1 A̱ꞌkhue̱n tsí jayá idxu̱ún dxakuun niraxu̱u̱ Estéba̱n:

—Á gakon rí nuthee̱n ga̱jma̱á numaaꞌ rá.

2 Jamí ikhaa̱ niriꞌñee̱:

—Xa̱bo̱ buanuu a̱ngui̱nꞌ jamí xa̱bo̱ buanuu ede̱, gu̱dxawíínlaꞌ rí ma̱tha̱nꞌlaꞌ: Ana̱ꞌlóꞌ tsí xtáa ná nambiꞌi-taꞌa agu nikujmaa ná inuu táta̱-xi̱ꞌñálóꞌ Abraám, nákhí xtáa̱ ná Mesopotámia̱, jamí xóó máꞌ táꞌgee̱ ma̱xtáa̱ ná Arán. 3 Jamí waꞌtháa̱n neꞌne Ana̱ꞌlóꞌ: "Atatsíñáá mbayaaꞌ jamí a̱ngia̱anꞌ, jamí ayu ná mbaa rí ma̱snga̱jmáaꞌlo̱ꞌ ikhúúnꞌ". 4 A̱ꞌkhue̱n nigájnuu̱ ná mbañúú xa̱bo̱ kaldéa̱ jamí ni̱ke̱e̱ gáxtáa̱ ná Arán. Ikhín nijáñuu tátée̱, a̱ꞌkhue̱n Ana̱ꞌlóꞌ ni̱ꞌkha̱ jayáa̱ ná mbaa ríge̱ꞌ, ná juwa ikháanꞌlaꞌ xúge̱ꞌ.

5 »Jamí táxnúu̱ nitháan ju̱ba̱ꞌ ríge̱ꞌ ma̱ꞌne mbayuu̱, ni máꞌ asndo ná matsijii̱ nakhúu̱. I̱ndo̱ó máꞌ numuu rí nixuda-mine̱e̱ꞌ rí maxnúu̱ ne̱ ma̱ꞌne mbayuu̱ ikhaa̱, jamí xa̱bo̱ ri̱jyu̱u̱ꞌ tsí ma̱gu̱mii nda̱wa̱á, maske máꞌ xóó ndawa̱a̱ a̱dée̱ mbiꞌi rúꞌkhue̱n. 6 Xáꞌnii waꞌtháa̱n neꞌne Ana̱ꞌlóꞌ: "Tsí xa̱bo̱ ri̱jya̱a̱ꞌ ma̱nindxu̱ún xa̱bo̱ tsí ma̱ju̱wá ná ra̱ꞌkháa xuajñúú, jamí ma̱nindxúu̱n yumbáá waꞌtsi̱in tsí na̱gu̱ma-ski̱ñu̱ú mu̱ñajun, xúꞌkhue̱n máꞌ ma̱gu̱ma-ngíníi̱ mi̱ndaꞌkho mbá akho̱ siénto̱ (400) tsigu". 7 Jamí niꞌthán xóó Ana̱ꞌlóꞌ: "Xómáꞌ ikhúúnꞌ ma̱xu̱ꞌdáa awan ga̱jma̱á numúú xa̱bo̱ xuajen ná ma̱nindxúu̱n yumbáá, nda̱wa̱á a̱ꞌkhue̱n ikhii̱n ma̱ga̱jnáa̱ ikhín jamí ma̱guwáa̱n ná mbaa ríge̱ꞌ mune̱-mbúu̱n". 8 A̱ꞌkhue̱n Ana̱ꞌlóꞌ neꞌne mbá awan ga̱jma̱á nindxu̱u̱ Abraám, rí xa̱bo̱ ri̱jyu̱u̱ꞌ mbuya̱ tsina jndi. Ikhaa jngó ído̱ ni̱gu̱maa a̱dée̱ Isaák, nixnúu̱ tsina jndi ído̱ nirámuu migiñu mbiꞌi rí ni̱gu̱maa̱. Ikhaa máꞌ neꞌne Isaák ga̱jma̱á Jakób, jamí ikhaa máꞌ neꞌne Jakób gajmíí i̱ji̱in, tsí mbá gu̱wa̱ꞌ i̱jmi̱i (12) táta̱-xi̱ꞌñú-egúún xa̱bo̱ Israél.

