1 Eelyo ndakabona Mwana wambelele kajula chisinizyo chitaanzi, chazisinizyo zilimusanu azibili mpawo ndakamvwa umwi wazinyama zine zipona kati, ajwi pati lili amuzuzumo, wati, "Kuza!" 2 Alimwi ndakabona, mpawo ndakalanga, imbongolo ituba. Alimwi sikuyeenzya wakali akanta, mpawo wakapegwa musini. Alimwi wakayinka kayabuzunda akuzunda.

3 Eelyo Mwana wambelele naakajula chisinizyo chachibili, ndakamvwa chinyama chipona chachibili kachiti, "Kuza!" 4 Mpawo kwakazwa imbongolo iimbi, yakali kusalalisya. Sikuyeenzya wakapegwa inguzu wakagwiisya lumuuno munyika, kuti bantu bakajayane. Alimwi wakapegwa ipanga ipati.

5 Lino Mwana wambelele naakajula chisinizyo chachitatu, ndakamvwa chinyama chipona chachitatu kachiti, "Kuza!" Mpawaawo ndakalanga, mpawo ndakabona imbongolo isiya, alimwi sikuyeenzya wakalijisi zyeelesyo zibili muluboko lwakwe. 6 Alimwi ndakamvwa chakali kubaanga ndijwi akati kazinyama izine zipona kaliti, "Mweelo walufulu wazilyo buyoowulwa amufolo wamuntu wabuzuba bumwi, amweelwe yamifulu itatu yabbaali iyowulwa amufolo wamuntu wabuzuba bumwi. Pesi utachesyi mafuta nikuba wayini!"

7 Lino Mwana wambelele naakajula chisinizyo chachine, mpawo, ndakamvwa ijwi lyachinyama chachine chipona, kaliti, "Kuza!" 8 Alimwi ndakalanga, mpawo ndakabona, imbongolo ilamubala wasokwe tete linyanide, mpawo, izina lyasikuyeenzya imbongolo wakali kutegwa lufu, alimwi chikkalilo chabafu chakamutobelela kusule afwiifwi, alimwi zyakapegwa nguzu zyiinda chipanzi chimwi kuzipanzi zine zyanyika, kuti zikakujaye apanga, anzala alimwi amalwazi mpawo abanyama bamusokwe bamunyika.

9 Eelyo Mwana wambelele naakajula chisinizyo chachisanu, ndakabona myuuya yabasyomi kunsi lyachipayililo yabaabo bakajeegwa nkaambo kajwi lyaLeza abukamboni mbubakalijisi, 10 alimwi bakoompolola ajwi pati kabati, "O Mwami Singuzu Zyoonse, usalala awakasimpe! Kuyooba lili, mane ukabeteke bantu bamunyika akubweedezya bulowa bwesu?" 11 Eelyo umwi awumwi wakapegwa mudabba utuba mpawo bakaambilwa kuti balindile kwakayiindi kaniini, mane mweelwe wabalandanyina ababunyina uzulile, aabo bakaleelede kujeegwa mbuli mbabo.

12 Alimwi ndakabona Mwana wambelele naakalikujula chisinizyo chachisanu achimwi. Kwakaba kundengenda kupati kwanyika, alimwi izuba lyakasiya mbuli chisamo chasaka chisiya, chakabambwa aboya bwampongo busiya mpawo mweezi woonse wakasalala kuba mbuli bulowa. 13 Inyenyezi zyakujulu zyakalokela anyika, mbuli nkuyu zitanabizwa mbuziloka kumukuyu aawo iguwo pati nilyawutikimuna. 14 Mulengalenga lyakayinda mbuli bbuku livungidwe, alimwi azilundu zyoonse atusuwa toonse zyakagwisigwa kuzwa kubusena bwazyo. 15 Eelyo bami banyika abaalumi bapati abeendelezi babasilumamba, abavubi abasinguzu, abantu boonse, abazike abantu baangunukide, bakayuba mumagolo aakati kamabwe amuzilundu, 16 kabaliikwiita zilundu amumabwe kabati, "Amutuwide alimwi mutusise kubusyu bwayooyo ukkede achuuno chabwami, alimwi akuzwa bukali bwaMwana wambelele! 17 Nkaambo buzuba bupati bwabukali bwabo bwasika, alimwi ngwani ukonzya kubwiimikilila kunembo bwalyo?"