1 Aba líchuguni Wabureme Suntigabafu uganu le nun:

2 —Anihán le nariñagubei, au, le Aburemei Suntigabafu: Wéiriti línsiñe Herusalén nun, aban ínsiñeni le agañidagüdübalina hama háganiñu. 3 Gasu nagiribudun Herusaléun lun naganóun ñein. Ábameti laguarún lun Herusalén uburugu Úaraguati, laguarúame luwübüri Wabureme Suntigabafu, wübü Sánduti. 4 Hañuurayaba wéiyaaña mutu párükerugu Herusalén ragüñu luagu habadun ladüga haweiyan. 5 Habuinchubei irahüñü párüke burí uburugu áhurera lidan. 6 Lídanme dan ligía, siñabei sun le lidan haritagun ha erederubaña fulasurugu hádangiñe numutuniña; anhein nun, gayaraabei. Aburemei Suntigabafu ariñagubalin. 7 Nesefurubaña numutuniña lábugiñegiñe lubafu ageiraü le luéigiñebei oubaü le ñéingiñe lubéi laboucha weyu luma luéigiñe oubaü le ñeinhin lubéi lálüda, 8 ábame nanügüniña Herusaléun lun haganóun ñein, hagíabati numutuniña, aume Habungiute lau úarani luma richaguaü.

9 Lariñahare Wabureme Suntigabafu:

—Ragǘ humá erei huguya le haganbuñeinbei lememe hariñagubei profetagu danbei le lagumeserunbei tararamagüdüniwa ténpulu, weyu le labunúnbei wagabu. 10 Lugundun darí lumoun burí weyu le, úati meha seinsu lun hafayeirun wügüriña ni lun lafayeirun lebegi hawadigimari animaalugu houn haburiña. Ani úati meha giñe darangilaü houn lílana fulasu hadüga áganiñu; ani ageindaguagüda numutün húmagua. 11 Gama lumoun guentó mítaranhaadiname hama ha erederubaña hádangiñe gürigia ha kei meha lidan dan le sügühalibei. Aburemei Suntigabafu ariñagubalin. 12 Ladüga bunañu luba darangilaü haganagua; laginduba nadü; larandaruba múa; lábürühaba serenu siélugiñe. Níchugubei sun katei le houn ha erederubaña hádangiñe gürigia ha, lun hánime. 13 Ani ítara kei meha íñarawaguni humá huguya lílana Hudá hama lílana Ísüraeli haganagua ha híbiri néchanigu, ítara luba nesefurunün guentó, ábame nadügün lun abiniruni humá. Manufudeda humá! Gaguraasun humá!

14 Lariñahare Wabureme Suntigabafu:

—Haritaguatina meha nabeichuniña hagüchagu dan le hagañidagüdünbalina, ani adüga numuti naritagun. 15 Gama lumoun guentó haritaguaadina nadügün buiti lun Herusalén luma lun Hudá. Manufudeda humá lubeiti. 16 Anihán katei le lunbei hadügüni súnwandan: Hadimureha inarüni húmawagua, haguseragüda lau úarani ani áluaha huméi darangilaü súnwandan lidan guséi; 17 madüga humá wuribani húmawagua, máfiñurun huguyame le iyeeniti. Lugundun iyereeguti sun burí katei le nun. Aburemei Suntigabafu achoururubalin.

18 Aba ladimurehan Aburemei Suntigabafu numa, lariñaga nun:

19 —Ayunaruni le burí adügǘbei lidan ligadürün, liseingün, lisedün luma lidan lidiisin hati, liábinba lun lébunabei lan ugundani luma fedu houn ladügawagun Hudá. Hínsiñela lubeiti inarüni luma darangilaü hun!

20 Lariñahare Wabureme Suntigabafu:

—Hayabinyaba gürigia hama lílana saragu uburugu lun Herusaléun. 21 Ábameti hayabin lílana aban uburugu hamoun lílana amu uburugu, hariñagame houn: "Wéibuga áluahei Wabureme Suntigabafu, lun wamuriahan luma lun labinirúniwa! Hariñagame lílana le aban: Wéibuga giñe!" 22 Hayabinba saragu gürigia Herusaléun áluahei Wabureme Suntigabafu luma amuriaha luma lun labiniruniña. 23 Lídanme dan ligía, hárügüdübei diisi terencha ha lílana líbiri burí fulasu aban huríu tuéigiñe ladaüragun, hariñagame lun: "Busentiwa woudin huma, ladüga aganbatiwa luagu anihein lan Bungiu huma!"