9 »Táta̱ xi̱ꞌñálóꞌ tsí ñajúún i̱ji̱in Jakób, ni̱ngu̱jwa̱a̱ dxíñúu̱ José ga̱jma̱á numuu rí naxígúu̱n juyáa̱, jamí ni̱ka̱ jiꞌyáa̱ ná Ejípto̱. I̱ndo̱ó máꞌ numuu rí Ana̱ꞌlóꞌ xtáa ga̱jma̱á nindxu̱u̱, 10 jamí neꞌne-jríya̱a̱ꞌ inuu mbá xúgíí rí namínu̱u̱ꞌ, xúꞌkhue̱n máꞌ niꞌnii̱ rí Faraón, tsí ñajuun thúngaa ná Ejípto̱, ma̱ni̱gu̱u̱ꞌ jaꞌyoo̱ jamí ma̱nindxu̱u̱ xa̱bo̱ tsí na̱ma̱ñuu ná inuu̱. Ikhaa máꞌ Faraón niꞌgíi José rí ma̱nindxu̱u̱ xa̱bo̱ ñajun tsí maꞌthán-ñájuun mbá xúgíí Ejípto̱ jamí mbá xúgíí guꞌwóo̱.

11 »A̱ꞌkhue̱n phú gakhe̱ niríga̱ ewi ná mbá xúgíí mbayuu Ejípto̱ xúꞌkhue̱n máꞌ ná numbaa Kanaán, jamí phú gakhe̱ ni̱míni̱í xa̱bo̱. Xómáꞌ táta̱-xi̱ꞌñálóꞌ wajyúú na̱nguá guáꞌdáa̱ rí mu̱phi̱i̱. 12 Ído̱ Jakób nidxawuun rí ríga̱ ixí iña ná Ejípto̱, nixuꞌmii̱ táta̱-xi̱ꞌñálóꞌ ikhín rí timbá miꞌtsú. 13 Jamí ído̱ nigóo̱ rí riajma̱ nothon rá, José niniña-mine̱e̱ꞌ rí ma̱gu̱ma-nuwii̱n gúne̱ dxíyo̱o̱, a̱ꞌkhue̱n Faraón ndiꞌyoo náá xa̱bo̱ ñajuun José. 14 A̱ꞌkhue̱n José nixuꞌma ajngáa rí ma̱ꞌkha̱ jiꞌyáa tátée̱ gajmíí mbá xúgíin a̱nguii̱n, tsí mbá atsú skíñú gu̱wa̱ꞌ nítsiin (75) rí mbá xúgíin. 15 Xkuaꞌnii neꞌne rí ni̱ga̱taa Jakób ná Ejípto̱, jamí ikhín máꞌ nijáñuu̱, xúꞌkhue̱n máꞌ mangiin mbá xúgíin táta̱-xi̱ꞌñálóꞌ wajyúú. 16 Ikhiin tsúꞌkhue̱n ni̱ꞌkha̱ jiꞌdi̱in ná Sikém, jamí waꞌduu̱n ná iñá-wajen rí neꞌtse̱ Abraám ga̱jma̱á mbúkha̱a̱ ná inúú i̱ji̱in táta̱ Jamór ná Sikém.

17 »Ído̱ nangiyuu máꞌ mbiꞌi rí ma̱mba̱núu awan rí nixuda-mina̱ꞌ Ana̱ꞌlóꞌ ga̱jma̱á nindxu̱u̱ Abraám, a̱ꞌkhue̱n ni̱ka̱-ra̱mi̱diu̱ún xa̱bo̱ xuajñalóꞌ xúꞌkhue̱n máꞌ neꞌne mbaꞌii̱n mi̱ndaꞌkho ná Ejípto̱, 18 xkuaꞌnii asndo ni̱ga̱nú mbiꞌi rí ni̱ge̱ꞌe̱ i̱mba̱a̱ꞌ thúngaa ná Ejípto̱ tsí táꞌne-nuwiin José. 19 Thúngaa tsíge̱ꞌ, phú ni̱ma̱ñuu̱ rí ma̱ꞌne-nduwii̱n xa̱bo̱ xuajñalóꞌ, jamí niꞌnii̱ rí mu̱míni̱í táta̱-xi̱ꞌñálóꞌ. Neꞌne-ski̱ñúu̱ rí mu̱ni̱ꞌñúu̱ ma̱ja̱ñúú i̱jíi̱n tsí jñáma tsí ni̱kú ni̱gu̱mii, kajngó náxáꞌne mbaꞌii̱n. 20 Ikhín máꞌ mbiꞌi rí ñúꞌún ni̱gu̱maa Moisés, tsí phú ni̱ni̱gu̱u̱ꞌ Ana̱ꞌlóꞌ jaꞌyoo, jamí ni̱gu̱ma-mbaja̱a̱ mbá atsúun go̱nꞌ neꞌne tátée̱ ga̱jma̱á nánée̱. 21 Ído̱ ni̱ni̱ꞌñáa̱ rí ma̱ja̱ñúu̱, a̱ꞌkhue̱n a̱dée Faraón tsí dxáꞌgú ndiyáa̱ jamí neꞌne-mbaja̱a̱ xómá a̱dée̱. 22 A̱ꞌkhue̱n waꞌsngáá Moisés mbá xúgíí rí máján rí na̱ma̱ñúú xa̱bo̱ Ejípto̱, xúꞌkhue̱n máꞌ phú ni̱gi̱ꞌdoo numuu ajngáa rí naꞌthée̱n, jamí rí naꞌnii̱.

