1 Ábanya liabin ánheli, le adimurehabei numa, aba lagagudahanina kei lagagudahóun aban arumuguti. 2 Aba lálügüdünina, lariñaga nun:

—Ka barihubei?

Nariñaga lun:

—Arihatina aban lebu sanudelu lauti golu lau aban lagei gasi ligibuagu. Iñu libiti, anihein sedü lanpu le ídounbei lachülüra gasi lídangiñe sedü peipu. 3 Anihein bián oliwu lóubagiñe lebu sanudelu ligía, aban luéigiñe lóunwenren, aban luéigiñe lubaünan.

4 Aba nálügüdüni ánheli le adimurehabei numa, nariñaga lun:

—Nabureme, ka mini lan le?

5 Lariñaga nun:

—Ibidiñeti san bun?

Nariñaga lun:

—Uá nabureme, ibidiñeti nun.

6 Lariñaga nun:

—Luganute Wabureme le lun Sorobaweli: "Mama hau súdaragu, ni lau erei, lauba nani Sífiri, liña lariñagun Bungiu Suntigabafu".

7 —Kátañadibugia buguya óunwenbu áraabu? Berederuba fulasume wásati ligibugiñe Sorobaweli! Lasagarubei dübü le wéirigubei, sunme añaha lan gürigia ariñaga "Lubuidun mau! Lubuidun mau!"

8 Lárigiñe aba líchugun Wabureme ábanya uganu nun:

9 —Ru laali Sorobaweli tuágaburi ténpulu to, ligía guánarügüba agumuchoun. Ítara luba hasubudiruni luagu Wabureme lan Suntigabafu óunahabalina. 10 Hagüra ha meha mafiñenbaña luagu agumeseruni, guentó hagundaaruba lau harihini lagumuchuni Sorobaweli wadagimanu.

Lárigiñe ábaya lariñagun ánheli:

—Sedü lanpu le, lagu Wabureme, le léibuguñeinbei sun ubóu.

11 Aba nálügüdüni, nariñaga lun:

—Kati lanichigubei bián oliwu le, le ábanbei luéigiñe kada louba lebu sanudelu?

12 Álügüda numuti giñe, nariñaga lun:

—Ka mini lan bián lilimun oliwu le lubadubei peipu lauti golu le ídangiñebei lachülüra gasi lidoun lanpu?

13 Lariñaga nun:

—Ibidiñeti san bun ka lan mini lan?

Nariñaga lun:

—Ibidiñeti nun, nabureme.

14 Lariñaga nun:

—Añahán bián gürigia ha anuadirúbaña lun heseriwidun lun Wabureme, lidan sun ubóu.