1 Anihán ñunsu lúmagiñeti Wabureme libügürü Ísüraeli. Lariñahare Wabureme le adügübalin sielu, ru ligía lebu ubóu, luma ibagari houn gürigia:

2 —Nadügaali Herusalén ábanme weru diwéin le lunbei labacharuadagüdüniña sun gürigia ha yarafabaña lun. Danme le hegeyedaguni Herusalén, lábürühouba giñe luagu libiri burí luburugute Hudá. 3 Lídanme dan ligía, nadügübei Herusalén ábanme dübü hǘrüti houn sun gürigia. Labuleseiruba furumiñeguarügü hádangiñe ha álugutiña hiñuraguni, hóundaraguba sun néchanigu lun hageindagun luma uburugu Herusalén, 4 gama lumoun ábame nalouchagüdüniña sun gabayu, ábame nálülüdagüdün hau ha agalufehabaliña. Nóunigirubaña sun ladügawagun Hudá, ábame nadügün lun marihin hamá sun halügüniña néchanigu gabayu. 5 Danme harihini lábutigu Hudá katei le, hariñagame hóunguarügü: "Wabureme le Suntigabafu, ligía Habungiutebei ha aganóubaña Herusalén ani ligía íchugubei erei houn". 6 Lídanme dan ligía, nadügüba lun ítara hamá lábutigu Hudá kei eñeguraü laganagua watu, kei watu gemeti laganagua güraguati lilimun türigu. Hábürühaba hawagun néchanigu ha geyegubaña hau, ánhañati lílana Herusalén, haganóuayaba haburuguterugu.

7 —Gama lumoun, nesefurubaña liduheñu burí Hudá furumiñe, lun maweiridun lan haweirigun ladügawagun Dawidi hama lílana Herusalén hóugiñe ladügawagun Hudá. 8 Au le Aburemei nóunigirubaña ha aganóubaña Herusalén. Ha débilitimabaña hadan, hérebaña kei urúei Dawidi, ítara haba ladügawagun Dawidi kei Bungiu, kei lani Wabureme ánheli le habá habaabei.

9 —Lídanme dan ligía nagünrinchagubei furumiñeguarügü néchani le ageindaguti luma Herusalén. 10 Nabuinchagüdübaña ladügawagun Dawidi hama lílana Herusalén lau areini luma furíeigi. Ábameti harihini le hímiragubei, ábame hamuiserun, ayahua hagíame lárigi kei layahuahóuniwa lárigi isaani le ábanrügüti o isaani lan le íbugañaü. 11 Ladügüba aban amuiseruni wéiriti Herusalén kei amuiseruni lárigi bungiu Adadü-rimón lidan fulasu mawübüriti le lani Megidu. 12-14 Hayahuahabei sun iduheñu amuisera hagíame ha lídanbaña ageiraü. Ladügawagun Dawidi houngua, hámarigume houngua; ladügawagun Natán houngua, hámarigume houngua, ladügawagun Lewí houngua, hámarigume houngua, ladügawagun Simí houngua, hámarigume houngua. Hayahuahabei sun iduheñu: Wügüriñame ayahuaha lidan aban fulasu, würiña lidan aban.