23 »Ído̱ nirámuu a̱jma̱ skíñú (40) tsiguu̱, a̱ꞌkhue̱n neꞌne a̱kuii̱n rí ma̱ꞌgee̱ gáꞌñúu̱ a̱nguii̱n, tsí ñajúún xa̱bo̱ Israél. 24 Jamí ído̱ ndiꞌyoo̱ rí na̱gu̱ma-ngínáa mbáa xa̱bo̱ Israél eꞌne mbáa xa̱bo̱ Ejípto̱, a̱ꞌkhue̱n ni̱ke̱e̱ gámbáyúu̱ tsí na̱gu̱ma-ngínáa. Nixnúu̱ asndo nixíya̱a̱ xa̱bo̱ Ejípto̱, kajngó ma̱ꞌne-numa̱a rí neꞌne. 25 I̱ndo̱ó máꞌ numuu rí Moisés ni̱ju̱mu̱u̱ rí a̱nguii̱n ma̱fruꞌu̱ún rí Ana̱ꞌlóꞌ ma̱ꞌne-jáwíi̱n ga̱jma̱á majñu̱u̱ ikhaa̱. Xómáꞌ ikhii̱n táfruꞌúu̱n rí xkuaꞌnii jaꞌnii. 26 Jamí i̱mba̱ mbiꞌi, Moisés nixkamii a̱jmi̱i xa̱bo̱ Israél tsí na̱tsa̱ñu̱ú, a̱ꞌkhue̱n ndiyoo̱ gáxprígúu̱n jamí niꞌthúu̱n: "Xa̱bo̱ buanuu, mbóó ikhaa máꞌ iꞌdi ñajwanlaꞌ ikháanꞌlaꞌ. Náá numuu kajngó nu̱ne̱-ñawún-mijnálaꞌ róꞌ". 27 A̱ꞌkhue̱n tsí naꞌne-ngínáa dxájuu nirmajngua̱a̱ꞌ Moisés, jamí niꞌthúu̱n: "Tsáa niꞌgíín rí ma̱nindxa̱a̱ꞌ xa̱bo̱ ñajun jamí xa̱bo̱ tsí maxúdaa awan ga̱jma̱á numaxo̱ꞌ róꞌ. 28 Á nandaaꞌ gáta̱xíñu̱ú mangúúnꞌ xómá rí nitaxíya̱a̱ xa̱bo̱ Ejípto̱ ri̱xi̱í dxe̱ꞌ". 29 Ído̱ nidxawuun Moisés ajngáa rúꞌkhue̱n, a̱ꞌkhue̱n nigáyuu̱ jamí ni̱ke̱e̱ gáxtáa̱ ná numbaa Madián. Ikhín nixtáa̱ xómá xa̱bo̱ tsí na̱ꞌkha̱ i̱mba̱ xuajen, jamí ni̱gu̱mii a̱jmi̱i i̱jii̱n.

30 »Ído̱ ninújngoo a̱jma̱ skíñú (40) tsigu, nikujmaa mbáa ánje̱l inuu̱ ná majñu̱u̱ ri̱ꞌyu̱u̱ aguu mbá iná tsuwan rí nakha, ná mbaa niníí drígo̱o̱ júba̱ Sinaí. 31 A̱ꞌkhue̱n Moisés niyaxu̱u̱ ne̱, jamí phú nimakuu̱ neꞌne rí ndiꞌyoo̱ inu-mbiꞌíí. Jamí ído̱ nixuꞌma-mine̱e̱ꞌ kajngó mayaxu̱u̱ mújúu̱n ne̱, a̱ꞌkhue̱n nidxawuu̱n a̱ꞌwóo Táta̱ Mikhuíí rí niꞌthán: 32 "Ikhúúnꞌ ñajunꞌ Anu̱ú táta̱-xi̱ꞌñáaꞌ wajyúú, Anu̱u̱ Abraám, Anu̱u̱ Isaák jamí Jakób". A̱ꞌkhue̱n Moisés ni̱gi̱ꞌdu̱u̱n niguaꞌaa̱n rí namíñuu̱, jamí tsíꞌngo̱o̱ a̱kuii̱n gáyaxi̱i̱.

