1 Nixtáa ná xuajen Sesaréa̱ mbáa xa̱bo̱ tsí mbiꞌyuu Kornélio̱, tsí naꞌthán-ñájúún tsí ku̱ra̱tuun ajwa̱nꞌ, kuthuun tsí mbiꞌñúú «tsí naguwá ná Itália̱». 2 Ikhaa xa̱bo̱ tsúꞌkhue̱n májáan a̱kuii̱n jamí naꞌne-mba̱a̱ Ana̱ꞌlóꞌ gajmíi̱ mbá xúgíin xa̱bo̱ guꞌwóo̱. Xúꞌkhue̱n máꞌ phú nambáñúu̱ xa̱bo̱ xuajen tsí ngíníi, jamí tsitsíí naꞌthán-jáñuu̱ Ana̱ꞌlóꞌ. 3 Mbá mbiꞌi, naꞌne xó mbá atsú wáa i̱ka̱ ajwa̱nꞌ rí wakhíí, xa̱bo̱ tsíge̱ꞌ ndiꞌyoo inu-mbiꞌíí rí mbáa ánje̱l tsí nixúngua̱a̱ꞌ Ana̱ꞌlóꞌ na̱to̱ꞌo̱o̱ ná gíde̱e̱ꞌ, jamí naꞌthúu̱n:

—Kornélio̱.

4 Xómáꞌ ikhaa̱, mbóó wájun iduu̱ rí nayaxu̱u̱, jamí ga̱jma̱á ngamí niraxu̱u̱:

—Dí máꞌ iyaaꞌ rá, Táta̱.

A̱ꞌkhue̱n niriꞌña ánje̱l:

—Ana̱ꞌlóꞌ nidxawaa̱nꞌ máꞌ rí narathán-jáñíi̱ ga̱jma̱á numuu, jamí ni̱grui̱guíi̱ máꞌ rí xómá tsi̱gi̱jña̱ꞌ jaꞌnii, rí natambáñúú xa̱bo̱ tsí ngíníi. 5 Ikhaa jngó, ataxúꞌmii mbá tikhuun xa̱bo̱ magóó ná xuajen Jópe̱, kajngó mutháa̱n xa̱bo̱ tsí mbiꞌyuu Simón ma̱ꞌkha̱, tsí nutháa̱n Pédro̱. 6 Ikhaa̱ xtáa̱ ná guꞌwóo mbáa xa̱bo̱ tsí mbiꞌyuu Simón, tsí nañajun ga̱jma̱á xtúún xu̱kú, tsíge̱ꞌ ꞌgí guꞌwóo ná mijngi rawuun iya a̱pha̱. Ikhaa̱ maꞌtháa̱nꞌ rí ndaꞌyóo ma̱tha̱ne̱.*

7 Ído̱ ni̱ka̱a ánje̱l tsí nandxákuun ga̱jma̱á Kornélio̱, a̱ꞌkhue̱n nindxaꞌwúu̱n a̱jmi̱i yumbée̱, jamí mbáa xa̱bo̱ tsí kuatuun ajwa̱nꞌ, tsí naꞌne-mba̱a̱ Ana̱ꞌlóꞌ jamí jmbii naꞌne-mbánuu ñajun ná inuu̱. 8 Ikhiin tsúꞌkhue̱n niꞌthúu̱n mbá xúgíí rí waꞌtháa̱n neꞌne ánje̱l, a̱ꞌkhue̱n nixuꞌmii̱ magóó ná xuajen Jópe̱.

9 I̱mba̱ mbiꞌi, awúun máꞌ rí ikhii̱n nagóo̱ ná jamba̱a̱ jamí nangiyuu máꞌ ma̱guáꞌnii̱ ná xuajen, a̱ꞌkhue̱n Pédro̱ nitsimuu ná tsu̱du̱u̱ guꞌwá kajngó maꞌthán-jáñuu̱ Ana̱ꞌlóꞌ, rí xó mbá wakha̱ꞌ niníí wáa eꞌne. 10 A̱ꞌkhue̱n ni̱gi̱ꞌma ni̱xki̱dxu̱u̱ mi̱ndaꞌkho, jamí neꞌne a̱kuii̱n ma̱kuiꞌtsii̱. I̱ndo̱ó máꞌ numuu rí awúun máꞌ rí na̱gu̱ma-mújúun rí mi̱khui̱i̱, a̱ꞌkhue̱n ni̱ꞌkha̱ inu-mbiꞌíí mbá rí ndiꞌyoo̱. 11 Ndiꞌyoo̱ rí ja̱ma̱ꞌtha mikhu, jamí na̱ga̱taa mbá rí xómá xtíin wapa jaꞌnii, xtoꞌwóo mbá nákho̱ rakhóo ne̱ rí na̱ga̱taa ne̱ asndo mbayíí. 12 Jamí ná awúun ne̱ gatiin mbá xúgíí inii xu̱kú tsí akho̱ nakhúún, xu̱kú tsí nu̱xma̱ta-mijná jamí xu̱kú xna. 13 A̱ꞌkhue̱n nidxawuu̱n mbá a̱ꞌwá rí niꞌthán:

