1 —Lídanme dan ligía, lánhunrenchuba aban lísensen duna, lun hachibuni ladügawagun Dawidi hama lílana Herusalén hafigoun luma hawiye ñein. 2 Nagumuchaguagüdübei íbini hiri guáriuagu lidan fulasu le lun maguahóunhaña lan. Nagidarubaña giñe sun profetagu luma sun sífiri wíyeti. Aburemei ariñagubalin.

3 —Dánmeti labusenrun aban gürigia profeta lan, hariñaguba lagübürigu guánarügü lun: "Bóunweba, lugundun bálugun básügüragüdüni biyeeni kamá hamuga uganu lúmagiñeti Wabureme!" Ábame hímiraguni lagübürigu guánarügü danme le lálugun lafiñeragüdün luagu profeta lan! 4 Lídanme dan ligía, nibusigaribaña profetagu lau hawenedü danme le hadimurehan luéigiñe lóubadina Wabureme. Úabei ni aban eyeehati lau ladaürünu hadaüragun profetagu to lautu lura kameyu, 5 ariñagarügübei kada aban: "Mama profeta au, ábunaguti nadü au. Áraabu nuadigimaribei lúmagiñe niñüraü". 6 Ánheinti ariñaga somu gürigia lun: "An buriti biti le buágubei?" Ábame lóunabun: "Hábiñe numadagu hadügei nun".

7 Lariñahare Wabureme Suntigabafu:

«Eféin iñuraguabá luagun hóuniri nilügüniña mudún

luma luagun le íderagubalin!

Áfarabei hóuniri mudún ábame hachagaragun mudún,

ábame nagarabaagun hawagun harahüñü mudún!

8,9 Hóunweguba biama hádangiñe ǘrüwa aganóutiña lidan fulasu le.

Ábanrügübei hádangiñe ǘrüwa eredera wínwanñu.

Hámeti erederubaña wínwanñu,

násügüragüdübaña lídangiñe watu gemeti,

narumadagüdübaña kei larumadawagüdün pülata,

nafinuhabaña kei lafinuhóun golu,

ábameti hagúahan nuagu, ábame nóunabuniña.

Nagúaruba houn: "Huguya numutuniñabaña",

hóunabame: "Aburemei Wabungiutebei".

Aburemei ariñagubalin».