6 Yibuhalaani moonyi mu dyambu mo liniili ti: Woosi wu ukuna na dyedyeke, sa akuukaha bya hoole, na woosi wu ukuna bi bilahi, sa akuukaha bi byalutahala iteesi. 7 Buuna, nyaha pasi muutu ava we bu nde atsimi mu mutima a nde, hwavele lingebe, buuve kwamisa. Mu tooni ati, Nzambi atondo muutu wu ubaava na kinya. 8 Na Nzambi li na matwala ma uluusa benu mu mabwe ma pila mu pila. Bu benu luuluula mu bi benu lili na byo nzala, benu luubwebaha taangu yoosi bi byalutahala bulahi, mana benu libaakumbasa bakima mu mavaanga ma mabwe ma pila mu pila. 9 Mabasonehe ma Ngidi mali mu uleele:

«Nde ubaava mu iteesi hi hyalutahala huli bapuumbu,

na bubwe bwa nde bubaakwilala taangu yoosi✝.»

10 Nzambi wu ubaava muhunu huli mukuni na lipa li libaabuungala nde✝, sa ava benu mu iteesi hi hyafulala, muhunu wu benu lili na nde nzala. Nde upfunasa na ukulasa muhunu, mana butsiitsa bwa benu bubuta mimbutu mi milahi. 11 Nde ukitusa benu bisina mu moosi, mana benu libaakumbasa baatu hwavele ukolo. Buuna, baatu ba balahi buufutala matondo huli Nzambi, mu makabu ma benu, ma bisu luutoosele huli bo. 12 Mu tooni ati, tsonzihili a makabu yi benu lili mu usa yiniiyi, a yili mu umana ndulu manzala ma baatu bangidi ve. Ka yo yili mu usinzapfunasa pfutilili matondo huli Nzambi.