aba lariñagun: «Ítara kei maha hamá haganbunina dan le nagúahanbei houn, maganbun nubaña giñe danme le hagúarun nun. 14 Ligía nachagaragunbaliña haganaguóun sun néchanigu ha ibidiñebaña houn, aba lerederun ageiraü málouga hárigi, siñá laganóuniwa lidan. Aban ageiraü wéndeti, adügatiña lun lamaladun!»