1 Ábaya gewenedü nan ábanya uénedü. Lidan uénedü ligía, aba lasaliragun aban wügüri nun lau aban amisuraagülei lúhaburugu.

2 Aba nálügüdüni:

—Haliñounbadibu san?

Lariñaga nun:

—Namisurahaali uburugu Herusalén lun nasubudiruni limigifen luma lidabuberen.

3 Ábati narihin lidin ánheli le adimurehabei numa, aba liabin ábanya ánheli lubaroun 4 lariñaga lun:

—Éibaaguaba ariñaga lun wügüri le laubei amisuraagülei: "Haganóuaya gürigia Herusalén, ani gíbebaña gürigia hama ibiñanigu ñein darime lun siñá lan layaraawagun. 5 Gama lumoun lariñahare Wabureme: Ítara nuba kei aban ayarawaguni lauti watu gemeti lun Herusalén, narufudubei nuéirigun lidan uburugu".

6,7 Lariñahare Wabureme:

—Adügatina lun hadisedagun lidoun burí sun fulasu. Gama lumoun nariñahare hun guentó: Anuraha humá furese lídangiñe ageiraü nórute! Furí humá Babilóniagiñe le ñeinhin lubéi hanügǘwa huguya le meha aganóubei Herusalén. Aburemei ariñagubalin.

8,9 Lóunahañadina Wabureme Suntigabafu lau uganu le kóntüra néchanigu ha asagarahabalün:

—Furumiñeguarügü le aguuruti hawagu numutuniña, laguuruñein lila nagu. Ligía nageindaguba lubéi hama néchanigu hagía, ábame nadügün lun hasagarahaniña hadamun guánarügü.

Ítara luba larufuduni Wabureme Suntigabafu luéirigun, ani ítara luba gunfuranda humani luagu ligía lan óunahabalina.

10 Lariñahare Wabureme:

—Heremuha lau ugundani lílana Herusalén, lugundun niábiña aganóua haganagua.

11 Danme lasuseredun katei le, saragubaña néchanigu ásügürütiña lumoun Wabureme. Ábame lariñagun: «Numutuniñabaña giñe néchanigu ha. Ábameti naganóun haganagua».

Ítara luba gunfuranda humani luagu Wabureme lan Suntigabafu óunahabalina. 12 Lárügüdayabei Wabureme Hudá keisi lumegen le wéiriguti lidan fulasu sánduti, ábayame lagúaruni Herusalén keisi luburugute le lanúadirubei.

13 Maní hamá sun gürigia ligibugiñe Wabureme, ladüga liábiña wamoun lídangiñe ubaraü sánduti le ñein lubéi laganawa!