1 Eelyo ndakapegwa kasamu kakwelesya kali mbuli mufunko, alimwi wakati kulindime, "Buka mpawo weele iŋanda yaLeza achipayililo akubala baabo bakomba mumo, 2 pesi uteeli kunze kwalubuwa lwaŋanda yaLeza, ulusiye, nkaambo lupedwe aabo batamuzi Leza, alimwi bayoolyata chisi chisalala kwamyeezi ilimakumi aane ayibili. 3 Alimwi ndiyoopa bakamboni bangu babili inguzu zyakusinsima kabasamide zisamo zyamasaka kwamazuba alichuulu amyaanda ibili amakumi alimusanu akkumi limwi."

4 Aaba bakamboni ibabili njimisamu ibili yamusamu utegwa mu olivu azibikilo zyazimunikisyo zibili ziimvwi kunembo lyaMwami wanyika. 5 Alimwi kuti umwi wayanda kubanyonyoona, mulilo ulazwa kumulomo wabo akunyonyoona basinkondonyina, kuti umwi wayanda kubanyonyoona, mbumbubo alakwe mbweelede kujeegwa. 6 Balaanguzu zyakujala ijulu, kuti taakwe mvula inga ilawa pe mumazuba akusinsima kwabo, alimwi balijisi inguzu zyakusandula meenda kuti abe bulowa, akuuma nyika azyuumo zyoonse, kufumbwa mpubayandila.

7 Alimwi nibakamanisya kupa bukamboni bwabo, chinyama chizwa mumulindi utagoli chiyoobalwanisya akubazunda akubajeya, 8 mpawo mitunta yabo iyoolala mumugwagwa wachisi chipati ooyo uyimikilila muunzi utegwa Sodomu aIjiputi, ooko Mwami wabo nkwaakagankaminwa. 9 Kwamazuba ataatu achisela, chabantu boonse bazwa, kumikowa yoonse, amilaka yoonse, amanyika woonse bayoobona mitumba yabo ifwide mpawo bakakake kuti bazikkwe muzibunda. 10 Mpawo aabo bakkala munyika bayookondwa atala lyabo akusekelela akwabana zipo, nkaambo aaba basinsimi babili bakapenzya aabo bakkala munyika. 11 Pesi nikwakayinda mazuba ataatu achisela, luyooyo lwabuumi luzwa kuliLeza lwakabanjila, alimwi bakayimikila amawulu aabo, mpawo kwakaba kuyoowa kupati kuli aabo bakababona. 12 Eelyo bakamvwa ijwi pati lizwa kujulu kaliti kulimbabo, "Amutante ajulu!" Mpawo kubusyu bwabasinkondonyina bakatanta kujulu mujoba. 13 Alimwi kuhola eelyo kwakali kundengenda kupati kwanyika, alimwi kwakawisya chipanzi chimwi kuzwa kuzipanzi zilikkumi zyachisi, kwakajeegwa bantu balizyuulu zilimusanu azibili mukundengenda kwanyika, mpawo bayingi bakayoowa alimwi bakapa bulemu kuzina lyaLeza wakujulu. 14 Ipenzi lyachibili lyakayinda, ngamubone, ipenzi lyachitatu lyaba afwiifwi kuza.

15 Eelyo mungelo wachisanu ababili wakalizya mweembo, alimwi kwakali majwi awompololesya mujulu, kaati, "Bwami bwaansi bwaba bwami kwaMwami wesu abwaKkirisitu wakwe, alimwi uyoyeendelezya kwalyoonse alyoonse." 16 Alimwi baalu balimakumi aabili abane bakalikkede azyuuno zyabo zyabwami kunembo lyaLeza bakavundama mpawo bakomba Leza, 17 kabati,

"Tupa kulumba kuli nduwe, Mwami Leza Singuzu Zyoonse, uliwo awakaliwo,

nkaambo wabweza nguzu zyakwe mpati

mpawo watanguna kweendelezya,

18 abatamuzi pe Leza bakanyema,

nkaambo chindi chabukali bwako chasika,

achiindi chabafu kuti babetekwe,

kuti balanda bakwe bapegwe bulumbu, basinsimi

abasalali, abaabo bayoowa zina lyako,

boonse baniini abapati,

alimwi akunyonyoona basikunyonyoona nyika."

19 Eelyo ŋanda yaLeza kujulu yakali bukwazi, mpawo bbokesi lyachizuminano lyakaboneka muŋanda yaLeza, alimwi kwakali kumweka kwalulabe, kuvuma, kundindima kwandabe, kundengenda kwanyika, achivulamabwe chipati.