—Pédro̱, a̱tu̱xa̱a̱ꞌ, aradíin xu̱kú tsúꞌkhue̱n mi̱ꞌtsúún.

14 A̱ꞌkhue̱n Pédro̱ niꞌthán:

—Táta̱, ma̱xíꞌkhúu̱nlo̱ꞌ ikhúúnꞌ. Numuu rí nimbá miꞌtsú téꞌkholo̱ꞌ ganitsu rí xkawe̱ꞌ o rí ra̱jáꞌyoo me̱ꞌkholo̱ꞌ mbo̱ꞌ.

15 A̱ꞌkhue̱n nidxawuu̱n mbu̱júꞌ a̱ꞌwá:

—Rí Ana̱ꞌlóꞌ neꞌne-jaꞌwu̱u, ma̱xára̱tha̱n ikháánꞌ rí xkawe̱ꞌ ne̱.

16 Atsú nothon niríga̱ ríge̱ꞌ. A̱ꞌkhue̱n waꞌyáa xtíin wapa rúꞌkhue̱n ni̱ka̱a mikhuíí.

17 Awúun máꞌ rí Pédro̱ xtáa nandxaꞌwá-mina̱ꞌ dí iyoo gáꞌthán rí ndiꞌyoo̱ inu-mbiꞌíí, a̱ꞌkhue̱n niguáꞌnú ná rawuun xkrugua xa̱bo̱ tsí nixúngui̱inꞌ Kornélio̱, numuu rí naguwée̱ꞌ-ru̱ra̱xi̱i̱ náá ꞌgí guꞌwóo Simón. 18 A̱ꞌkhue̱n ni̱ndxa̱ꞌwa̱-raꞌee̱, ni̱ra̱xi̱i̱ xí ikhín xtáa mbáa xa̱bo̱ tsí mbiꞌyuu Simón, ikhaa tsí nutháa̱n Pédro̱ mangaa.

19 Jamí awúun máꞌ rí Pédro̱ xóó xtáa nandxaꞌwá-mina̱ꞌ rí ndiꞌyoo inu-mbiꞌíí, a̱ꞌkhue̱n waꞌtháa̱n neꞌne Xu̱u̱ꞌ Ana̱ꞌlóꞌ: «A̱ꞌkhue̱n wájun atsúun xa̱bo̱ tsí nduꞌñáá. 20 Ikhaa jngó, a̱tu̱xa̱a̱ꞌ jamí adxutaaꞌ gátha̱ñúu̱. Jamí ma̱xáꞌne a̱jma̱ a̱kia̱anꞌ rí mi̱dxo̱ꞌ ga̱jma̱á nindxúu̱n, numuu rí ikhúúnꞌ ni̱xu̱ꞌmíi̱ ma̱guwée̱ꞌ».

21 A̱ꞌkhue̱n Pédro̱ ni̱ga̱taa ná wájun xa̱bo̱ tsí nixúꞌmii Kornélio̱ jamí niꞌthúu̱n:

—Ikhúúnꞌ ñajunꞌ xa̱bo̱ tsí ndu̱ꞌyáalaꞌ. Náá numuu kajngó niguwalaꞌ róꞌ.

