1 Sɔ mmerɛ ne, bɛ bɔ bɛwɔ berɛ nanu bie hane Galileafoɛ bɔ Pilato fale bɛ mogya bɔle afɔleɛ nanwo dwirɛ hyirele Yesu. 2 Yeɛ ɔha hyirele bɛ kyɛ: "Galileafoɛ bɔ bɛnwuni sɔ amaneɛ ne, ɛmɔnea a, né bɛte abɔnefoɛ bɛtra Galileafoɛ bɔ baha namukoraati? 3 Meka mekyire ɛmɔ kyɛ, ɔtte sɔ. Na sɛ ɛmɔ anzakra a, ɛmɔ koso bɛkɔsɛkye ɛmɔ. 4 Anaa mmenia 18 bɔ Siloam aborosaen ne bu guale bɛ so ne, ɛmɔnwu ye kyɛ bɛte abɔnefoɛ bɛtra Yerusalemfoɛ mukoraati hɔ? 5 Meka mekyire ɛmɔ kyɛ, ɔtte sɔ koraa. Na sɛ ɛmɔ anzakra a, ɛmɔ koso bɛkɔsɛkye ɛmɔ."

6 Yeɛ Yesu yɛle mvandoho bie hyirele bɛ kyɛ: "Ne biaa bie le borɔdoma wɔ ye bobe boo nu. Ɔhɔle kyɛ ɔkɔnea sɛ okonya mmaa wɔ so a, nakoso ɔhɔle ne, né hwee nne so. 7 Yeti ɔha hyirele bɔ ɔnea ɛboo naso ne kyɛ, ‘Afoɛ nza ɛhe, meba wa biala kyɛ mebaapena mmaa wɔ sɔ borɔdoma he aso a, mennya bie. Yeti, bu ye to! Nzuati yeɛ odikyɛ odɛ m’aseɛ ne bɔ so ɔ?’ 8 Yeɛ bɔ ɔnea ɛboo naso ne ha hyirele ye kyɛ, ‘Me wura, ma ogyina berɛ afoɛ kõ boka so, ngɔtutu ye bo, na mafa fɛtelaza magua ye bo. 9 Sɛ afoɛ bieku osu mmaa a, ye de pa nekaa ɔ. Na sɛ wanzu a, ɛkɔhora kobu ye kɔto.’ "

10 Homeda bie, né Yesu yɛ ngyerɛkyerɛ wɔ sua bɔ beyia nu nanu. 11 Né maame bie wɔ berɛ bɔ sunzummɔne afa anwonyerɛ ato ye so afoɛ buru ne mmɔtwɛ. Né yenu akondo, yeti ne ɔngora yenu tengyɛ koraa. 12 Yesu nwuni ye ne, ɔfrɛle ye, yeɛ ɔha hyirele ye kyɛ: "Maame, male wɔ mafi wɔ anwonyerɛ nanu." 13 Yeɛ ɔfale ye sa tole ye so, na ɛberɛ nala, ɔtengyɛle yenu, na ɔhyɛle yebo kyɛ ɔye Nyameɛ ayɛ. 14 Nakoso, né ɔyɛ bɔ ɔnea sua bɔ beyia nu naso né ahi kyɛ Yesu asa anwonyerɛ homeda. Yeti ɔha hyirele mmenia ne kyɛ: "Ɛlɛsia yeɛ odikyɛ yɛfa yɛyɛ adwuma ɔ, yeti ɛyɛ a ɛmɔbra ma bɛsa ɛmɔ anwonyerɛ sɔ ngyẽa nemɔ, ná ɔtte homeda ne." 15 Yeɛ Yesu hane kyɛ: "Nyaatwomfoɛ, sɛ odwu homeda a, nnaa ɛmɔ nu biala sangye ye nandwie anaa ye afunum fi buye nu kɔma ye nzue, melaka? 16 Ye de, bɔne beni yeɛ ɔwɔ ye nwo kyɛ, bɛkɔsangye Abraham awa brasua bɔ Satan akyekye ye afoɛ 18 ne homeda ɔ?" 17 Ɔhane ɛhe ne, né ye atamfo namukoraati afɛle; na mmenia ne hyɛle yebo lili ahurusi wɔ nningyein mbiri–mbiri bɔ ɔyɛ nanwo.

