1 Koliito 12

Libundu lili we nyutu yi yili na binama bi bilahi

12 Eeye, Kristo afwanina na nyutu yi yili na binama bi bilahi. Tso bu binama mo biina bili bi bilahi, byo byapfuutana ndulu mu nyutu mosi. 13 Ni mu buuna, tso hu li Bayudaayo, Bangeleke, baviha, buuve ba bali bunyanga, bisu boosi baatondihi itwadi, mana lituunga nyutu mosi. Mu Livupu la Ngidi ndulu ni lo limosi, bisu boosi laanywidi mu idiinga hya lo.

14 Mu tooni ati, nyutu abaavaanga mu inama imosi ve, ka mu binama bi bilahi. 15 Tso huulu huleeli: «Me a handi kaka ve, buuna me a handi mu nyutu ve». Ka liyaabi ti huulu utwala ubisa uba inama hya nyutu ve. 16 Na tso tswi lileeli: «Me a handi diisu ve, buuna me a handi mu nyutu ve», lo a luutwala ubisa uba inama hya nyutu ve. 17 Tso nyutu yoosi yaakiiba diisu, buni baatu baakiibaayuha kele? Tso yo yoosi yaakiiba ndulu tswi, buni baatu baakiibaayuha tsulu? 18 Mu mbuli, Nzambi asuusi pasi inama mu nyutu we bu nde haatondi. 19 Tso inama hyakiiba ndulu imosi, a hwakiiba na tsoongo ve. Mu tooni ati, nyutu a yaakiiba ve! 20 Eeye, binama bili bi bilahi, ka nyutu yili ndulu mosi.

21 Diisu utwala uleele huli kaka ve ti: «Me a handi na nzala a we ve!» Na, mutswe utwala uleele huli miilu ve ti: «Me a handi na nzala a benu ve!» 22 Homo, binama bya nyutu bi byafulala ukolo tso biveli, nyutu yoosi ukwa. 23 Na bi bisu libaapenye, bisu libaakiinza byo ufulala binama bikima. Binama bi laavelefwana usyenolo, bisu bibaava byo likiinzu li laafulala. 24 Buuna, binama bi bisu libaapenye, libaafula ukiinza byo. Nzambi haavaanga buuna, mana babaasinzayuusa binama bi byavele na tsoongo. 25 Buuna, makabu maveleba mu nyutu, ka binama bya nyutu bili tsiitsa na bibaakumbasana. 26 Na tso inama imosi hili mu pasi, binama bina byosi bili mu pasi na hyo. Tso inama imosi hiyaki likiinzu, binama bina byosi bili mu kinya na hyo.

27 Benu lili nyutu a Kristo: pasi nde mu benu li inama hya nyutu a nde.