1 Ɛhemɔ si ne, Awurade yele asuafoɛ foforɛ 72,* na ɔsomane bɛ nyɔ-nyɔ lili ye nyunu hɔle kuro ne nekaa biala bɔ ye bɔbɔ ɔkɔ ne. 2 Yeɛ ɔha hyirele bɛ kyɛ: "Ɛboo nanu nningyein bɔ odikyɛ yɛpɛ ne sone, nakoso adwumayɛfoɛ ne te kaa. Yeti ɛmɔsrɛ ɛboo ne Wura ne kyɛ, ɔma adwumayɛfoɛ pee bra, ná bɛɛpɛ bie. 3 Ɛmɔhɔ; ɛmɔnea, mesoma ɛmɔ kyɛ mmoan mekɔ mbataku nu. 4 Nnɛmɔfa sikaa bɔtɔ, aleɛ anaa mmaboa, na nnɛmɔ gyina atee so bɛkyea ebiala. 5 Awuro biala bɔ ɛmɔ kowura nu ne, ɛmɔha kyɛ: ‘Asomdwie bra awuro he anu.’ 6 Sɛ ebie bɔ okuro asomdwie wɔ berɛ a, ɛmɔ asomdwie kɔtena ye so, nakoso sɛ ebie nne berɛ a, ɛmɔ asomdwie kosa kɔwa ɛmɔ berɛ. 7 Ɛmɔtena sɔ awuro nanu, na bɔ bɛkɔfa bɛkɔma ɛmɔ biala ne, ɛmɔli, na ɛmɔ no. Ofikyɛ ebie yɛ adwuma a, ye akatua fata ye. Nnɛmɔ fi awuro kõ anu bɛkɔ foforɛ nu.

8 "Afei koso, sɛ ɛmɔwura kuro bie nu na bedɛ ɛmɔ a, ɛmɔli bɔ bɛkɔfa bɛkosie ɛmɔ nyunu ne. 9 Ɛmɔsa bɛ bɔ bɛwɔ nu ne anwonyerɛ, na ɛmɔha behyire bɛ kyɛ: ‘Nyameɛ Ahennie ne apingye ɛmɔ.’ 10 Na sɛ ɛmɔwura kuro bie nu na banne ɛmɔ a, ɛmɔfi nu bɛhɔ ye atee naso, na ɛmɔha kyɛ: 11 ‘Ɛmɔ kuro nanu mvuture bɔ wagua yɛ gya bo ne, yɛ poro-poro yɛgua ɛmɔ so. Nakoso ɛmɔkaye kyɛ, Nyameɛ Ahennie ne apingye.’ 12 Meka mekyire ɛmɔ kyɛ, sɔ kyẽa ne, bɔ ɔkɔto sɔ kuro ne, Sodom deɛ ne po te kaa.

13 "Due Korasin, Due Betsaida, ofikyɛ anwanwadeɛ bɔ bayɛ ye wɔ wɔ nu ne, sɛ bɛyɛle ye wɔ Tiro ne Sidon a, ahaa basakra bahra brisie batena nzoen nu dada. 14 Na atemmuda ne, bɔ ɔkɔto ɛmɔ ne, Tiro ne Sidon deɛ ne po te kaa. 15 Na wɔ Kapernaum, bɛkɔfa wɔ bɛkɔhɔ anwuro hɔ? Nea kumaa nu yeɛ ɛkosa kɔhɔ ɔ.

16 "Ebiala bɔ otie ɛmɔ ne, watie me. Na ebiala bɔ obu ɛmɔ animtia ne, wabu me animtia. Afei, ebiala bɔ obu me animtia ne, obu bɔ ɔsomane me ne animtia."

17 Asuafoɛ 72 ne fale anigye wale, na bɛhane kyɛ: "Awurade, wɔ dumaa bɔ yɛbɔle nati, sunzummɔne mɔ po brɛle bɛ nwo ase mane yɛ." 18 Na Yesu ha hyirele bɛ kyɛ: "Manwu kyɛ Satan fi anwuro afi ase te kyɛ agralaa. 19 Nea, mama ɛmɔ tumi kyɛ ɛmɔ tietia ɛwoo ne anyanyangyeleɛ mɔ po so, na mama ɛmɔ tumi bɔ ɛmɔ kɔfa bɛkoli ɔtamfo naso ɔ, na nikye fee ngɔyɛ ɛmɔ. 20 Nakoso nnɛmɔ di ahurusi kyɛ honhom mɔ po abrɛ bɛ nwo ase ama ɛmɔ, mmom ɛmɔli ahurusi kyɛ bahworɔ ɛmɔ dumaa wɔ anwuro."

21 Sɔ mmerɛ nanu ala, honhom krongron wale Yesu so, na ye nye gyele paa maa ɔhane kyɛ: "Baba, anwuro ne aseɛ Wura, meye wɔ ayɛ wɔ badwanu, ofikyɛ afa ɛhe afea anyanzafoɛ ne animdefoɛ, na aye ye ali ahyire ngwalaa mmaa-mmaa. O Baba, ɔte nahorɛ, ofikyɛ ɛhe yeɛ ɔsɔ wɔ nye ɔ. 22 Me Baba afa nikye biala awura me sa, na ebiala nne berɛ bɔ ɔse kyɛbɔ Baa ne te ɔ, sana Baba ne, yeɛ ebiala nze kyɛbɔ Baba ne te ɔ, sana Baa ne, ɔne ebiala bɔ Baa ne pena kyɛ ɔye ye ali kyire ye ne."