18 Yeti ɔha hyirele bɛ kyɛ: "Nyameɛ Ahennie ne, sɛɛ yeɛ ɔte ɔ? Na nzu po yeɛ mva ndoto ye nwo ɔ? 19 Ɔte kyɛ sinapi aba bɔ biaa bie luale ye wɔ ye boo nu. Onyi yɛle bakaa kandinga maa ewienu no nnomaa yɛle bɛ buye wɔ ye sa mmaa naso."

20 Na osa hane kyɛ: "Na nzu po yeɛ mva ndoto ye nwo ɔ? 21 Ɔte kyɛ yiste bɔ maame bie fa frale esam olonka nza maa ye mukoraati tuli ɔ."

22 Afei otuli atee hɔle nguro ne nnamue nemɔ nu yɛle ngyerɛkyerɛ, na ɔtoale so kyɛ ɔkɔ Yerusalem. 23 Yeɛ ebie bisale ye kyɛ: "Awurade, mmenia kaa bie yeɛ bekonya ngoa hɔ?" Yesu yele yenoa kyɛ: 24 "Yɛ bɔ ɛkɔhora biala wura anoa kamba nanu; meka mekyire wɔ kyɛ, mmeni pee kɔbɔ mmɔden kyɛ bɛwura nu, nakoso bɛngɔhora. 25 Sɛ efiewura ne dwɔso to anoa nanu a, ɛberɛ yeɛ ɛmɔ kogyina anoa ne si bɛkɔbɔ nu, na ɛmɔ aha kyɛ, ‘Me wura, bukye yɛ.’ Nakoso ɔkɔha kohyire ɛmɔ kyɛ: ‘Menze nekaa bɔ ɛmɔfi ɔ.’ 26 Na ɛmɔ kɔhyɛ yebo bɛkɔha kyɛ: ‘Wɔ nyunu yeɛ né yɛdidi yɛno ɔ, na ne ɛyɛ ngyerɛkyerɛ wɔ y’atee naso.’ 27 Nakoso ɔkɔha kyɛ: ‘Meka mekyire ɛmɔ kyɛ, menze nekaa bɔ ɛmɔfi ɔ. Ɛmɔfi me so bɛhɔ, ɛmɔ bɔ ɛmɔyɛ bɔne mukoraati bie ne.’ 28 Na sɛ ɛmɔnwu ye kyɛ, Abraham, Isaac, Yakob, ne adiifoɛ namukoraati wɔ Nyameɛ Ahennie nanu, bɔ ɛmɔ de bafoa ɛmɔ ne a, ɛberɛ yeɛ ɛmɔ kosu na ɛmɔ anwose ɛmɔ gye ne. 29 Mmenia kofi afiteleɛ, atɔleɛ, sorɔ, ne ngwan koodidi wɔ Nyameɛ Ahennie nanu. 30 Nakoso bɔ ɔte yeɛ ole kyɛ, bɛ bɔ baha siɛ ne bie koli moa, na bɛ bɔ bali moa ne bie aha siɛ."

31 Sɔ mmerɛ nala nu ne, Farisifoɛ nemɔ bie wale ye berɛ, na bɛha bɛhyirele ye kyɛ: "Fi wa kɔ, ofikyɛ Herode nya wɔ a, okohu wɔ." 32 Nakoso ɔha hyirele bɛ kyɛ: "Ɛmɔhɔ bɛɛha behyire sɔ kangane ne kyɛ, ngɔhɔ so ngotu sunzummɔne na masa anwonyerɛ ɛnɛ ne ɛhema, na kyẽa bɔ ɔtɔ so nza ne yeɛ ngoyie m’adwuma ɔ. 33 Nakoso ɛnɛ ne ɛhema ne kyẽa bɔ oli berɛ ne de, odikyɛ metoa m’akwanduo naso; ofikyɛ sɛ bekohu diifoɛ bie a, odikyɛ beku ye wɔ Yerusalem. 34 O Yerusalem, Yerusalem, wɔ bɔ ɛku adiifoɛ na ɛsi bɛ bɔ nzomane bɛ wɔ berɛ ne nyɔboɛ! Nea mmerɛ dodoɔ bɔ mmɔle mmɔden kyɛ ngɔboɔboa wɔ mmaa mɔ noa, kyɛbɔ akɔ-taen boɔboa ye mmaa noa wɔ ye ndaa bo ne, nakoso ambene. 35 Nea, bayakyi ɛmɔ awuro ne bama ɛmɔ. Na meka mekyire ɛmɔ kyɛ, ɛmɔ ngonwu me kõ kodwu kyɛ ɛmɔkɔha kyɛ: ‘Anigye yeɛ ole bɔ ɔba Awurade dumaa nu ne.’ "