Pahuli li mu ukebese mu tsalili a bifwita
1 Baana ba ngu, me tondi ti benu liyibuhala moonyi mu ma maayiili bakaha ba bisu mu tangu a Moose. Yidu laakaswehe bo boosi, titswene bo baasabuhi Mubu wu Mubenge10.1 Pal 13.21; Pal 14.22 . 2 Hutso a yidu na hutso mubu, bo baayaki tondihili itwadi na Moose. 3 Bo boosi baadiidi byudya ni byo bimosi bi Nzambi haaviidi bo. 4 Bo boosi baanywidi mamba ni mo mamosi ma Nzambi haaviidi bo. Mu mbuli bo baakanywa ŋa manya li Nzambi haalahi bo, li laakaduukala bo. Manya mo liina aba ni Kristo. 5 Ka ba balahi ŋa hati la bo a baaba ba babwe ŋa busu bwa Nzambi ve, ni mu buuna bo baakwidi lahi-lahi mu kumu a nzala10.5 Mat 14.16 .
6 Biina ni bifwaani mu tooni a bisu, mana bisu livele na manzala ma mabi, we bu bo baabahi mo10.6 Mat 11.4,33; Mkg 106.14 . 7 A likuunda bifwita ve, we bu bakima ŋa hati la bo baakuundi byo. We bu Mabasonehe ma Ngidi mali mu uleele: «Baatu baatsahili mu udya, mu unywa, titswene baatelimi mu ukina hu ubi ŋa busu bu bifwita10.7 Pal 32.6 .» 8 Bisu a laafwana usalila bumbembo ve, we bu bakima ŋa hati la bo baasalili. Maku moole ma biveeve, na biveeve bitatu (23 000) bya baatu, baakwidi mu ilumbu imosi10.8 Mat 25.1-18 . 9 Bisu a lafwana ulobese Kristo we bu bakima ŋa hati la bo baasiidi ve, na mu buuna, bo baakwidi mu tooni bataadi ba baakahi bo10.9 Pfu 21.5; Mkg 106.14 . 10 Nyahaani uŋono, we bu bakima ŋa hati la bo baaŋoni, na pofi lipfu amani uduba bo.
11 Mapasi mo maana maabwili bo, mana maba imbangi huli baatu bakima. Baasonihi mo mu uyibusa bisu, mu tooni ati, bisu laaka bebele a taangu ya tsukusu. 12 Ni mu buuna, nyaha wu li mu utsima ti nde ahwada mu imiinu, akebe mu uvelebwa.