1 Gewenedüyatina ábanya uénedü. Lidan uénedü ligía, aba narihin gádürü karü lánina wuribu tiábiña labadinaguagiñe bián wübü lauti buronse, 2 to furumiñetu karü, gabayu funatiña achawahabarun; to tibiaman, hachawahan gabayu wuritiña; 3 to tǘrüwan, hachawahan gabayu harutiña; to tigadürün hachawahan gabayu dédeegutiña. 4 Aba nálügüdüni ánheli le adimurehabei numa:

—Nabureme, ka san mini lan le?

5 Lariñaga nun:

—Gádürü garabali le, ligía áfuridubei ligibugiñegiñe Aburemei le Labureme sun ubóu. 6 Karü to hachawahaboun gabayu wuritiña, luágunboun Babilónia, ageiraü le nóruterugubei; to hachawahaboun gabayu harutiña, luágunboun ageiraü le luéigiñebei oubaü le ñeinhin lubéi lálüda weyu; to hachawahaboun gabayu dédeegutiña, luágunboun ageiraü le súrurugubei.

7 Aba háfuridun gabayu dédeegutiña óurabahoueina lun héibuguni sun ubóu. Aba lariñagun ánheli houn:

—Éibuga huméi sun ubóu.

Aba hadügüni ítara. 8 Lárigiñe aba lagúaragun ánheli ariñaga nun:

—Arihabá, ha ñǘdünbaña lidoun ageiraü le nórute, héibuga agalumadei ligañi Wabureme lidan fulasu ligía!

9 Aba líchuguni Wabureme uganu le nun:

10 —Babudaha aban idewesei hadan adaürǘtiña ha giribuhañabaña Babilóniagiñe: Elüdái, Towíasi luma Hedaíasi. Lárigiñeme, lídanmeme weyu ligía, ábame bidin lúbiñe Hosíasi le liráü Sofoníasi. 11 Lau golu luma pülata le bóundarubei, badügame fiu ridi, ábame banügün aban ridi lun badaürüni lábulugu Hosué, fádiri le íñugutimati, le liráü Hosadákü. 12 Bariñagame lun: «Lariñahare Wabureme Suntigabafu luagu láhüchaguba lan wügüri le gíribei "ISERI LIMU" lídangiñe guánarügü lílagüle, ábame lararamagüdünuya litenpulun Wabureme. 13 Lararamagüdayaboun litenpulun Wabureme, ábame leresibirun uéiriguni keisi aban urúei. Lañuuruba luagu lálana larúeihan lun lagumadihan, lañuuruba fádiri lóubagiñe, ábame ñein lan darangilaü hadan biángubei. 14 Ábame lerederun ridi burí ligía litenpulunrugu Wabureme keisi aritaguagülei luagun Elüdái, Towíasi, Hedaíasi luma Hosíasi le liráü Sofoníasi».

15 Hayabinba gürigia dísegiñe lun hídehan lidan tararamunya litenpulun Wabureme; ábameti hasubudiruni luagu Wabureme lan Suntigabafu óunahabalina. Lasusereduba le, danme hánharun haganbuni lumalali Bungiu le Wabungiute, adüga humeime le lubeibei.