1 Na mmenia bɔ bɛwɔ berɛ namukoraati dwɔsole, na bɛfale ye bɛhɔle Pilato berɛ. 2 Yeɛ bɛhyɛle yebo bɛbɔle ye sommoɛ kyɛ: "Yanwu kyɛ sɔ biaa he tutu maen bo; ɔka kyire mmenia ne kyɛ nnɛmaa betua toɔ bɛma Kaesare; afei koso, yenwa ye yeɛ ole ɔhene* Kristo ne." 3 Yeɛ Pilato bisale ye kyɛ: "Wɔ yeɛ ele Yudafoɛ hene ne?" Na ɔyele ye noa kyɛ: "Ye ala yeɛ aha ne." 4 Yeɛ Pilato ha hyirele sɔfo mbanyi ne né mmenia ne kyɛ: "Mennwu mvomsoɛ biala wɔ biaa he anwo." 5 Nakoso bɛhane ye kitii kyɛ: "Ɔnate ye ngyerɛkyerɛ naso amaa mmenia ate atua wɔ Yudea mukoraati, ɔhyɛle yebo wɔ Galilea, na wafa wawa ɛwa koso."

6 Pilato tele ɛhe ne, né ɔpena kyɛ onwu kyɛ biaa ne te Galileaniɛ a. 7 Onwuni kyɛ sãa ofi nekaa bɔ Herode di tumi ne, yeti ɔmaa bɛfale ye bɛɛmane Herode, sɔ mmerɛ ne, né ɔwɔ Yerusalem. 8 Herode nwuni Yesu ne, ye nye gyele paa. Bɔ ɔte yeɛ ole kyɛ, ne watete ye nwo dwirɛ pee, ɛhene ati ne ɔpena kyɛ onwu ye, na ne ye nye la so kyɛ ɔkɔyɛ nzɛngyerɛneɛ bie maa okonwu ye. 9 Yeti obisale ye dwirɛ pee, nakoso Yesu amma ye mmuayɛ biala. 10 Né sɔfo mbanyi ne atwerɛfoɛ nemɔ wɔ berɛ, na ne bɛ nye aboro bɛbɔ ye sommoɛ. 11 Na Herode ne ye sogyafoɛ nemɔ guale ye nyunu ase, na bɛgorole ye nwo. Beyiele ne, bɛfale atadeɛ kama-kama bie bɛwurale ye, yeɛ ɔmaa besa bɛfale ye bɛɛmane Pilato. 12 Sɔ kyẽa nala, Herode ne Pilato fale adamvoa; daa ne de, né bɛnga.

13 Pilato frɛle sɔfo mbanyi ne, kuro nanu mbanyi ne mmenia namukoraati, 14 yeɛ ɔha hyirele bɛ kyɛ: "Ɛmɔ fale biaa he bɛwale ne, ɛmɔnwa ɔmaa mmenia te atua. Na ɛmɔtie, ɛmɔ nyunu wala yeɛ nneɛneane ye dwirɛ nu ɔ, nakoso kwaadu bɔ ɛmɔ afa babɔ ye ne, komapɛ po nne berɛ bɔ odi ye nwo fɔ ɔ. 15 Herode koso annwu mvomsoɛ biala wɔ ye nwo, yeti wasa wafa ye wabrɛ yɛ. Ɛmɔtie, ɔyɛlle nikye biala bɔ odikyɛ bɛku ye ɔ. 16 Yeti ngɔhwe ye so, na mayakyi ye." 17 *—