23 Yeɛ ɔkakyile ye nye hyirele asuafoɛ ne ha hyirele bɛ ngome kyɛ: "Anigye yeɛ ole anyeɛ bɔ onwu bɔ ɛmɔnwu ye ne. 24 Ofikyɛ meka mekyire ɛmɔ kyɛ, né adiifoɛ ne ahemvo pee pena kyɛ bɛnwu bɔ ɛmɔnwu ye ne, nakoso bannwu ye; na ne bɛpena kyɛ bɛte bɔ ɛmɔte ne, nakoso bannde."

25 Afei nea, ebie bɔ ɔse mmeraa nanu paa dwɔso gyinane kyɛ ɔbaasɔ ye nea, na ɔhane kyɛ: "Kyerɛkyerɛniɛ, nzu yeɛ meyɛ a, ngonya daa ngoa ɔ?" 26 Yesu bisale ye kyɛ: "Nzu yeɛ bahworɔ ye wɔ mmeraa nanu ɔ? Ɛkenga a, yenwa nzɛ?" 27 Yeɛ ɔyele ye noa kyɛ: " ‘Odikyɛ ɛfa w’ahone mukoraati, wɔ kra mukoraati, w’anwoserɛ mukoraati, ne w’adwene mukoraati dɔ Awurade wɔ Nyameɛ’ na ‘odikyɛ ɛdɔ wɔ mmango te kyɛ wɔ nwo.’ " 28 Yesu ha hyirele ye kyɛ: "Apɛ; yɛ ɛhe na ekonya ngoa."

29 Nakoso ne ɔpena kyɛ obu ye nwo bem, yeti obisale Yesu kyɛ: "Nwa yeɛ ɔte me mmango ɔ?" 30 Yesu mane ye mmuayɛ kyɛ: "Né biaa bie fi Yerusalem ɔtro kɔ Yeriko, na ɔɔtɔle awiefoɛ nu maa bɛyele ye ndadeɛ mukoraati bɛbole ye bɛyakyile ye berɛ bɛhɔle, bɔ né wawu wayie. 31 Na bɔ ɔwale yeɛ ole kyɛ, né sɔfo bie nate sɔ atee naso, onwuni ye ne, ɔfale nekaa bie hɔle. 32 Lewiniɛ bie koso fale berɛ, onwuni ye ne, ɔfale nekaa bie hɔle. 33 Nakoso Samarianiɛ bie bɔ otu atee fitele biaa naso, ye nye bɔle ye so ne, ɔyɛle ye anwunvo. 34 Yeti ɔhɔle ye nwo berɛ, na ɔfale ngoo ne nzãa guale ye kena nanu, yeɛ ɔkyekyele so ɔ. Oyiele ne, ɔfale ye tole ye bɔbɔ ye kaka so fale ye hɔle ɛwɔfoɛ sua bie nu ɔɔneane ye. 35 Aleɛ hene ne, ɔyele dɛnare nyɔ mane sona bɔ ɔnea ɛwɔfoɛ sua naso ne, yeɛ ɔha hyirele ye kyɛ: ‘Nea ye, na kerɛ biala bɔ ye si ne ɛkɔbɔ ne, meba a, ngotua ngɔma wɔ.’ 36 Sɔ mmenia nza he, ɛnea a nwa yeɛ ohyirele kyɛ ɔte biaa bɔ awiefoɛ bole ye ne mmango ɔ?" 37 Ɔhane kyɛ: "Bɔ onwuni ye anwunvo ne." Yeɛ Yesu ha hyirele ye kyɛ: "Wɔ koso kɔ, na kɔyɛ sɔ ala."

38 Mmerɛ bɔ bɛnate atee so bɛkɔ ne, ɔhɔle nnamue bie nu, na maame bie bɔ bɛfrɛ ye Marta lɛle ye hɔle ye awuro. 39 Né oliema brasua bie bɔ bɛfrɛ ye Mary wɔ berɛ, na ye de, né ɔte Awurade gya bo, na ne otie ye ngyerɛkyerɛ ne. 40 Nakoso Marta de, né adwuma pee alɛ́ ye adwene. Yeti ɔhɔle Yesu berɛ ha hyirele ye kyɛ: "Awurade, ɛnnwu ye kyɛ nniema ne ayakyi nikye biala abɔ me so ne? Ka kyire ye kyɛ ɔɔboka me." 41 Nakoso Awurade ha hyirele ye kyɛ: "Marta, Marta, ɛdwene soma, na ɛfa nningyein pee ha wɔ nwo soma, 42 nakoso enu kaa bie yeɛ ye nwo hia ɔ. Mary de, wafa nikye pa ne, na bɛngole bɛngofi ye sa nu lle."