1 "Kumungelo wambungano yakuSadisi lemba oobu,

"Majwi ayooyo ujisi myuuya yaLeza iilimusanu ayibili anyenyezi zilimusanu azibili. "Ndilizi milimo yako, ujisi izina lyakupona, ani ulifwide. 2 Sinsimuka, uyumye zicheede alimwi zyaamba kufwa. Nkaambo tendakajana milimo yako kilomene pe kubusyu bwaLeza wangu. 3 Nkikaako, yeeya injiisyo njuwabamvwa akutambuula, wiiswilizye, mpawo usanduke. Kuti teewasinsimuka, ndiyooza mbuli mubbi mbachita, tukoyooziba pe chiindi nchindiyooza kulinduwe. 4 Nikuba boobo mulichili abantu bache biyo muSadisi batana kusofwaazya zisamo zyabo, alimwi bayoyeenda andime muzisamo zituba, nkaambo balaacheelelo. 5 Kufumbwa ooyo uzunda uyoosamikwa zisamo zituba, alimwi tandikwe kuyoolizima pe izina lyakwe mubbuku lyabuumi, ndiyoolyiita izina lyakwe antanganana kubusyu bwaTaata akubusyu bwabaangelo bakwe.

6 "Eelyo kufumbwa ujisi matwi ngamvwe Muuya mbuwaamba kumbungano.

7 "Kumungelo wambungano yakuFiladelufiya lemba oobu,

"Aaya ngimajwi awu usalala, wakasimpe, ooyo ujisi chijuzyo chaDevidi, ooyo ujula kakutakwe ooyo ujala pe. 8 " ‘Ndilizi milimo yako. Laanga, ndabika kunembo lyako mulyango ukwazeme, ooyo utakwe ukonzya kuujala, ndilizi kuti ulijisi inguzu ziniini, pesi wakabaamba ijwi lwangu, pesi taakwe nuwakakaka izina lyangu pe. 9 Laanga, ndiyoochita aabo bali mumbungano yaSatani balyaamba kuti mbaJuda alimwi kabatali mbabo pe, pesi kaba beja biyo. Laanga, ndiyoobachita kuti baboole akuvuntama kunembo lyamawulu aako, mpawo bayooziba kuti ndilakuyanda. 10 Nkaambo wakabamba ijwi lyangu alukakatilo chamoyo mulamfu, ndiyookukwabilila muchiindi chakusunkwa eecho chiyoobuza anyika yoonse, kukusunka aabo bakkala anyika. 11 Ndiilikuza chakufwambana, jatisisya kuli eecho nchulaacho, kuchitila kuti kutabi umwi ubweza musini wako. 12 Kufumbwa ooyo uzunda, ndiyoomuchita kuti akabe musemu muŋanda yaLeza wangu, takwe nayoozwa pe mulinjiyo, mpawo ndiyoolemba alinguwe izina lyaLeza wangu, azina lyachisi chaLeza wangu, Jerusalemu mupya useluka kuzwa kujulu kuliLeza wangu, alimwi ndiyoolemba alinguwe izina lyangu ipya.

13 "Eelyo, kufumbwa ooyo ujisi matwi, ngamvwe eecho Muuya nchuwaamba kumbungano.

14 "Kumungelo wambungano yakuLayodisiya lemba oobu,

"Aaya ngimajwi ayooyo utegwa Ameni, usyomeka akamboni wakasimpe, matalikilo azyoonse Leza nzyakalenga. 15 Ndiilizi milimo yako kuti tutontoli nikuba kupya. Ndalikulombozya kuti nikuunga ulatontola nikuba kupya! 16 Aboobo, nkaambo kakuti tupyi nikuba kutontola ulakasala, ndiyookuswida kuzwa kumulomo wangu. 17 Nkaambo waamba kuti, ‘Ndili muvubi, ndazwidilila, alimwi takwe chintu nchindibula pe,’ kutazi pe kuti ufwiisya bweme, ulimuntu biyo, ulimuchete, ulimoofu, alimwi ulichintanda. 18 Nkikaako ndakulayilila kuti wuule kulindime ingolide iyakasunkwa mumulilo, kuchitila kuti ube muvubi, azisamo zituba zyakusama kuti ukasame akuvumba bweme bwachintanda bwako kuzwa kukubonwa, alimwi ulisikise meso aako, kuti ubone. 19 Aabo mbindiyanda, ndilabakalalila akubalaya, aboobo amube basungu mpawo musanduke. 20 Laanga, ndiimvwi amulyango, kandiilikukonkomona, kufumbwa umvwa ijwi lyangu akundijulila mulyango, ndiyoonjila, alimwi ndikalye aawe, mpawo alakwe andime. 21 Kufumbwa ooyo uzunda ndiyoomupa cheelelo chakukkala andime achuuno changu chabwami, mbuli ndime mbundakazunda akukkala aTaata achuuno chakwe.

22 "Kufumbwa ujisi matwi, ngamvwe Muuya nchuwaamba kumbungano."