Atos 12

Nijáñuu Santiágo̱, xómáꞌ Pédro̱ nu̱xu̱da̱a̱ꞌ ná géjwa̱nꞌ

1 Ikhín máꞌ mbiꞌi rí ñúꞌún, thúngaa Eróde̱s nixná-ñájun rí ma̱tiin mbá tikhuun tsí nanimbu̱únꞌ juyáá Jesús, kajngó ma̱ꞌne-ngíníi̱. 2 Jamí nixná-ñájwii̱n rí ma̱ja̱ñúu ga̱jma̱á chíde̱ Santiágo̱, dxíyo̱o̱ Juáán. 3 Ído̱ ndiꞌyoo̱ rí ni̱ni̱gu̱ún xa̱bo̱ judío̱ rí niꞌnii̱ rúꞌkhue̱n, a̱ꞌkhue̱n nixná-ñájwii̱n rí ma̱khuáa Pédro̱ mangaa. Rúꞌkhue̱n niríga̱ ná awúun ndxa̱a̱ rí naꞌpho̱ xa̱bo̱ guma bopho rí na̱nguá gíꞌdoo ñu̱u̱ miga̱ꞌ. 4 Ído̱ nikhuáa Pédro̱, a̱ꞌkhue̱n nixná-ñájwii̱n rí ma̱ꞌgee̱ géjwa̱nꞌ, xúꞌkhue̱n máꞌ nixná-ñájwii̱n rí mu̱ña̱wáa̱n mbá akho̱ kuthuun rí mbámbá akhu̱un xa̱bo̱ tsí ku̱ra̱tuun ajwa̱nꞌ. Numuu rí naꞌgí-mine̱e̱ꞌ rí maxnáxi̱i̱ ná inúú xa̱bo̱ xuajen ído̱ gánújngoo ndxa̱a̱ Páskua̱. 5 Ikhaa jngó Pédro̱ kra̱ꞌaa ná géjwa̱nꞌ, jamí ni̱tia̱wáa̱n májáa̱n. Xómáꞌ tsí nanimbu̱únꞌ juyáá Jesús, nuthán-jáñíi̱ máꞌ xúꞌkhue̱n Ana̱ꞌlóꞌ ga̱jma̱á numuu Pédro̱.

Pédro̱ najríya̱a̱ꞌ ná géjwa̱nꞌ

6 Ído̱ nangiyuu máꞌ mbiꞌi rí Eróde̱s maxná-ñájun rí ma̱ga̱jnáa Pédro̱ ná géjwa̱nꞌ, ikhaa máꞌ mbroꞌon rúꞌkhue̱n kri̱ga̱a̱ Pédro̱ naꞌgu ná majñu̱ú a̱jmi̱i xa̱bo̱ tsí ku̱ra̱tuun ajwa̱nꞌ, xtoꞌwóo̱ ga̱jma̱á a̱jma̱ ñuu ajwa̱nꞌ. Jamí mbá tikhuun tsí ku̱ra̱tuun ajwa̱nꞌ nu̱ña̱wa̱án rawuun xkrugoo géjwa̱nꞌ. 7 A̱ꞌkhue̱n nda̱a̱ ajngóo nisngájma-mina̱ꞌ mbáa ánje̱l tsí nixúngua̱a̱ꞌ Táta̱, jamí nimbiꞌi-taꞌa agu ná géjwa̱nꞌ. A̱ꞌkhue̱n ánje̱l nixkajma ná níjñúu Pédro̱ kajngó maxkaxii̱, jamí niꞌthúu̱n: «Araxu̱unꞌ mbá nacha̱». A̱ꞌkhue̱n nithon-rígú ikhaa ñuu ajwa̱nꞌ rí xtoꞌwóo ná ñawúun Pédro̱. 8 Jamí waꞌtháa̱n neꞌne ánje̱l: «Atruꞌwáa smídáaꞌ jamí atruꞌwáa chádaaꞌ». Jamí xkuaꞌnii neꞌne Pédro̱. A̱ꞌkhue̱n waꞌtháa̱n xóó neꞌne ánje̱l: «Atambráꞌa-mina̱ꞌ xtátsiaa̱nꞌ, jamí aya̱ ga̱jma̱á nindxu̱ꞌ».