22 A̱ꞌkhue̱n ikhii̱n nithee̱n:

—Xa̱bo̱ nikhi̱i̱ Kornélio̱ tsí naꞌthán-ñájúún tsí ku̱ra̱tuun ajwa̱nꞌ nixuꞌmáaꞌxo̱ꞌ. Ikhaa̱ ñajuu̱n mbáa xa̱bo̱ tsí jmbii jamí ndaya-makuu Ana̱ꞌlóꞌ, xúꞌkhue̱n máꞌ máján kri̱ga̱ ajngáa ga̱jma̱á numuu̱ ná xuajñúú xa̱bo̱ judío̱. Mbáa ánje̱l tsí nixúngua̱a̱ꞌ Ana̱ꞌlóꞌ waꞌtháa̱n neꞌne rí mandxaꞌwáaꞌ mi̱dxo̱ꞌ ná guꞌwóo̱ kajngó madxawuu̱n rí ma̱ra̱tháa̱n.

23 A̱ꞌkhue̱n Pédro̱ niꞌthúu̱n rí ma̱nújngúu̱n guꞌwáá kajngó mbuya̱a xúu̱nꞌ. Jamí i̱mba̱ mbiꞌi ni̱tu̱xu̱u̱ꞌ Pédro̱ ni̱ka̱ ga̱jma̱á nindxúu̱n, xúꞌkhue̱n máꞌ nigóó mbá tikhuun a̱ngia̱nꞌlóꞌ tsí júwa̱ꞌ ná Jópe̱ ga̱jma̱á nindxu̱u̱.

24 Asndo i̱mba̱ mbiꞌi niguáꞌníi̱ ná xuajen Sesaréa̱. Xómáꞌ Kornélio̱ gíꞌthu̱u̱n máꞌ gajmíi̱ a̱nguii̱n tsí nindxaꞌwúu̱n ma̱guwá, xúꞌkhue̱n máꞌ iyanga̱jwee̱ tsí phú nambáxu̱u̱ꞌ gajmíi̱. 25 Ído̱ ni̱ga̱nú Pédro̱ ná guꞌwá, a̱ꞌkhue̱n nigájnuu Kornélio̱ kajngó ma̱grui̱guíi̱, jamí nismáti̱go̱o̱ ná nakhúu Pédro̱ rí ndiya-makuu̱. 26 Xómáꞌ Pédro̱ nixúxii̱, jamí niꞌthúu̱n: «Ariajún, numuu rí xa̱bo̱ numbaa máꞌ ñajunꞌ mangúúnꞌ, xómá rí ikháánꞌ». 27 Awúun máꞌ rí Pédro̱ nandxákuun ga̱jmáa̱ nindxu̱u̱ Kornélio̱, ni̱to̱ꞌo̱o̱ guꞌwáá, a̱ꞌkhue̱n ndiꞌyoo̱ rí phú mbaꞌiin xa̱bo̱ ni̱gi̱mbúun.

28 A̱ꞌkhue̱n niꞌthúu̱n xa̱bo̱:

—Ikháanꞌ ndu̱ya̱álaꞌ rí phú ra̱máján iꞌyoo mbáa xa̱bo̱ judío̱ rí ma̱mbáxu̱u̱ꞌ ga̱jmáa̱ mbáa xa̱bo̱ tsí ra̱ꞌkháa judío̱ ñajuun o ma̱ꞌgee̱ ná guꞌwóo mbo̱ꞌ. Xómáꞌ ikhúúnꞌ nisngájmiꞌ Ana̱ꞌlóꞌ rí asndo nimbáa xa̱bo̱ ma̱xátha̱n rí ra̱májáa̱n o rí xkawi̱i̱ꞌ mbo̱ꞌ. 29 Ikhaa jngó, ído̱ ni̱dxawuun rí nu̱ndxa̱ꞌwo̱ꞌlaꞌ, mbá nacha̱ máꞌ niꞌkhalo̱ꞌ, nimbá máꞌ ajngáa táne̱lo̱ꞌ. Ikhaa jngó na̱ra̱xa̱ꞌlaꞌ, náá numuu kajngó ni̱ndxa̱ꞌwo̱ꞌlaꞌ rí ma̱ꞌkha róꞌ.

