1 Gewenedüyatina ábanya uénedü. Lidan uénedü ligía, aba narihin aban líburu áhamaha. 2 Aba lálügüdünina ánheli, lariñaga nun:

—Ka barihubei?

Nariñaga lun:

—Aban líburu áhamaha: Nefu méturu timigifen gádürü méturu dimí tidabuberen.

3 Ábati lariñagun nun:

—Anihein íñarawaguni le luágunbei sun fulasu bürüwañu ñein. Según le Bürüwañubei luagu biángubei touba, úati ni aban le íweruhati o le lan áfiñuruti le iyeeniti lun mabeichunbei lan. 4 Lariñahare Wabureme Suntigabafu: «Nóunahañein íñarawaguni le, lun lebelurun lúbiñoun le íweruhabei luma lúbiñoun le áfiñurubei le iyeeniti luagu niri. Ani lerederuba íñarawaguni ligía ñein darí tagumuchagun muna tuguya sunsuinagubei».

5 Lárigiñe aba láfuridun ánheli le adimurehabei numa, aba lariñagun nun:

—Arihabéi le lunbei lasaliragun guentó!

6 Aba nálügüdüni, nariñaga lun:

—Káteigia le?

Lariñaga nun:

—Aban faniñe, lamisuraagüle hafigoun ha fulasurugubaña.

7 Darugu liña faniñe ligía lau aban idáü lauti balu, aba lagidarún lidáü, ñeinñoun aban würi ñun lurageirugu faniñe. 8 Aba lariñagun ánheli nun:

—Würi to, wuribani.

Aba ládarunu lidoun faniñe, aba ladourun tau lau idáü lauti balu.

9 Ábaya narihin, hasaliragun bián würiña garünatiña, aba ládahaniña garabali. Ítara liña harüna kei harüna sigueña, barüina hañalin faniñe garabalirugu. 10 Ábati nálügüdüni ánheli le adimurehabei numa, nariñaga lun:

—Haliñounbaña san lau faniñe le?

11 Lariñaga nun:

—Héibuga adüga aban ténpulu lun, uburugu Babilónia. Danme óunwenbuhaaru ténpulu, ábame híchuguni ñein luagu lebu.