9 A̱ꞌkhue̱n nigájnuu Pédro̱, na̱ke̱e̱ tsu̱du̱u̱ ánje̱l, i̱ndo̱ó máꞌ numuu rí tsíꞌyoo̱ xí gakon rí naꞌne ánje̱l. Ikhaa̱ ni̱ju̱mu̱u̱ rí mbá rí ndaꞌyoo̱ inu-mbiꞌíí ñajuun ne̱. 10 Ído̱ ninújngúu̱n ná wájun timbá jamí riajma̱ kuthuun xa̱bo̱ tsí ku̱ra̱tuun ajwa̱nꞌ, a̱ꞌkhue̱n niguáꞌníi̱ ná xkrugua ajwa̱nꞌ rí jayá rawuun rixa̱á. Ni̱ma̱ꞌthoo máꞌ ikhaa xkrugua rúꞌkhue̱n kajngó ma̱ga̱jnúu̱. Jamí nagóo̱ mbá ikhoo xuajen, a̱ꞌkhue̱n nda̱a̱ ajngóo nánguá nikujma náá ni̱ka̱ ánje̱l tsí na̱ka̱ ga̱jma̱á Pédro̱.

11 A̱ꞌkhue̱n Pédro̱ nifroꞌo̱o̱ jamí niꞌthán-mine̱e̱ꞌ: «Asndo xúge̱ꞌ nda̱yo̱o̱ rí gakon rí Táta̱ nixuꞌmaa ánje̱l drígo̱o̱ kajngó ma̱ꞌne-jríñúu̱ ná ñawúun Eróde̱s, xúꞌkhue̱n máꞌ neꞌne-jríñúu̱ inuu mbá xúgíí rí nandúún xa̱bo̱ judío̱ muñi̱ꞌ».

12 Ído̱ wámbo̱o̱ niꞌthán-mine̱e̱ꞌ rúꞌkhue̱n, a̱ꞌkhue̱n ni̱ke̱e̱ ná guꞌwóo María̱, nánée Juáán, tsí nutháa̱n Márko̱s, ná phú mbaꞌiin xa̱bo̱ nimbáxi̱in nuthán-jáñíí Ana̱ꞌlóꞌ. 13 Ído̱ Pédro̱ nixnúu rawuun xkrugua rí rixa̱á, a̱ꞌkhue̱n mbáa dxáꞌgú tsí mbiꞌyuu Róde̱ ni̱ka̱ gáꞌyoo tsáa ñajuu̱n. 14 Ído̱ rí ikhaa̱ neꞌne-nuwii̱n a̱ꞌwóo Pédro̱, a̱ꞌkhue̱n phú gagi a̱kuii̱n neꞌne rí asndo tármáꞌthoo̱ xkrugua. Nigáyuu̱ ni̱kaa̱ gáꞌthée̱n rí Pédro̱ wéje̱ rixa̱á. 15 Jamí ikhii̱n nitháa̱n:

—Najmiyaaꞌ ikháánꞌ.

Xómáꞌ ikhaa̱ naꞌthée̱n rí gakon rí xkuaꞌnii jaꞌnii. A̱ꞌkhue̱n ikhii̱n nithee̱n:

—Ánje̱l tsí na̱ña̱wu̱u̱n Pédro̱ ñajuu̱n.

16 Xómáꞌ Pédro̱ naxnúu máꞌ xúꞌkhue̱n rawuun xkrugua. Ído̱ ni̱rmáꞌtháa̱ jamí ndiyáa̱ Pédro̱, a̱ꞌkhue̱n ni̱ka̱ a̱kuíi̱n. 17 Xómáꞌ ikhaa̱, naꞌnii̱ ñawúu̱n rí naꞌthúu̱n rí muni̱i̱ wíí, a̱ꞌkhue̱n niꞌthúu̱n xáne nigájnaa̱ ná géjwa̱nꞌ neꞌne Táta̱. Jamí niꞌthúu̱n: «Gu̱tha̱ánlaꞌ ríge̱ꞌ Santiágo̱ jamí a̱ngia̱nꞌlóꞌ mangiin». A̱ꞌkhue̱n nigájnuu̱, ni̱ke̱e̱ i̱mba̱ janíí.