30 A̱ꞌkhue̱n Kornélio̱ niꞌthán:

—Naꞌne máꞌ akho̱ mbiꞌi rí xúge̱ꞌ, xíríga̱a̱ máꞌ, xtáá ná guꞌwóꞌ ge̱jyoꞌ na̱ne̱-miꞌkhíi.* Awúun máꞌ rí xtáá na̱tha̱n-jáñuu Ana̱ꞌlóꞌ rí atsú i̱ka̱ ajwa̱nꞌ rí wakhíí, a̱ꞌkhue̱n ndi̱yo̱o̱ wéje̱ mbáa xa̱bo̱ tsí nambiꞌi-taꞌa xtíñuu ná inuꞌ. 31 Jamí niꞌthínꞌ: "Kornélio̱, nidxawuun máꞌ Ana̱ꞌlóꞌ rí narathán-jáñíi̱ ga̱jma̱á numuu, jamí ni̱grui̱guíi̱ máꞌ rí xómá tsi̱gi̱jña̱ꞌ jaꞌnii, rí natambáñúú xa̱bo̱ tsí ngíníi. 32 Ikhaa jngó, ataxúꞌmii mbá tikhuun xa̱bo̱ magóó ná xuajen Jópe̱, kajngó mutháa̱n xa̱bo̱ tsí mbiꞌyuu Simón ma̱ꞌkha̱, tsí nutháa̱n Pédro̱. Ikhaa̱ xtáa̱ ná guꞌwóo mbáa xa̱bo̱ tsí mbiꞌyuu Simón, tsí nañajun ga̱jma̱á xtúún xu̱kú, tsíge̱ꞌ ꞌgí guꞌwóo ná mijngi rawuun iya a̱pha̱. Ído̱ ma̱ga̱níi̱, ikhaa̱ maꞌtháa̱nꞌ".* 33 Ikhaa jngó mbá nacha̱ máꞌ ni̱xu̱ꞌmíi xa̱bo̱ rí magóó gúña̱áꞌ. Jamí ikháánꞌ máján máꞌ nithane̱ rí nidxa̱ꞌ. Ikhaa jngó rí xúge̱ꞌ rá, mbá xúgiáanꞌxo̱ꞌ juwaxo̱ꞌ ge̱jyoꞌ ná inuu Ana̱ꞌlóꞌ, kajngó mu̱dxawíínxo̱ꞌ mbá xúgíí rí niꞌtháanꞌ Ana̱ꞌlóꞌ ma̱ra̱tha̱nꞌxo̱ꞌ.