33 »Jamí waꞌtháa̱n neꞌne Táta̱ Mikhuíí: "Arawíi chádaaꞌ, numuu rí mbaa ná xtiajún a̱ꞌkhue̱n, ikhúúnꞌ jaꞌyoꞌ ne̱. 34 Nda̱yo̱o̱ mújúnꞌ máꞌ rí nu̱míni̱í xa̱bo̱ xuajñuꞌ tsí júwa̱ꞌ ná Ejípto̱, jamí ni̱dxawuun máꞌ rí nu̱ndxa̱ꞌwa̱-kháa̱n. Ikhaa jngó nigátáa rí ma̱ne̱-jáwíi̱nlo̱ꞌ. Rí xúge̱ꞌ rá, aya̱, ma̱xu̱ꞌmáá mi̱dxo̱ꞌ ná Ejípto̱".

35 »Ikhaa máꞌ Moisés tsíge̱ꞌ ñajuun tsí ra̱khúu̱n gúyáa̱ jamí nitháa̱n: "Tsáa niꞌgíín rí ma̱nindxa̱a̱ꞌ xa̱bo̱ ñajun jamí xa̱bo̱ tsí maxúdaa awan róꞌ". Ikhaa máꞌ tsíge̱ꞌ ñajuun tsí nixuꞌmaa Ana̱ꞌlóꞌ rí ma̱nindxu̱u̱ xa̱bo̱ ñajun jamí tsí ma̱ꞌne-jáwíin xa̱bo̱ xuajñuu ga̱jma̱á ski̱yu̱u̱ꞌ ánje̱l tsí nikujmaa inuu̱ ná iná tsuwan. 36 Moisés ñajuun tsí ni̱gu̱wíin táta̱-xi̱ꞌñálóꞌ ná Ejípto̱, ído̱ wámbo̱o̱ niꞌnii̱ rí phú wáá jamí rí phú nimakúún xa̱bo̱ eꞌne ná mbayuu Ejípto̱. Xúꞌkhue̱n máꞌ niꞌnii̱ ná Iya A̱pha̱ Maña̱ꞌ, jamí ná mbaa niníí a̱jma̱ skíñú (40) tsigu. 37 Ikhaa máꞌ Moisés tsíge̱ꞌ ñajuun tsí niꞌthúún xa̱bo̱ Israél: "Táta̱ Ana̱ꞌlaꞌ Mikhuíí maríya̱a̱ꞌ ná majñu̱ú a̱ngia̱nꞌlaꞌ mbáa xa̱bo̱ tsí ma̱gu̱wíjnga̱a ajngóo̱, xómá rí ikhúúnꞌ. Ikhaa̱ gúdxawíínlaꞌ rí maꞌthánlaꞌ".* 38 Ikhaa máꞌ Moisés tsíge̱ꞌ ñajuun tsí nixtáa ná niwi̱in táta̱-xi̱ꞌñálóꞌ ná mbaa niníí, ga̱jma̱á ánje̱l tsí naꞌthúu̱n ná júba̱ Sinaí. Ikhaa̱ ni̱grui̱guíi̱ ajngáa rí naꞌne rí ma̱ju̱wá xa̱bo̱ kajngó maꞌthánlóꞌ ne̱.

