1 Eelyo ndakabona mungelo uumbi singuzu kaza buseluka kuzwa kujulu, kazambayidwe mujoba, afulichoongo atala amutwe wakwe, alimwi busyu bwakwe bwakali mbuli izuba, amawulu aakwe akali mbuli misemu yamulilo. 2 Wakali jisi kabbuku kakali julidwe muluboko lwakwe. Mpawo wakalyata kuulu kwakwe kwakululyo atala alwizi, akuulu kwakwe kwakulumwesi kaluli anyika, 3 alimwi wakoompolola ajwi pati, mbuli mulavu uvuluma, naakoompolola, mizuzumo iilimusanu ayibili yakandindima. 4 Alimwi mizuzumo iilimusanu ayibili niyakandindima, ndakali ndaamba kulemba, pesi ndakamvwa ijwi lizwa kujulu kaliti, "Sisa eezyo mizuzumo iilimusanu ayibili nziyaamba, alimwi utazilembi aansi pe."

5 Alimwi mungelo ngundakabona kayimvwi alwizi aanyika wakatambika luboko lwakwe lwakululyo kujulu 6 alimwi wakakonka ayooyo upona kalyoonse alyoonse, wakalenga julu azili mulindilyo, anyika azili mulinjiyo, alwizi azili mulindulo, mpawo wakati, "Kutabi kuchedwa lubo, 7 pesi mumazuba akulila kwamweembo uyoolizigwa amungelo wachisanu ababili, insiinswa yaLeza, mbuli mbakaambilizya kubalanda bakwe basinsimi, zyeelede kuzuzukizigwa."

8 Eelyo ijwi ndindakamvwa kuzwa kujulu lyakaamba lubo kulindime kaliti, "Kuya, bweza bbuku lijulidwe muluboko lwamungelo wiimvwi atala alwizi aanyika."

9 Aboobo ndakayinka kumungelo mpawo ndakamwaambila kuti andipe kabbuku mpawo wakati kulindime, "Bweza mpawo ukalye, kakanona mbuli buchi mumulomo wako, pesi kayoolula mwida lyako."

10 Alimwi ndakabweza kabbuku muluboko lwamungelo mpawo ndakakalya, kakali kunona mbuli buchi mumulomo wangu, pesi nindakakalya mubula bwangu kakali kulula. 11 Mpawo ndakaambilwa kuti, "Uleelede lubo usinsime atala abantu bayingi, amanyika mayiingi, andimi zyiingi, abaami bayiingi."