18 Ído̱ ni̱mbiꞌi, xa̱bo̱ tsí ku̱ra̱tuun ajwa̱nꞌ phú wee nini̱i̱ rí namakúu̱n, numuu rí tsíyáa̱ náá ni̱ka̱ Pédro̱. 19 Xómáꞌ Eróde̱s nixná-ñájun rí mbi̱ꞌyáa Pédro̱, i̱ndo̱ó máꞌ numuu rí na̱nguá nikujmaa̱. Ikhaa jngó niraxúu̱n tsí ni̱ña̱wáa̱n, jamí nixná-ñájwii̱n rí ma̱ja̱ñúú tsúꞌkhue̱n. Nda̱wa̱á a̱ꞌkhue̱n, nigájnuu Eróde̱s ná Judéa̱ jamí ni̱ke̱e̱ gáxtáa̱ ná Sesaréa̱.

Nijáñuu Eróde̱s

20 Eróde̱s najiꞌnáa jaꞌñúú xa̱bo̱ xuajen Tíro̱ ga̱jma̱á xa̱bo̱ xuajen Sidón. Xómáꞌ xa̱bo̱ tsúꞌkhue̱n niguáꞌdáa̱ awan rí magóo̱ gúyáa̱ Eróde̱s. Ni̱ꞌngúu̱n nene̱-rájáa̱ Blásto̱, xa̱bo̱ tsí nayaxe̱-ra̱ꞌmúu ñajun ná guꞌwóo thúngaa, rí maꞌthán ná inuu Eróde̱s rí ikhii̱n tsíñúu̱ xkujndu, numuu rí xa̱bo̱ xuajñúu̱ jayá mbiꞌñúú ga̱jma̱á rí najma̱a̱ ná xuajñuu thúngaa. 21 Jamí ído̱ ni̱ga̱nú mbiꞌi rí Eróde̱s ma̱grui̱gúu̱n, a̱ꞌkhue̱n nijúwaa̱n xtíin mitsaan rí najúwuu̱n ído̱ rí naꞌthán-ñájwii̱n, jamí ni̱gi̱ꞌi̱i̱ ná xílii̱, a̱ꞌkhue̱n niꞌthán-raꞌee̱ mu̱dxawíín xa̱bo̱. 22 Xómáꞌ xa̱bo̱ xuajen ni̱gíꞌdíi̱n ni̱ndxa̱ꞌwe̱e̱ jamí nithee̱n: «¡Ana̱ꞌlóꞌ ñajuun tsí naꞌthán, ra̱ꞌkhá mbáa xa̱bo̱ numbaa iꞌthán!». 23 Núkho̱ máꞌ mbrúma rúꞌkhue̱n, Eróde̱s ndiyóo mbá nandii gakhi̱i̱ neꞌne mbáa ánje̱l tsí nixúngua̱a̱ꞌ Táta̱, numuu rí táꞌne-mba̱a̱ Ana̱ꞌlóꞌ. A̱ꞌkhue̱n wanitsíi̱ nene̱ ñu̱u̱ jamí nijáñuu̱.

24 Xómáꞌ ajngóo Ana̱ꞌlóꞌ, na̱ka̱-ra̱dróꞌoo máꞌ ne̱ xúꞌkhue̱n, jamí nithán-raꞌa ne̱ mbá xúgíí ná júwa̱ꞌ xa̱bo̱.

25 Ído̱ Bernabé ga̱jma̱á Sáu̱lo̱ wámbúu̱n nene̱-mbáníi̱ ñajun rí ni̱gi̱ꞌmii̱ muni̱i̱ ná Jerusalén, a̱ꞌkhue̱n nigúu̱n ná Antiokía̱ gajmíi̱ Juáán, tsí nutháa̱n Márko̱s.