18 Nakoso bɛ mukoraati bɛteɛteane nu kyɛ: "Ku sɔ biaa he, na yakyi Barabas ma yɛ." 19 Ne sɔ Barabas ne la prizin, ofikyɛ ne waboka maa mmenia ate atua atia awaen ne, afei koso né ɔte wudiniɛ. 20 Pilato sa ha hyirele bɛ kyɛ ɔpena kyɛ ɔyakyi Yesu, 21 nakoso bɛteɛteane nu kyɛ: "Bɔ ye asɛnnua nu! Bɔ ye asɛnnua nu!" 22 Yeɛ ɔha hyirele bɛ pɛn nza so kyɛ: "Nzu ɔ? Bɔne beni yeɛ wayɛ ɔ? Me de mennwu nikye biala wɔ ye nwo bɔ odikyɛ meku ye ɔ. Yeti ngɔhwe ye so, na mayakyi ye." 23 Nakoso né bɛ nye aboro, na ne bɛteɛtea nu kyɛ ɔbɔ ye asɛnnua nu. Afei de, né bɛ dede ne abo ye so. 24 Yeti Pilato le tole nu kyɛ ɔkɔyɛ bɔ bɛpena ne kɔma bɛ. 25 Ɛhene ati, biaa bɔ ne wate atua watia awaen, na wasa wahu ebie ne, ɔyakyile ye mane bɛ, ofikyɛ ɛhene yeɛ ne bɛpena ɔ, na Yesu de, ɔfale ye mane bɛ kyɛ bɛhu ye.

26 Yeti bɛfale Yesu bɛhɔle, bɛnate atee so ne, bɛnwuni Simon bɔ ofi Kiren ne kyɛ ɔba Yerusalem, na bɛhyɛle ye kyɛ ɔsoa asɛnnua ne li Yesu si. 27 Né mmeni pee li ye si, na né mmrasua bɔ bɛpɛ awuye na bɛsu bɛma ye boka so. 28 Nakoso Yesu kakyile ye nwo ha hyirele bɛ kyɛ: "Yerusalem mmrasua, nnɛmɔ su bɛma me, mmom ɛmɔsu bɛma ɛmɔ nwo ne ɛmɔ mmaa mɔ. 29 Ofikyɛ mmerɛ bie ba, na mmenia kɔha kyɛ, ‘Anigye yeɛ ole bonini, ne koɛ bɔ wanwo lle, ne nyɔfone bɔ banno ye noa lle ne.’ 30 Na bɛkɔha bɛkohyire mmokaa nemɔ kyɛ, ‘Ɛmɔ dwiri bɛgua yɛ so’, na baha bahyire esire nemɔ kyɛ, ‘Ɛmɔ kata yɛ so.’ 31 Bakaa ne te monɛ ne po yeɛ bɛyɛ ɛhe ne, ye de sɛ owu a, nzu yeɛ bɛkɔyɛ ɔ?"

32 Bɛkwaabɔ Yesu asɛnnua nu ne, bɛfale mmrienzua nyɔ bɛbokale ye so. Né sɔ mmrienzua ne te abɔnefoɛ. 33 Bɛdwuli nekaa bɔ bɛfrɛ berɛ Tire Kokuroka ne, bɛbɔle ye asɛnnua nu, na bɛbɔle abɔnefoɛ nyɔ ne koso asɛnnua nu, né kõ wɔ ye famaa, yeɛ né kõ wɔ ye bɛen. 34 Yeɛ Yesu hane kyɛ: "Daa, fa kyɛ bɛ, ofikyɛ bɛnze bɔ bɛyɛ ɔ." Afei bɛtɔɔsole * bɛhyɛle ye atadeɛ nanu. 35 Na mmenia nemɔ gyinane berɛ neane ye, nakoso mbanyi nemɔ gorole ye nwo kyɛ: "Né odɛ́ amanvoɛ, sɛ yeɛ ole Kristo bɔ Nyameɛ aye ye ne a, maa ole ye nwo." 36 Sogyafoɛ nemɔ koso gorole ye nwo; na bɛwale ye nwo berɛ bɛɛfale nzãa bɔ enu ka po bɛmane ye, 37 yeɛ bɛhane kyɛ: "Sɛ wɔ yeɛ ɛle Yudafoɛ hene ne a, de wɔ nwo!" 38 Né basa bahworɔ edwirɛ bie bagua ye tiafia berɛ kyɛ:

ƐHE YEƐ OLE YUDAFOƐ HENE NE.