39 »Xómáꞌ táta̱-xi̱ꞌñálóꞌ túdri̱guíi̱ ne̱ jamí ra̱khúu̱n gánimbúu̱n juyáa̱. A̱ꞌkhue̱n gakon, ikhii̱n naꞌne a̱kuíi̱n rí ma̱thangii̱n ná Ejípto̱, 40 ído̱ nitháa̱n Aarón: "Athani̱i ‘ana̱ꞌlóꞌ’ tsí mbuya̱ ikhalóꞌ. Numuu rí Moisés tsúꞌkhue̱n, tsí ni̱gu̱wiáanꞌlóꞌ ná mbaa Ejípto̱, tsíꞌyáálóꞌ dí nigíꞌnuu̱". 41 A̱ꞌkhue̱n nini̱i̱ xtiꞌkhuu mbáa a̱ꞌdá-xédé, jamí ni̱xna̱xíi̱n xu̱kú tsí nijáñúú ná inuu tsí ra̱ꞌkháa Ana̱ꞌlóꞌ ñajuun, xúꞌkhue̱n máꞌ nijúwe̱e̱ꞌ gagi ga̱jma̱á numuu rí nene̱-ku̱maa̱ ga̱jma̱á ñawúu̱n. 42 A̱ꞌkhue̱n Ana̱ꞌlóꞌ neꞌne-níjníí-mina̱ꞌ ná inúu̱, jamí niniñúu̱ rí mu̱ne̱-mba̱a̱ rí ríga̱ ná mikhu. Xómá ka̱ma naꞌthán ná i̱ñu̱ú xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú:

"Xa̱bi̱i Israél, á ikhúúnꞌ ni̱xna̱xúꞌlaꞌ xu̱kú tsí nijáñúú jamí tsi̱gi̱jña̱ꞌ,

ná mbaa niníí awúun rí a̱jma̱ skíñú (40) tsigu dxe̱ꞌ.

43 A̱ꞌkhue̱n gakon, nikua ju̱ya̱ꞌlaꞌ guꞌwá dxákuun xtíin drígo̱o̱ Molók,

jamí a̱ꞌgua̱án drígo̱o̱ ana̱ꞌlaꞌ Refán,

xtiꞌkhu rí ne̱ne̱ májánlaꞌ rí mu̱ne̱-mba̱a̱laꞌ.

Ikhaa jngó, ma̱xkriñáaꞌlaꞌ ná xuajñalaꞌ,

ma̱xu̱ꞌmáaꞌlaꞌ mu̱ꞌgua i̱tha̱án tsíngua̱ꞌ rí ná ꞌgí Babilónia̱".*

44 »Ná mbaa niníí niguáꞌdáá táta̱-xi̱ꞌñálóꞌ guꞌwá dxákuun xtíin rí nasngájma rí xtáa Ana̱ꞌlóꞌ, xómá nixná-ñájun Ana̱ꞌlóꞌ nákhí niꞌthúu̱n Moisés rí ma̱ꞌnii̱ ne̱ xómá jaꞌnii xkri̱doo rí ndiꞌyoo̱. 45 Ikhaa máꞌ guꞌwá-xtíin rúꞌkhue̱n, ído̱ rí táta̱-xi̱ꞌñálóꞌ ni̱dri̱guíi̱ ne̱, niguwá juñúu̱ ne̱ ge̱jyoꞌ gajmíi̱ Josué ído̱ ni̱tu̱ꞌúu̱n mu̱dríguíi̱ mbañúú xa̱bo̱ tsí ra̱ꞌkháa judío̱ ñajúún, tsí nixkawíin Ana̱ꞌlóꞌ ná inúú táta̱-xi̱ꞌñálóꞌ. Jamí niríga̱ guꞌwá-xtíin asndo mbiꞌi rí nixtáa Dabíd.

46 »Ana̱ꞌlóꞌ phú ni̱ni̱gu̱u̱ꞌ jaꞌyoo̱ Dabíd, ikhaa jngó ni̱nda̱ꞌe̱e̱ rí ikhaa̱ ma̱ꞌnii̱ guꞌwá ná ma̱xtáa Táta̱ Mikhuíí, Anu̱u̱ Jakób tsí naꞌne-mba̱a̱. 47 I̱ndo̱ó máꞌ numuu rí Salomón ñajuun tsí neꞌne guꞌwóo Ana̱ꞌlóꞌ, 48 maske máꞌ Ana̱ꞌlóꞌ Mikhuíí na̱nguá xtáa̱ ná awúun guꞌwá rí nune̱ mújúún xa̱bo̱ ga̱jma̱á ñawúún, xómá niꞌthán xa̱bo̱ tsí ni̱gu̱wíjnga̱a ajngóo Ana̱ꞌlóꞌ wajyúú:

49 "Mikhu ñajuun ná ꞌgúnꞌ na̱tha̱n-ñájunlo̱ꞌ,

jamí tsu̱du̱u̱ ju̱ba̱ꞌ ñajuun ná tráma nakhúꞌ.

Dí guꞌwáa mu̱ne̱laꞌ ná ma̱gúda̱ꞌlo̱ꞌ rá, —iꞌthán Táta̱—.