34 A̱ꞌkhue̱n Pédro̱ nigíꞌdu̱u̱n niꞌthán:

—Asndo xúge̱ꞌ nafroꞌo̱ꞌ rí gakon rí Ana̱ꞌlóꞌ tsíraꞌwíi̱n xa̱bo̱ tsí ma̱ꞌne-nga̱júu̱n, 35 rí asndo náá máꞌ xuajen numbaa na̱ni̱gu̱u̱ꞌ jaꞌñúu̱ mbá xúgíin xa̱bo̱ tsí nune̱-mba̱a̱ jamí nune̱ rí máján. 36 Ana̱ꞌlóꞌ nixuꞌma ajngáa ná inúú i̱ji̱in Israél, niꞌthúu̱n ajngáa máján rí naꞌne rí ma̱ju̱wá tsímáá xa̱bo̱ ga̱jma̱á majñu̱u̱ Jesukrísto̱. Ikhaa tsíge̱ꞌ ñajuun tsí naꞌthán-ñájúún mbá xúgíin xa̱bo̱. 37 Ikháanꞌlaꞌ ni̱dxawíínlaꞌ máꞌ ajngáa rí waꞌthán-raꞌa ná mbá xúgíí numbaa Judéa̱, rí ni̱gi̱ꞌdu̱u̱n asndo ná numbaa Galiléa̱, nákhí Juáán wámbo̱o̱ niꞌthán-raꞌa rí mi̱xúꞌdu-maꞌíin xa̱bo̱ ná awúun iya. 38 Ni̱dxawíínlaꞌ xáne jaꞌnii rí Ana̱ꞌlóꞌ niraꞌwíi Jesús tsí na̱ꞌkha̱ ná Nasarét rí ma̱nindxu̱u̱ thúngaa, ikhaa jngó nixnúu̱ Xu̱u̱ꞌ jamí ski̱yu̱u̱ꞌ. Xúꞌkhue̱n máꞌ ni̱dxawíínlaꞌ xáne Jesús ningrigo̱o̱ꞌ-raꞌne rí máján jamí neꞌne-thanúu̱ mbá xúgíin xa̱bo̱ tsí nu̱míni̱í eꞌne gixa̱a̱, numuu rí Ana̱ꞌlóꞌ xtáa ga̱jma̱á nindxu̱u̱. 39 Jamí ikháanꞌxo̱ꞌ ndi̱ya̱áxo̱ꞌ mbá xúgíí rí neꞌne Jesús ná numbaa Judéa̱ ga̱jma̱á ná xuajen Jerusalén. Xúꞌkhue̱n máꞌ ndi̱ya̱áxo̱ꞌ rí waꞌdujmaa̱ ná ixe̱ krúsi̱ nene̱ xa̱bo̱ tsí ni̱xíya̱a̱. 40 Ikhaa tsíge̱ꞌ neꞌne Ana̱ꞌlóꞌ rí mbayáa mbiꞌyuu ído̱ nirámuu atsú mbiꞌi, jamí niꞌnii̱ rí masngájma-mine̱e̱ꞌ ná inaxo̱ꞌ. 41 Tásngájma-mine̱e̱ꞌ ná inúú mbá xúgíin xa̱bo̱ xuajen, rí i̱ndo̱ó máꞌ ná inúú tsí wapha máꞌ niraꞌwíin Ana̱ꞌlóꞌ rí ma̱ꞌne inúú. Nisngájma-mine̱e̱ꞌ ná inaxo̱ꞌ ikháanꞌxo̱ꞌ, nipeꞌtsóxo̱ꞌ jamí niwánxo̱ꞌ ga̱jma̱á nindxu̱u̱ nákhí ndiyáa̱ mbiꞌyuu̱. 42 Jamí ikhaa̱ nixnángawaxo̱ꞌ rí mu̱tha̱n-ráꞌaxo̱ꞌ ná inúú xa̱bo̱ xuajen, xúꞌkhue̱n máꞌ rí mu̱tha̱nxo̱ꞌ rí ikhaa̱ ñajuun tsí Ana̱ꞌlóꞌ niꞌgíi kajngó ma̱ꞌne-mbánuu̱ ga̱jma̱á numúú tsí nduya jamí tsí nijáñúú. 43 Ga̱jma̱á numuu̱ ikhaa̱ nithan mbá xúgíin xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú, rí mbá xúgíin xa̱bo̱ tsí nanimbu̱únꞌ juyáa̱ ikhaa̱, ma̱ꞌne mba̱a̱ a̱kui̱in Ana̱ꞌlóꞌ jaꞌñúu̱ ga̱jma̱á numuu̱ ikhaa̱.

44 Awúun máꞌ rí xóó naꞌthán Pédro̱ ajngáa ríge̱ꞌ, a̱ꞌkhue̱n mbá xúgíin xa̱bo̱ tsí nu̱dxawíín ajngáa rí naꞌthée̱n, ni̱dri̱guíi̱ Xu̱u̱ꞌ Ana̱ꞌlóꞌ. 45 Xómáꞌ xa̱bo̱ judío̱ tsí nanimbu̱únꞌ juyáá Jesús, tsí niguwá ga̱jma̱á nindxu̱u̱ Pédro̱, phú nimakúu̱n rí xa̱bo̱ tsí ra̱ꞌkháa judío̱ ñajúún nu̱dri̱guíi Xu̱u̱ꞌ Ana̱ꞌlóꞌ mangii̱n. 46 Numuu rí nu̱dxawíi̱n rí nuthee̱n ajngáa rí tsígu̱ma-nuwiin, jamí nune̱-mba̱a̱ Ana̱ꞌlóꞌ.

47 A̱ꞌkhue̱n Pédro̱ niꞌthán: «Á ma̱ꞌngo̱o̱ mbáa xa̱bo̱ ma̱we̱je̱ꞌthu̱u̱n rí mi̱xúꞌdu-maꞌíin xa̱bo̱ tsíge̱ꞌ ná awúun iya, rí ni̱dri̱guíi̱ máꞌ Xu̱u̱ꞌ Ana̱ꞌlóꞌ mangiin xómá rí ikháánꞌlóꞌ rá». 48 A̱ꞌkhue̱n nixná-ñájwii̱n rí mi̱xúꞌdu-maꞌíi̱n ná awúun iya ga̱jma̱á numuu Táta̱ Jesús. Wámba̱ rúꞌkhue̱n nithán-jáñíi̱ Pédro̱ rí ma̱nguanúu mbá wátha̱ wáa mbiꞌi ga̱jma̱á nindxúu̱n.