1 "Kumungelo wambungano yaku Efesu lemba oobu,

"Ngaaya majwi ayooyo ujisi nyenyezi zilimusanu azibili muluboko lwakwe lwakululyo, ooyo weenda akati kazibikilo zyazimunikisyo zilimusanu azibili zyangolide. 2 " ‘Ndilizi milimu yako, akubela changuzu kwako kwakukakatila kwako. Anzila njutakonzyi kubotelwa babi pesi wakasunka aabo balyaamba kuti mbatumwa, pesi kabatali mbabo pe, akuziba kuti mbabeji. 3 Ndilizi kuti ulatobelezya akukakatila mumapenzi nkaambo kangu alimwi taakwe numaana nguzu pe. 4 Pesi ndijisi eechi atala anduwe, kuti wakaleka luyando lwako ndwaakali aalo lutaanzi pe. 5 Eelyo yeeya kuzwa mpuwakawida, sanduka mpawo uchite milimu yako njuwakali kuchita lutaanzi. Kuti teewatasanduka, ndizooza kulinduwe ndikagwisye chibikilo chachimwinikisyo chako kuzwa kubusena bwacho. 6 Kakuli kuti ujisi chintu chibotu eechi, ulisulide milimo mibi yabaNikkolayiti, eeyo njindisulide ambebo.

7 "Kufumbwa ujisi matwi, ngamvwe Muuya nchuwaamba kumbungano!

"Kuli kufumbwa uzunda ndiyoomupa kuti akalye kumusamu wabuumi, uli muparadayisi yaLeza.

8 "Kumungelo wambungano yaku Simuna lemba oobu,

"Aaya ngimajwi ayooyo mutaanzi amamaninino, ooyo wakafwa mpawo wabuka lubo. 9 Ndilizi mapenzi aako abuchete bwako pesi uli muvubi alimwi ndilizi nzibakubejelezya balyaamba kuti mbaJuda alimwi kabatali mbaabo pe, pesi nimbungano yaSatani. 10 Utayoowi pe atala azeezyo nzuuya kuyoopenzegwa. Laanga, Satani waamba kuwaala bamwi banu muntolongo, kuti mukasunkwe, alimwi kwamazuba alikkumi muyooba mumapenzi. Musyomeke mane kulufu, mpawo ndiyoomupa musini wabuumi."

11 "Kufumbwa ujisi matwi, ngamvwe Muuya nzuuwamba kumbungano.

"Kufumbwa uzunda taakwe kuyoochisigwa pe kulufu lwachibili.

12 "Kumungelo wakumbungano yakuPegamamu lemba oobu,

"Aaya ngimajwi ayooyo uli apanga libosya mabazu aabili. 13 Ndilikuzi nkukkala, ooko kuli chuuno chabwami bwaSatani, nikuba boobo ukkede kusyomekede kuzina lyangu alimwi taakwe nwakakaka kusyoma kulindime pe nikuba mumazuba aAntipasi kamboni wangu, usyomekede kulindime, wakajayigwa muchisi chanu, ooko Satani nkwakkala. 14 Pesi ndijisi zintu ziche atala anduwe, ujisi bamwi bantu ooko bajisi injiisyo yaBbalamu, bakayiisya Bbalakki kuti alebye bana baIzirayeli, kuti bakalye chakulya chakapayizigwa kumituni akuchita mamambi. 15 Aboobo iwe alubo ujisi bamwi bajisilidi anjiisyo yabaNikkolayiti. 16 Aboobo amusanduke. Kuti kwataba boobo, ndilaza kulindinywe achakufwambana mpawo ndikabalwanisye apanga lyamulomo wangu."

17 "Kufumbwa ooyo ujisi matwi, ngamvwe Muuya mbuwaamba kumbungano."

"Kufumbwa ooyo uzunda ndiyoomupa amwi Mana asisidwe, alimwi ndiyoomupa ibbwe lituba, azina pya lilembedwe alindilyo eelyo litakwe ulizi kunze kwayooyo ulitambula.

18 "Kumungelo wambungano yamuTiyatira lemba oobu,

"Aaya majwi aMwana Mulombe waLeza, ujisi meso ali mbuli bbangabanga amulilo, amawulu aakwe ali mbuli mukuba usalalisya. 19 Ndilizi milimu yako, aluyando lwako, alusyomo, akukutawuuka kwako alukakatilo lwamoyo mulamfu wako, alimwi kuti milimu yako njulikuchita lino mipati kwiinda eeyo mitaanzi. 20 Pesi ndijisi eechi atala anduwe, kuti wakalekelela mwanakazi Jezebbelu ulyaamba kuti musinsimi alimwi ulayiisya kayeneena balanda bangu mukuchita bumambi akulya zilyo zipayizigwa kumituni. 21 Ndakamupa chiindi chakusanduka, pesi ulakaka kusanduka kuzisusi zyakwe. 22 Ngamulange, ndiyoomuwaala kubulo bwamachise, abaabo bachita bwaamu anguwe ndiyoobawala mumapenzi mapati, kunze akuti basanduka munchito zyakwe, 23 alimwi ndiyoojeya bamutobela. Eelyo imbungano zyoonse ziyooziba kuti ndili ooyo ufunkulula mizeezo amyoyo, mpawo ndiyooliya umwi awumwi mukwiinda kumilimu yakwe.

24 "Pesi kuli boonse basyomi bali muTiyatira, bakakaka injiisyo eeyi, batana bayiiya kuli bamwi nzibaamba kuti, ‘zintu zinikide zyaSatani,’ kulindinywe ndaamba kuti, tandibikki umbi mukuli pe alindinywe, 25 pesi kuunze kwakuti ngamujatisye luzutu kuli eezyo nzimujisi, mane ndiboole. 26 Kufumbwa ooyo uzunda ayooyo winkilila anembo kachita milimo yangu kusikila kumamanino, ndiyoomupa nguzu atala amanyika, 27 alimwi uyoobeendelezya amusako walubulo, mbuli inongo zyabulongo mbuzipwasulwa muzipanzi zyiingi, 28 mbuli mbundakatambula bweendelezi kuzwa kuliTaata, alimwi ooyo ndiyoomupa intanda.

29 "Kufumbwa ooyo ujisi matwi, ngamvwe Muuya mbuwaamba kumbungano.