39 Abɔnefoɛ bɔ babɔ bɛ asɛnnua nu ne, bɛ nu kõ hyɛle yebo bɔle ye alapaa kyɛ: "Nná wɔ yeɛ ɛle Kristo ne? De wɔ nwo na de yɛ ee!" 40 Nakoso kõ ne hwili ye nyunu kyɛ: "Sãa ɛnzuro Nyameɛ? Atemmuo bɔ bafa bama ye ne, ɛnwu ye kyɛ ebiala yeɛ bafa bama yɛ ne? 41 Yɛ deɛ ne de, yala ne, ofikyɛ bɔ yɛyɛle nanwo asotwe yeɛ bafa bama yɛ ne. Nakoso ye de, ɔyɛlle bɔne biala." 42 Yeɛ ɔhane kyɛ: "Yesu, sɛ ɛba w’Ahennie nu a, ɛyɛ a kaye me." 43 Yesu koso ha hyirele ye kyɛ: "Nahorɛ bɔ meka mekyire wɔ ɛnɛ ole kyɛ, ɛkɔboka me so wɔ paradise."

44 Né wabɔ kɔyɛ eyia 12:00,* na aseɛ naso mukoraati yɛle tumm tonn maa ɔbɔle eyia 3:00,* 45 ofikyɛ eyia ne nuane. Na kɛtens bɔ ɔsa asɔre awuro berɛ nanu ne tele nyɔ. 46 Yeɛ Yesu teane nu kyɛ: "Daa, wɔ sa nu yeɛ mefa me honhom mewura ɔ!" Ɔhane sɔ ne ala pɛ, ɔyakyile nu. 47 Sogyaniɛ panyi ne nwuni bɔ wasi ne, ɔyele Nyameɛ ayɛ hane kyɛ: "Amba, sɔ biaa he te teneneeniɛ." 48 Na mmerɛ bɔ mmenia bɔ bɛwɔ berɛ namukoraati nwuni bɔ wasi ne, besa bɛhɔle awuro, bɛkɔ namu, né bɛfa bɛ sa bɛbobɔ bɛ hue so. 49 Na bɛ bɔ bɛse ye namukoraati, ne mmrasua bɔ bɛne ye fili Galilea wale namukoraati gyinane dede, yeɛ ne bɛnea bɔ ɔkɔ so ɔ.

50 Né biaa bie wɔ berɛ bɔ bɛfrɛ ye Yosef, né ɔboka badwa naso, na ne ɔte teneneeniɛ. 51 Ye de, ne ɔmbene bɛ gyinayɛ ne bɛ nneyɛɛ naso. Né ofi Yudafoɛ kuro Arimatea nu, na ne onwondɛ Nyameɛ Ahennie ne. 52 Ɔhɔle Pilato berɛ ɔɔsrɛle Yesu fuin ne. 53 Yeti ɔyele fuin ne fili asɛnnua naso, na ɔfale nwera kyekyele ye nwo, yeɛ ɔfale ye tole asieleɛ bɔ bapɛ ye wɔ nyɔboɛ nu; sɔ asieleɛ ne, ne bɛfalle ebiala bɛtolle nu lle. 54 Né sɔ kyẽa ne te Anwoboaboa Kyẽa, na ne waha kaa maa Homeda ne hyɛ yebo. 55 Mmrasua bɔ bɛne Yesu fili Galilea wale ne lili Yosef si, bɛnwuni asieleɛ ne, na bɛnwuni kyɛbɔ bɛfale ye fuin ne bɛtole nu ne. 56 Besa bɛhɔle bɛɛyɛle ayire ne sakyeɛ bɔ bɛkɔfa bɛkɔpopa fuin ne. Homeda ne, bɛlɛle bɛ nwomeɛ, kyɛbɔ mmeraa ne kyire ne.