Náá ꞌgí xi̱yoo ná mba̱ya̱a xu̱ꞌ rá.

50 Á ra̱ꞌkhá ikhúúnꞌ ne̱ne̱-ku̱maa mbá xúgíí rúꞌkhue̱n ga̱jma̱á ñawúnꞌ dxe̱ꞌ".*

51 »¡Maphú najñaguáanꞌlaꞌ, gúkú a̱kia̱nꞌlaꞌ jamí tsíyalaꞌ gúdxawíínlaꞌ rí nithánlaꞌ! Ikháanꞌlaꞌ jámba̱ miꞌtsú nawajún-ꞌthi̱ínlaꞌ Xu̱u̱ꞌ Ana̱ꞌlóꞌ. Xómá nene̱ táta̱-xi̱ꞌñálaꞌ wajyúú, xkuaꞌnii máꞌ e̱ne̱ mangáanꞌlaꞌ. 52 Tsáa lá tsí ni̱rawíjnga̱a ajngóo Ana̱ꞌlóꞌ tsí túxkáá táta̱-xi̱ꞌñálaꞌ rá. Jamí ni̱ra̱díi̱n tsí wapha nithan rí ma̱ꞌkha̱ tsí phú májáan, ikhaa máꞌ tsí ikháanꞌlaꞌ ni̱xna̱xíi̱laꞌ xúꞌkhue̱n máꞌ ni̱xíya̱a̱laꞌ. 53 Ikháanꞌlaꞌ tsáanꞌ ni̱drígúlaꞌ xtángawoo Ana̱ꞌlóꞌ ga̱jma̱á majñu̱ú ánje̱l, tsíne̱-mbáníílaꞌ ne̱.

54 Ído̱ ni̱dxawíi̱n ajngáa rúꞌkhue̱n, nijiꞌníi̱ mi̱ndaꞌkho, asndo naꞌpho̱-ꞌduu̱n iñúu̱ ga̱jma̱á numuu Estéba̱n. 55 I̱ndo̱ó máꞌ numuu rí Estéba̱n xtáa Xu̱u̱ꞌ Ana̱ꞌlóꞌ ga̱jma̱á nindxu̱u̱, niyaxi̱i̱ mikhuíí, a̱ꞌkhue̱n ndiꞌyoo̱ rí nambiꞌi-taꞌaa Ana̱ꞌlóꞌ, jamí ndiꞌyoo̱ rí Jesús wéje̱ ná ñawún mújúun Ana̱ꞌlóꞌ. 56 A̱ꞌkhue̱n niꞌthée̱n: «Gu̱dxawíínlaꞌ, ja̱ma̱ꞌtha mikhu i̱yo̱o̱lo̱ꞌ, jamí nda̱yo̱o̱lo̱ꞌ rí A̱dée Xa̱bo̱ Numbaa wíji̱i̱ ná ñawún mújúun Ana̱ꞌlóꞌ».

57 A̱ꞌkhue̱n ikhii̱n ni̱ndxa̱ꞌwe̱e̱ gakhe̱, ni̱ruguáa̱ ñaꞌwúu̱n, jamí mbá xúgíi̱n ni̱dráꞌii̱n rí mu̱rmajngua̱a̱ꞌ Estéba̱n. 58 A̱ꞌkhue̱n ni̱ríya̱a̱ꞌ ná rawuun xuajen, nixnáa̱ ga̱jma̱á itsí. Xómáꞌ xa̱bo̱ tsí ni̱ka̱ma̱xu̱ún ajngáa ga̱jma̱á numuu Estéba̱n ni̱strige̱e̱ xtíñúu̱ ná nakhúu mbáa dxáma tsí mbiꞌyuu Sáu̱lo̱.

59 Jamí awúun máꞌ rí ikhii̱n nuxnáa̱ ga̱jma̱á itsí, Estéba̱n niꞌthán-jáñuu Jesús xáꞌnii: «Táta̱ Jesús, a̱tri̱gúu la ními̱ꞌ». 60 A̱ꞌkhue̱n nismáti̱go̱o̱, jamí phú gakhe̱ niꞌthée̱n: «Táta̱, athane̱ mba̱a̱ a̱kia̱anꞌ xtañúu̱ ga̱jma̱á numuu aꞌkhán ríge̱ꞌ». Jamí ído̱ wámbo̱o̱ niꞌthée̱n ajngáa rúꞌkhue̱n, a̱ꞌkhue̱n nijáñuu̱.