1 Eelyo ndakabona mungelo kaseluka kuzwa kujulu, kajisi chijuzyo chamulindi utagoli muluboko lwakwe alimwi anketani impati. 2 alimwi wakajata simwaaba, ooyo muzoka wakale utegwa Sikuchenga alimwi kali nguSatani, akumwaanga kwaminyaaka iilichuulu, 3 alimwi mungelo wakamuwaalila mumulindi utagoli, wakamujalila mpawo wakajala aajulu, kuchitila kuti atakeeni lubo manyika, mane yakumana eeyo minyaaka iilchuulu. Musule aboobo weelede kwangununwa kwakayiindi kaniini.

4 Eelyo ndakabona zyuuno zyabwami, bakalikkede mpawo mbaabo bakapegwa nguzu zyakubeteka. Alubo ndakabona myuuya yababo bakagonkwa mitwe yabo nkaambo kakuba bakamboni baJesu alimwi nkaambo kajwi lyaLeza. Aaba mbimbabo ibatakwe bakakomba chinyama nikuba chikozyano chacho akutatambula impa yacho ankumu zyabo nimuba mumaboko abo. Bakabuka kuzwa kubafu, akweendelezya aamwi aKkirisitu kwaminyaka iilichuulu. 5 bakachaala kubafu tebakabuka pe mane minyaka iilichuulu niyakamana. Oobu mbuububuke butaanzi. 6 Uli achoolwe alimwi ulasalala ooyo uyooba akati kabaabo bayoobuka lutaanzi! Atala abaliboobu lufu lwabili talukwe inguzu pe, pesi bayooba bapayizi baLeza abaKkirisitu, mpawo bayooyendelezya aawe kwaminyaka iilichuulu.

7 Alimwi munyaka iilichuulu yaakumana, Satani uyoowangununwa kuzwa muntolongo yakwe, 8 mpawo uyozwa kuyoyeneena manyika woonse alimuzyooko zine zyanyika, nkukuti, Gogo aMagogo, akwaabunganizya amwi kunkondo, mweelwe wabo ulimbuli muse wakulwizi. 9 Mpawo bakeenda mubulamfu boonse bwanyika akuzyunguluka busena bwabasalali achisi chiyandika, pesi mulilo wakaseluka kuzwa kujulu, wakabanyonyoona, 10 alimwi Sikuchenga ooyo wakali wabachenga wakawalilwa mubbila lyamulilo asalufa oko chinyama, amusinsimi mubeji nkubakali bede, mpawo bayoopenzegwa isikati amasiku kwalyoonse alyoonse.

11 Eelyo ndakabona chuuno chipati chabwami chituba ayooyo wakalikkede alinchicho, ijulu anyika zyakachija kuzwa kubusyu bwakwe, alimwi taakwe busena bwabo bwakajanwa. 12 Mpawo ndakabona bafu, bapati abaniini, kabayiimvwi kunembo lyachuuno chabwami, mpawo mabbuku akavununwa. Alubo lwakavununwa ibbuku limbi, ndiibbuku lyabuumi. Mpawo bafu bakabetekwa azeezyo nzibakachita, mbuli zyakalilembedwe mumabbuku. 13 Alimwi lwizi lwakaselula bakali mulindulo, lufu bafu achikkalilo chabafu zyakaselula bafu bakali mulinzizyo, alimwi boonse bakabetekwa mbuli eezyo nzibakachita. 14 Eelyo lufu achikkalilo chabafu zyakawaalilwa mubbila lyamulilo. Eeli ibbila lyamulilo nduulufu lwachibili. 15 Naakuti izina lyawumwi lyaleka kujanika kalilembedwe mubbuku lyabuumi, wakali kuwaalilwa mubbila lyamulilo.