1 Nikwakamana zintu eezi ndakalanga, alimwi ndakabona kujulu mulyango ujulikide!

Alimwi ijwi, eelyo ndindakamvwa lutaanzi kalyaambuula kulindime mbuli mweembo, lyakati, "Tansya uze ookuno, alimwi ndikakutondeezye zintu zyeelede kuchitika kwayinda eechi." 2 Mpawaawo ndakali muMuuya, alimwi ndakabona, kwakaba chuuno chabwami kujulu, awumwi kakkede alinchicho! 3 Ooyo wakalikkede mpawo wakali mbuli ibbwe liyandisyi litegwa jasipa abbwe liyandisi litegwa Kkaneliya, alimwi kwakali fulichoongwe uzyungulukide chuuno chabwami ulimbuli musyobo wabbwe liyandisi litegwa Emeraludi. 4 Eelyo chuuno chabwami chakali zyungulukide azyuuno zyabwami zilimakumi aabili azine, alimwi kwakalikkede ibaalu balimakumi aabili abane azyuuno zyabwami kabasamide midabba ituba, awumwi kabasamide musini wangolide amutwe wakwe. 5 Kuzwa kuchuuno chabwami kwakamweka indabe, kuvuuma akundindima kwandabi, alimwi kunembo lyachuuno chabwami kwakali kuyaka zimunikisyo zimwekesya alimusanu aabili amulilo, aaya zimunikisyo zyimikilila myuuya yaLeza ilimusanu ayibili, 6 mpawo kunembo lyachuuno chabwami kwakali chibaanga mbuli lwizi lwabbwe libalangala, mbuli ibbwe liyandisyi litegwa Kkirasitalu.

Alimwi kwali zinyama zine zipona zyakali zyungulukide chuuno chabwami, kazizwide meso kunembo akusule. 7 Chinyama chitaanzi chipona wakali mbuli mulavu, wachibili wakali mbuli musune waŋombe, wachitatu wakali abusyu bulimbuli bwamuntu, mpawo wachine wakali mbuli nkwazi ilokuuluka. 8 Alimwi zinyama zine zipona, chimwi achimwi chakalijisi mababa alimusanu alimwi, mpawo wakalizwide meso atala koonse amunsi amababa. Tebakaleka pe kwiimba isikati amansiku pe kumutembawula kabati,

"Ulasalala, ulasalala, ulasalala, nguMwami Leza Singuzu Zyoonse,

iwakaliwo, uuliwo, alimwi awuchiyoobuza!"

9 Kufumbwa chiindi choonse zinyama zipona nizitembawula akupa bulemu akulumba kuli ooyo ukkede achuuno chabwami, upona kwalyoonse alyoonse, 10 baalu balimakumi aabili abane balavuntama kunembo lyakwe ooyo ukkede achuuno chabwami akumukomba ooyo upona kwalyoonse alyoonse, kabatula misini yabo kunembo lyachuuno chakwe, kabayimba kuti,

11 "Nduwe weeledwe, Mwami wesu aLeza wesu,

kutambula bulemu alulemeko anguzu.

Nkaambo nduwe wakalenga zintu zyoonse,

alimwi mukuyanda kwako zyakabako alimwi zyakalengwa."