1 Lárigiñe aba larufuduni Wabureme Hosué le fádiri le íñugutimabei nun, rara liña ligibugiñe lani Wabureme ánheli. Ñeinñein Mafia lóubagiñe Hosué, aranseñu lun líchugun lidurun. 2 Ábati lariñagun lani Wabureme ánheli lun Mafia:

—Siadilábu Wabureme! Siadilábu Bungiu le hínsiñehabubei lun Herusalén! Ladüga ítara liña wügüri le kei aban garubun gemeti le asagarúti lídangiñe leñegura watu.

3 Rara liñati Hosué tau ladaüragun wíyetu ligibugiñe lani Wabureme ánheli.

4 Ábati lariñagun ánheli houn ha íderagubalin lun haragachunu daüguaü wíyetu tuguya luéi Hosué. Lárigiñe aba lariñagun ánheli ligía lun Hosué:

—Mini lan le, luagu gidá naali lan bifigoun. Guentó, nadüga lun hadaüraguagüdünibu tau daüguaü wéndegutu!

5 Aba lariñagun ánheli houn ha íderagubalin lun hadaürün aban búnedu harumati lábulugu Hosué, aba hadaürüni luagu, lárigiñe aba hadaüraguagüdüni tau daüguaü wéndegutu. Ani sun dan le raraméme liña ánheli. 6 Lárigiñe aba lariñagun lani Wabureme ánheli lun Hosué:

7 —Lariñahare Wabureme Suntigabafu: "Béibuga lidan némeri, gúnfulibei sun le nariñagubei bun, anhein badüga ítara, buguyaba ariha tau nitenpulun. Bóunigiruboun, lau sun tibürürün, ábame níchugun aban ubaraü bun haganagua ánheligu ha eseriwidubaña nun. 8 Aganbabána buidu Hosué, buguya fádiri le íñugutimabei, aganba hamá giñe fádirigu ha búmabaña, ladüga sun huguya ítara hiña kei aban seini luagu nóunahabei lan nubúein houn numutuniña, le gíribei ISERI LIMU. 9 Rúhadina aban dübü le sédüti louba ligibugiñe Hosué, nabürüdüba aban iri luagu dübü ligía ani lidan ábanrügü weyu nagidarubei figóu lídangiñe fulasu le. 10 Danme lachülürün weyu ligía, gayaraabei hagunbiragun hungua lun hasandirun darangilaü lábugiñe burí lamuñadiri hinadürigu beibei tuma igu. Aburemei ariñagubalin".